Gürcüstanda qətl hadisəsi baş verib. 

 
APA-nın Gürcüstan bürosunun məlumatına görə, azərbaycanlıların kompakt yaşadığı Bolnisi rayonundakı Tamarisi qəsəbəsində yaşayan 26 yaşlı Xviça Nəbiyev həyat yoldaşı 1995-ci il təvəllüdlü Yeganə Quliyevanı qətlə yetirib.

X. Nəbiyev Y. Quliyevanı boğaz nahiyəsindən bıçaqla vurub.

Hadisənin qısqanclıq zəmində baş verdiyi bildirilir.

Qeyd edək ki, X. Nəbiyevin 1,5 və 3 yaşlı körpə uşaqları var. Hadisə ilə bağlı Gürcüstan Cinayət Məcəlləsinin 108-ci (bilərəkdən adam öldürmə) maddəsi ilə cinayət işi açılıb, araşdırma aparılır.

Ağdam rayonunda ilanlar evlərə hücum edib.

Dalga tv Oxu.Az-a istinadən verdiyi məlumata görə, Əfətli kəndində daha çox müşahidə edilən sürünənlər insanlara hücum etməkdən də çəkinmir. 

Kənd sakini Razi Hüseynov uşaqların yatdığı otaqda gördüyü ilanlardan ikisini öldürüb, bir neçəsi qaçıb. 

Sakinlər sürünənlərin ötən illərə nisbətən daha böyük olduqlarını və həyətlərdə oynayan azyaşlılar üçün tamamilə təhlükə mənbəyinə çevrildiyini bildiriblər. Onlar hesab edirlər ki, ilanların bu vaxt üzə çıxmasına əsas səbəb ermənilərin təmas xəttində törətdikləri yanğınlar və tez-tez atəşkəsi pozmalarıdır. Sakinlər vəziyyətdən çıxış yolu kimi aidiyyəti qurumlardan kömək istəyirlər. 

Qeyd edək ki, son illər işğal altındakı ərazilərdən vəhşi heyvanların və sürünənlərin təmas xəttinə yaxın yerləşən yaşayış məntəqələrinə miqrasiyası xeyli artıb.

Türkiyənin Tekirdağ şəhərində azərbaycanlı qadın avtobus sürücüsünü bıçaqlayıb.

Dalga tv Oxu.Az-a istinadən verdiyi məlumata görə, Ferhan Yakın adlı sürücünün idarə etdiyi avtobusda yolçuluq edən sərnişin Mənsurə Əlizadə hələlik məlum olmayan səbəblərdən onunla mübahisə edib.

Mübahisə davaya dönüncə Mənsurə Əlizadə çantasında gəzdirdiyi bıçağı çıxararaq sürücünü sinəsindən vürüb.

Hadisə bələdiyyə dayanacağında şahidlərin gözü qarşısında baş verib. Sürücünün yaralandığını görən digər sərnişinlər hadisə yerinə polis və təcili tibbi yardım çağıırıblar.

Yаrаlı sürücü xəstəxanaya, azərbaycanlı qadın isə polis bölməsinə aparılıb.

Ağcabədi rayonunda qonşusunun avtomobilini yandıran müəllim tutulub.

Dalga tv Oxu.Az-a istinadən xəbər verir ki, hadisə rayonun Taxtakörpü qəsəbəsinin Qarakeş obasında qeydə alınıb.

Belə ki, Laçın rayonundan məcburi köçkün Xanalı Muradalı oğlu Verdiyevin bir müddət bundan öncə müxtəlif vaxtlarda iki avtomobili yandırılıb.

X.Verdiyev Laçın Rayon Polis Şöbəsinə məlumat verərək bildirib ki, naməlum şəxs və ya şəxslər tərəfindən ona məxsus “VAZ-21015” və “Mercedes-190” markalı iki avtomobili yandırılıb.

Laçın RPŞ-nın əməkdaşları tərəfindən həyata keçirilən əməliyyat-axtarış tədbirləri zamanı avtomobilləri yandırmaqda şübhəli bilinən Qarakeş obasının orta məktəbinin tarix müəllimi İkram Sərdar oğlu Şükürov tutulub.

Şübhəli şəxs qismində saxlanılan İ.Şükürov ilkin dindirmə zamanı törətdiyi əməli etiraf edib.

O, istintaqa verdiyi ifadəsində bildirib ki, qonşusunun iki avtomobili olduğu halda, onun avtomobili yoxdur və hadisəni gecə vaxtı qonşusunun həyətinə girərək bu səbəbdən törədib.

Faktla bağlı Laçın RPŞ-da cinayət işi başlanılıb, araşdırmalar davam etdirilir.

Bakıda mənzildən külli miqdarda pul və qızıl oğurlanıb. Dalga tv Lent.az-a istinadən xəbər verir ki, hadisə Xətai rayonu Telnov küçəsi 10, mənzil 5 ünvanında baş verib. 1967-ci il təvəllüdlü İlqar Niyazova məxsus mənzildən 7 min manat dəyərində qızıl-zinət əşyaları, 10 min dollar və 30 min manat oğurlanıb.

Ev sahibi 34-cü Polis Bölməsinə müraciətində bildirib ki, hadisə aprelin 30-da saat 17:30-dan 23:00-dək olan müddətdə mənzildə heç kimin olmadığı vaxt baş verib. Ailənin toy məclisində olmasından istifadə edən naməlum şəxs və ya şəxslər qapını açaraq evə soxulub.

Qeyd edək ki, şikayətçi İ.Niyazov biznesmendir.

"Qafqazinfo" saytı zərərçəkən ailənin qız evi olduğunu və onların cinayətdə oğlan evini günahlandırdığını yazıb.