İki gün aramsız yağan yağışlar Lənkəranda fəsadlar törədib.

"Dalğa TV" xəbər verir ki, axşam saatlarında daha da güclənən leysan yağışları nəticəsində bir sıra yaşayış məhəllələri su altında qalıb.

Dağətəyi kəndlərin sakinlərinə ciddi ziyan dəyib. Hələlik dəyən ziyanın həcmi məlum olmasa da, ev quşları və xırdabuynuzlu heyvanlar arasında tələfatın olduğu bildirilir.

Fövqəladə Hallar Nazirliyinin (FHN) Cənub regional mərkəzinin xilasediciləri və Dövlət Sularda Xilasetmə Xidmətinin "Cənub" dalğıc-axtarış qrupu Bürcəli və Türkəkəran kəndlərində əhalinin təxliyə edilməsinə cəlb olunub. Gecə saat 00.10 radələrində Növbətçi hissəyə daxil olan telefon zəngindən sonra ilk olaraq Həsənovlar ailəsinin ikisi azyaşlı olmaqla 6 nəfər üzvü FHN əməkdaşları tərəfindən qayıq vasitəsilə evlərindən təxliyə edilib.

FHN Cənub regional mərkəzinin məlumatına görə, ümumilikdə Bürcəli və Türkəkəran kəndlərində 18 nəfərə yardım göstərilib. Onlardan 7-si azyaşlı, 6 nəfəri qadın olub. Xilasetmə işləri bir neçə saat ərzində davam edib.

Kənd sakinlərinin bildirdiyinə görə, həyətlərdən su sel şəklində keçərək, nisbətən çökək olan ərazilərdə toplanıb. Bu da hansısa bəndin uçması ehtimlını yaradır. Hazırda həyətlərə yığılan suyun hündürlüyü 1-1,5 metrə çatır. Rayonun digər kəndlərində də daşqınların olduğu bildirilir.

FHN-nin yaydığı rəsmi məlumata görə, yağan intensiv leysan xarakterli yağışlar nəticəsində Lənkəran rayonu, Bürcəli kəndində bəzi evlərin həyətyanı sahələri və zirzəmiləri su ilə dolub. Qurumun Cənub regional mərkəzinin xilasediciləri və Dövlət Sularda Xilasetmə Xidmətinin "Cənub" dalğıc-axtarış qrupu əraziyə cəlb olunub. Xilasedicilər tərəfindən ümumilikdə 5 ailə, o cümlədən 18 nəfər xilas olunaraq təhlükəsiz əraziyə təxliyə edilib. Əməliyyat saat 03:32 də başa çatıb.

Milli Təhlükəsizlik Nazirliyi (MTN) tərəfindən həyata keçirilmiş anti-terror tədbirləri nəticəsində qanunsuz silahlı birləşmələrin tərkibində döyüşmüş daha 5 nəfər saxlanılıb.

MTN İctimai Əlaqələr İdarəsindən APA-ya verilən məlumata görə, Azərbaycan Respublikasının qanunvericiliyi ilə nəzərdə tutulmayan silahlı birləşmələr və ya qruplar yaratma, eləcə də onların yaradılmasında və fəaliyyətində iştirak etmə, onları silah, döyüş sursatı, partlayıcı maddələr, hərbi texnika ilə, yaxud əsgəri ləvazimatla təchiz etmə, həmçinin, terrorçuluğa hazırlıq, yəni dövlət hakimiyyəti orqanları və ya beynəlxalq təşkilatlar tərəfindən qərar qəbul edilməsinə təsir göstərmək məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması və ya başqa ictimai təhlükəli nəticələrin baş verməsi təhlükəsi yaradan partlayış, yanğın və ya digər hərəkətlər törətmə, habelə həmin məqsədlə bu cür hərəkətlərin törədiləcəyi ilə hədələmə, Azərbaycan Respublikası vətəndaşları və ya Azərbaycan Respublikasında daimi yaşayan vətəndaşlığı olmayan şəxsləri dini məzhəbləri yaymaq, dini ayinlərin icrası adı altında, dini düşmənçilik zəminində Azərbaycan Respublikasının hüdudlarından kənarda aparılan silahlı münaqişələrə cəlb etmə, yaxud bu məqsədlə döyüş təlimləri keçmə, yaxud həmin məqsədlə fəaliyyət göstərən sabit qrup yaratma, eləcə də həmin qruplarda, təlimlərdə və ya silahlı münaqişələrdə iştirak etmə və digər hüquqazidd əməllərinin törədilməsinə görə Azərbaycan Respublikasının vətəndaşları - Quliyev Namiq Şahid oğlu, Hacıverdiyev Xalid Əliağa oğlu, Əhmədov Taleh Mahir oğlu, Əsgərov Elvin Əsgər oğlu və Mahmudov Anar Kərəm oğlu şübhəli şəxs qismində tutulublar.


