İnsan interferonuyla zəngin yumurta yumurtlayan toyuq növü yetişdirilib.
Bu yeniliyi Yaponiyanın "Cosmo Bio Co" şirkətinin biotexnoloq-alimləri Milli Sənaye və Texnologiya İnstitutunun tədqiqatçıları ilə birgə əldə ediblər.
Tədqiqatçıları xoruz cinsiyyət hüceyrələrinin genetik modifikasiyası üzərində eksperiment aparıblar. Geni modifikasiya edilmiş sperması ilə mayalanan yumurta hüceyrələrdən əmələ gələn yumurtaların tərkibində aktiv beta-interferon sintez olunur.
Beta-interferon isə insanın immun sistemi üçün çox vacib elementdir. Bu xərçəng və hepatitin bir çox növlərinin müalicəsində istifadə olunan dərmanların aktiv komponenti olan zülaldır.
Alimlər hesab edir ki, yeni texnologiya onkoloji xəstəliklərin müalicəsində tətbiq olunan interferon əsaslı dərmanların qiymətini xeyli ucuzlaşdıra bilər. Bu layihə dövlət tərəfindən də dəstəklənib.

Ötən gün axşam Salyanda 7 yaşlı uşağın naməlum avtomobillə vurulub öldürülməsi faciəsinin daha da faciəli təfərrüatı məlum olub. virtualaz.org xəbər verir ki, həmin uşağın anası Təxirəsalınmaz Tibbi Yardım Stansiyasının Salyan Regional Mərkəzinin tibb bacısıdır. Qadın uşağı evdə nənəsi ilə qoyub işə gedib, az sonra oğlunun cansız bədəni ilə xəstəxanada qarşılaşıb.

Xatırladaq ki, ötən gün axşam saatlarında Ələt-Astara avtomobil yolunun Salyan şəhərinin ərazisindən keçən 59-cu kilometrində "Ay işığı" mağazasının qarşısında piyadanın vurulması ilə nəticələnən yol nəqliyyat hadisəsi baş verib. 

Yaxınlıqdakı binada yaşayan 7 yaşlı Salyan şəhər sakini Əhmədov Ayxan Sabir oğlu mağazadan çıxıb evlərinə getmək istəyərkən onu naməlum, ağ rəngli VAZ-2107 markalı avtomaşın vurub. Uşaq xəstəanaya gətirilərkən yolda keçinib.

Məlum olub ki, həmin gün balaca Ayxanın anası Aytəkin tibb bacısı işlədiyi Təxirəsalınmaz Tibbi Yardım Stansiyasının Salyan Regional Mərkəzində növbədə olub. Ona görə də o və qardaşı evdə nənələrinin yanında qalıblar. Bu vaxt Bakıdan bibilərinin nişanlısı Cavid Abdullayev onlara gəlib.

Bazarlıq üçün yaxınlıqdakı "Ay İşığı " marketinə yollanan C.Abdullayevə Ayxan və qardaşı da qoşulub. Mağazadan çıxan zaman isə uşağı hələ də axtarışda olan maşın vuraraq qaçıb. Həyatının son anlarını yaşayan balaca Ayxan dərhal yaxınlıqda olan insanlar tərəfindən Salyan Mərkəzi Xəstəxanasına çatdırılıb. Xəstəxanaya ağır yaralı gətirildiyini eşidən ana dərhal ona yaxınlaşıb və... bir qədər evdə qoyub gəldiyi 7 yaşlı oğlunun cəsədini görüb...

Qeyd edək ki, cinayəti törədib qaçan sürücü hələ tutulmayıb.

Tbilisi şəhərində 67 saylı ictimai məktəbin bir qrup şagirdi etiraz aksiyası keçirib.

APA-nın Gürcüstan bürosunun xəbərinə görə, aksiyaya səbəb məktəbin kimya müəllimi Dodo Kezuanın şagirdlərə qarşı təhqir və fiziki zorakılığa yol verməsidir.

Məktəbin qəyyumluq şurasının üzvü Natia Maxaraşvili bildirib ki, D.Kezua son illər 3 şagirdi döyüb və azərbaycanlı şagirdləri təhqir edib: “Kimya müəlliminə qarşı bizim haqlı ittihamlarımız var. Sonuncu fakt təxminən 10 gün əvvəl baş verib. Həmin müəllim səkkizinci sinif şagirdini döyüb, azərbaycanlı qız şagirdi isə təhqir edib".

