Gürcüstan Müsəlmanları İdarəsinin (GMİ) bir illik hesabat konfransı keçirilib.

"Dalğa TV"nin məlumatına görə, GMİ-nin rəhbəri Hacı Ramin İgidov konfransda bir il ərzində Gürcüstan ərazisində 38 məscidin təmir olunduğu, 11 məsciddə abdəstxana tikildiyi, 6 məscidə hasar çəkildiyi qeyd edib: "Hazırda Gürcüstanda 86-dan çox məscid qeydiyyatdan keçib. Bu il ərzində 33 dini kitab nəşr edilib. Müxtəlif mövzularda kitablar, o cümlədən 3 000 tirajla Quran Azərbaycan dilində nəşr olunub. 39 məscid müxtəlif səs cihazları ilə təmin olunub. Bu dövrdə GMİ-nin internet televiziyası fəaliyyət göstərib, bu günədək 130 veriliş yayımlanıb".

Ötən bir il ərzində Gürcüstan ərazisindəki bütün məscidlər "SOCAR Georgia" tərəfindən təmənnasız təbii qazla təmin edilib. Eyni zamanda cəzaçəkmə müəssisələrindəki müsəlmanlarla görüşlər keçirilib.

Qurban bayramında kasıb və kimsəsiz ailələrə, həmçinin Tiflisdə təbii fəlakətdən zərərçəkənlərə yardım olunub. Pankisi və Acarıstanda pulsuz tibbi xidmət və müayinə aparılıb. 16 nəfərə əlil arabası verilib.

Qeyd olunub ki, il ərzində Batumidə GMİ-nin fəaliyyəti üçün yeni ofis və mədrəsə binası istifadəyə verilib. GMİ-nin nəzdində Xeyriyyə Fondu yaradılıb. 3 elmi konfrans, 9 müxtəlif konfrans, sərgi, dindarlarla və dövlət rəsmiləri ilə görüşlər keçirilib.

GMİ "Gürcüstanda fəaliyyət göstərən dini təşkilatlar arasında qarşılıqlı anlaşma və əməkdaşlıq haqqında Memarandum" da imzalayıb.
Tədbirdə Gürcüstanın Dini Məsələlərlə iş üzrə Dövlət Agentliyinin sədri Zaza Vaşakmadze da çıxış edib. O bildirib ki, GMİ Gürcüstandakı müsəlmanların müdafiəsi və dinin inkişafı üçün müsbət işlər həyata keçirir: "Dövlət GMİ-nin fəaliyyəti üçün 2002-ci ildə 2 mln 200 min lari, 2014-cü ildə 1 mln 100 min vəsait ayırıb. Mən yalnız vəsaitdən deyil və məscidlərin qeydiyyatdan keçməsi üçün müsbət işləri də qeyd etmək istəyirəm. 85 məscid GMİ-nin ixtiyarına verilib və bu yenə davam edəcək. Biz hələlik dövlətin balansında olan məscidləri təmir edirik, ikinci mərhələdə isə digər məscidləri qeydiyyatdan keçirib onların bərpasına başlayacağıq".

Konfransda Fransada baş verən terroru pisləyən bəyanat da qəbul olunub.

Bakının Binəqədi rayonunda yol çöküb.

Məlumata görə, hadisə Cəfər Xəndan küçəsində baş verib.

Yol kənarında dayanmış "Nissan" markalı avtomobil yaranmış yarğana düşüb. Hadisə yerinə xüsusi texnika çağırılıb, avtomobil çıxarılıb.

Bundan başqa, yoldan keçən bir nəfər qaranlıqda yaranmış yarğanı görməyib və o da ora düşüb. Xoşbəxtlikdən həmin şəxs heç bir xəsarət almayıb.

Qeyd edək ki, Cəfər Xəndan küçəsindən yeraltı kanalizasiya xətti keçir. Kanalizasiya xəttində baş verən qəza nəticəsində yol yatağı yuyulub. Bu səbəbdən yolda çökmə baş verib.