Faktlarla bağlı MTN İstintaq Baş İdarəsi tərəfindən AR Cinayət Məcəlləsinin 12.1, 279.1-ci, 12.3,28,214.2.1, 12.3,28,214.2.3, 12.1,218.2-ci və 283-1.3-cü maddələri ilə cinayət işləri başlanılmışdır. Quliyev Namiq Şahid oğlu, Hacıverdiyev Xalid Əliağa oğlu, Əhmədov Taleh Mahir oğlu, Əsgərov Elvin Əsgər oğlu və Mahmudov Anar Kərəm oğlu təqsirləndirilən şəxs qismində cəlb olunaraq məhkəmənin qərarları ilə barələrində həbs qətimkan tədbirləri seçilib.

Müəyyən edilib ki, Namiq Quliyev, Xalid Hacıverdiyev, Taleh Əhmədov, Elvin Əsgərov və Anar Mahmudov 2012-2015-ci illər ərzində müxtəlif vaxtlarda Suriya Ərəb Respublikasının və İraq Respublikasının ərazisində həmin dövlətlərin, habelə Azərbaycan Respublikasının qanunvericiliyi ilə nəzərdə tutulmayan ayrı-ayrı silahlı birləşmələrin, o cümlədən “İslam Dövləti (İŞİD)”, “Cəbhətül-Nusra” və «Cumdul-Xilafə» terrorçu təşkilatlarının fəaliyyətində iştirak ediblər.

Cinayət işləri üzrə bütün halların araşdırılması, bu hüquqazidd əməllərin digər iştirakçılarının müəyyənləşdirilməsi istiqamətində istintaq-əməliyyat tədbirləri davam etdirilir.

Ermənilər Dağlıq Qarabağ müharibəsi zamanı ən böyük qətliamın yaşandığı Xocalıda şadlıq sarayı inşa edir. 

"Dalğa TV" Ermənistan KİV-nə istinadən xəbər verir ki, 250 nəfərlik şadlıq sarayı separatçı Qarabağ rejimi və "Hayastan" ümumerməni fondunun birgə maliyyəsi hesabına inşa olunur. İcma mərkəzi ilə yanaşı tikilən şadlıq sarayının gələn ilin ortalarında istifadəyə verilməsi nəzərdə tutulur.

1992-ci il fevralın 25-dən 26-na keçən gecə Ermənistan ordusunun Xocalıya hücumu nəticəsində rəsmi məlumatlara görə 613 azərbaycanlı öldürülmüş, 1275 nəfər isə girov götürülmüşdü.

Bakıda Üzeyir Hacıbəyli küçəsi, Ak.Zərifə Əliyeva küçəsi, Aleksandr Puşkin küçəsi, Neftçilər və Azadlıq prospektlərində yaranan tıxacların aradan qaldırılması üçün araşdırmalar aparılıb.

Nəqliyyatı İntellektual İdarəetmə Mərkəzindən Trend-ə verilən məlumata görə, aparılmış araşdırmalar nəticəsində məlum olub ki, adı çəkilən küçə və prospektlərdə yol hərəkətinin tənzimlənməsi ilə bağlı tərtib olunan yeni sxemdə göstərildiyi qaydada təşkil edilməsi və aşağıda qeyd olunmuş təkliflərin icra edilməsi günün müxtəlif saatlarında yaranan tıxac hallarının qarşısını alacaq.

Araşdırmalara əsasən təklif edilir ki, A.Puşkin küçəsindən sağa, Ü.Hacıbəyli küçəsi istiqamətində hərəkət edən nəqliyyat vasitələrinin daimi olaraq hərəkətinin svetoforun əlavə seksiyasında, A.Puşkin küçəsindən sola hərəkət etmələri tövsiyə olunur. Eyni zamanda, Ü.Hacıbəyli küçəsi istiqamətində hərəkət edən nəqliyyat vasitələrinin daimi hərəkətinin isə işıqforun əlavə seksiyasında, Ü.Hacıbəyov küçəsindən sağa, A.Puşkin küçəsi istiqamətində hərəkət edən nəqliyyat vasitələrinin daimi hərəkətinin işıqforun əlavə seksiyasında təşkil edilməsi təklif olunur.