N. Maxaraşvili qeyd edib ki, müəllimlə bağlı şikayətləri nəzərə alınmasa, Azərbaycan səfirliyinə müraciət edəcək.

Hazırda D.Kezuanın sağlamlıq vəziyyəti ilə bağlı məktəbə gəlmədiyi bildirilir. Məktəbin direktoru Mariam Tavartkiladze isə dərs prosesinin başa çatmasından sonra saat 15:00-da məsələyə münasibət açıqlayacağını deyib.

Gürcüstanın Təhsil və Elm Nazirliyi 67 saylı məktəbdə mümkün etnik diskriminasiya faktlarını araşdırmağa başlayıb və bir neçə gündən sonra bununla bağlı rəsmi məlumat yayacaq.   

Bakının Yasamal rayonunda intihara cəhd hadisəsi baş verib.

Dalga tv Report-a istinadən xəbər verir ki, metronun "20 Yanvar" stansiyası yaxınlığında, məcburi köçkünlərin məskunlaşdığı yataqxanın beşinci mərtəbəsində yaşayan 21 yaşlı Məmmədov Heydər Tariyel oğlu özünü eyvandan yerə atıb.

O, bədən xəsarətləri alaraq, xəstəxanaya yerləşdirilib.

Həkimlər onun vəziyyətini qənaətbəxş qiymətləndirirlər.

H.Məmmədov uzun müddətdir ki, ruhi əsəb xəstəliyindən əziyyət çəkir.

Əsasən epifiz (beyində yerləşən vəz) tərəfindən hazırlanan melatonin hormonu ən güclü antioksidantlardan biridir.

Bu hormon streslə mübarizə etməyə kömək edir, orqanizmdə qocalma proseslərini ləngidir, arterial təzyiqi tənzimləyir, bir çox xroniki xəstəliklərin və hətta xərçəng xəstəliklərinin inkişafının qarşısını alır.

Melatonin yuxu zamanı ifraz olunur. Hormonun sintezi işıqlandırma səviyyəsindən asılıdır - işiq onun ifrazını azaldır, qaranlıq isə əksinə artırır. Bu səbəbdən alimlər insanlara tam qaranlıqda yatmağı tövsiyə edirlər.

Siçanlar üzərində aparılmış eksperimentlər göstərib ki, melatoninin çatışmazlığı zamanı heyvanlarda qocalma prosesləri sürətlənir, insulinə qarşı həssaslıq azalır (bu şəkərli diabetin riskini artırır), piylənmə və bədxassəli şişlər inkişaf edirdi. Bundan əlavə dişi heyvanlarda menopauza daha tez başlayırdı.

Melatoninin ifrazı azaldıqda bu kimi simptomlar meydana çıxır:

- yuxusuzluq

- immun sisteminin zəifləməsi

- təzyiqin yüksəlməsi və ya əksinə düşməsi

- əsəbilik, həyacan

- depressiyanın inkişafı.

Bu simptomlar sizi tez-tez narahat edirsə, həkimə müraciət edin. Bəzi hallarda həkim tərkibində melatonin olan preparatları təyin edə bilər. Lakin bu preparatların qəbulu bəzi xəstəliklər və pozulmalar zamanı qadağandır. Həmçinin melatoninin qəbulu diqqəti azaldır ki, bu da bəzi peşə sahibləri üçün (sürücü, dispetçer və s.) yolverilməzdir.

Melatoninin ifrazını təbii yolu ilə artırmaq üçün mütəxəssislər qidalanmada meyvə-tərəvəzləri artırmağı, gün rejimini tənzimləməyi tövsiyə edirlər. Normal tamdəyərli gecə yuxusu melatoninin ifrazının artırılması üçün əsas şərtdir. Bu zaman otaqda qaranlıq olmalıdır, gecə lampası, küçə işıqlandırılması melatoninin ifrazını azaldır.

Növbəti yüz il ərzində Günəşdə bütün dünyanın enerji sisteminin işinə təsir etmək gücündə olan "super partlayış" baş verəcək.

Dalga tv Trend-ə istinadən xəbər verir ki, bu qənaətə Harvard universitetinin bir qrup alimi gəlib. 

Qeyd olunur ki, bu partlayış peyklərin sıradan çıxmasına və internetin dayanmasına gətirib çıxara bilər.

Günəşdəki partlayış nəticəsində Yerdə baş verəcək texnogen qəzaların insan ölümlərinə də səbəb ola biləcəyi ehtimal edilir.

Qeyd edək ki, bu il Günəşdə X gücündə yüksək dərəcəli rentgen partlayışı yanvarın 8-də baş verib. Daha sonra güclü partlayışlar silsiləsi Günəşdə sentyabrın 4-dən baş verib və bir neçə gün davam edib.

Günəşdə partlayışdan sonra yaranan maqnit qasırğalarının meteohəssas insanlara da pis təsir etməsi məlumdur.