Bundan başqa, daha bir təklif A.Puşkin küçəsinin Ü.Hacıbəyli küçəsi ilə Neftçilər prospekti arasında olan hissəsində yaranan tıxaclarla bağlıdır. Həmin istiqamətlər arasında rezin arakəsmələrin quraşdırılması, həmçinin A.Puşkin küçəsi ilə hərəkət edib Neftçilər prospekti istiqamətində hərəkət edən avtobusların birbaşa deyil, Ak.Zərifə Əliyeva və Keykab xanım Səfərəliyeva küçələri vasitəsilə hərəkət etmələri təklif edilir. Nəzərdə tutulan yenilik nəqliyyatın Neftçilər prospekti istiqamətində hərəkət etməsini təmin etmək məqsədilə A.Puşkin küçəsində yerləşən avtobus dayanacağını götürərək, Ak.Z.Əliyeva və K.Səfərəliyeva küçələrində avtobus dayanacağının quraşdırılması barədədir.

Növbəti təklif kimi isə, Ak.Z.Əliyeva küçəsinin A.Puşkin və K.Səfərəliyeva küçələrinin arasında olan hissəsinin bir istiqamətli edilməsi, Neftçilər prospekti ilə hərəkət edən nəqliyyat vasitələrinin sola, Azadlıq prospektinə, Ak.Zərifə Əliyeva küçəsinə və “Azadlıq” meydanının altında yerləşən avtomobil dayanacağına daxil olmasını təmin etmək üçündür.

Bu məqsədlə “Giriş qadağandır” yol nişanlarının götürülməsi, Azadlıq prospekti ilə hərəkət edən nəqliyyat vasitələrinin Neftçilər prospektinə çıxışının təmin edilməsi, Neftçilər prospekti ilə hərəkət edən nəqliyyat vasitələrinin sola, A.Puşkin küçəsi istiqamətində hərəkətinin təmin edilməsi təklif edilir.

Qafqaz Müsəlmanları İdarəsində (QMİ) Məhərrəm ayının başlanması ilə əlaqədar tədbir keçirilib.

"Dalğa Tv"nin xəbərinə görə, tədbirdə QMİ-nin Elmi-Dini Şurası və Qazılar Şurasının üzvləri, qurumun səlahiyyətli nümayəndələri, Dini Qurumlarla İş üzrə Dövlət Komitəsinin rəsmiləri, habelə dini icma rəhbərləri və tanınmış elm adamları iştirak ediblər.
Tədbir Qurani-Kərimin tilavəti ilə başlanıb.
Çıxış edən QMİ sədri, Şeyxülislam Allahşükür Paşazadə İslamda müqəddəs aylardan sayılan Mərərrəm ayının özəlliklərindən, Kərbəla hadisəsi və Aşura gününün mahiyyətindən danışıb, Məhərrəm ayının dini qaydalara və dövlətin qanunlarına uyğun keçirilməsinin vacibliyini vurğulayıb, bu barədə axund və imamlara müvafiq tapşırıq və tövsiyələrini verib.
Daha sonra QMİ Qazılar Şurası Məhərrəm ayının başlanması ilə əlaqədar fətva verib. Fətvada qeyd olunub ki, Hicri-qəməri təqvimi ilə 1436-cı il başa çatır. Qafqaz Müsəlmanları İdarəsinin Qazılar Şurası bildirir ki, yeni Hicri 1437-ci ilin başlanğıcı Məhərrəm ayının 1-i Miladi təqvimlə 2015-ci il oktyabr ayının 15-nə, Aşura günü isə oktyabrın 24-nə təsadüf edir.
Tədbirdə A.Paşazadə Qafqaz Müsəlmanları İdarəsinin Şamaxı Astrofizika Rəsədxanası ilə birgə hazırladığı 1437-ci hicri ilinin təqvimini də təqdim edib.

Gürcüstanın paytaxtı Tbilisidə Ermənistan vətəndaşı, 1975-ci il təvəllüdlü Veniamin A. qanunsuz olaraq, böyük miqdarda narkotik maddə saxladığı üçün tutulub.

"Dalğa TV" Gürcüstan KİV-inə istinadən xəbər verir ki, bu haqda ölkənin Daxili İşlər Nazirliyi məlumat yayıb.

Məlumata görə, onun üzərindən 1,3492 q., heroin və 0,0507 q. amfetamin narkotik vasitəsi aşkar edilib.

Ermənistan vətəndaşı barəsində Cinayət Məcəlləsinin narkotik maddələrin qanunsuz əldə edilməsi və saxlanılması maddəsi ilə cinayət işi açılıb.