"Azəryolservis" ASC-nin mətbuat katibi Anar Nəcəfli bildirib ki, kanalizasiya xəttinin qəza baş vermiş hissəsində təmir işlərinə başlanılıb. Daha sonra isə yolun bərpası istiqamətində işlər aparılacaq.

"Bakı Sukanal" idarəsinin rəis müavini Əlizadə Nəsirov isə deyib ki, qəza baş vermiş kanalizasiya xətti 25 ildən artıqdır istismar olunur. Bu səbəbdən 1200 mm-lik xətdə aşınma olub, nəticədə çökmə əmələ gəlib. Əlizadə Nəsirov yarğana avtomobilin və insanın düşdüyünü təsdiqləyib.

Beynəlxalq sərhəddi 8 noyabr 2015-ci il tarixdə keçən mülki erməni vətəndaşı bu gün, Beynəlxalq Qızıl Xaç Komitəsinin (BQXK) himayəsi altında keçirilən əməliyyat zamanı geri qaytarılıb.

Bu barədə BQXK-nin Azərbaycan nümayəndəliyindən məlumat verilib. Bugünkü təhvilvermə Azərbaycanın Qazax şəhəri ilə Ermənistanın İcevan şəhəri arasında yerləşən yolda, beynəlxalq sərhəddə gerçəkləşdirilib.

Məlumatda bildirilir ki, BQXK neytral vasitəçi qismində və öz mandatına uyğun olaraq Azərbaycan və Ermənistan hakimiyyət orqanları ilə birgə bu repatriasiyanın keçirilməsinə yardımçı olub. Repatriasiyadan əvvəl BQXK-nın nümayəndələri bu qadına baş çəkərkən o, geri dönmək arzusunu bildirib. Təşkilatın nümayəndələri həmçinin onun Ermənistandakı ailə üzvləri ilə də əlaqə saxlayıblar.

Cenevrə Konvensiyalarına əsaslanan mandatına uyğun olaraq BQXK, Dağlıq Qarabağ münaqişəsi ilə bağlı, 1992-ci ildən bəri bu regionda fəaliyyət göstərir.

Bakıda orta məktəbdə dəhşətli hadisə baş verib.

Məlumata görə, hadisə Qaradağ rayonu, Lökbatan qəsəbəsində baş verib.
Qəsəbədə yerləşən 106 saylı orta məktəbin 7c sinfində dərs zamanı şagird sinif yoldaşını sinəsindən güllələyib.

Əmək təlimi dərsi zamanı müəllim, Bakı sakini 1966-cı il təvəllüdlü Hidayət Qurbanova məxsus Türkiyə istehsalı olan "Kral Air Rfle" markalı pnevmatik tüfəngdən istifadə zamanı şagird 2003-cü il təvəllüdlü Hacı Əliyev ehtiyatsızlıqdan atəş açaraq sinif yoldaşı olan həmyaşıdı Murad Nurzadəni sinəsindən güllələyib.

Yaralı M.Nurzadə xəstəxanaya yerləşdirilib. Həkimlərin səyi nəticəsində onun həyatını xilas etmək mümkün olub.

2015-ci ilin oktyabr ayında Türkiyədə kişilər tərəfindən 25 qadın öldürülüb, 15 qadına təcavüz edilib, 29 qadın isə yaralanıb.

"Dalğa TV" Bianet insan haqları qrupuna istinadən xəbər verir ki, Ötən ay ərzində bir uşaq və bir kişi də öldürülüb. Bundan əlavə, 3 qadının ölümü də hələ ki müəmmalı qalıb və qatilləri tapılmayıb.

2015-ci ilin ilk 10 ayında isə kişilər tərəfindən 236 qadın öldürülüb, 112 qadına təcavüz edilib, 157 qadın fahişəliyə vadar edilib, 319 qadın isə yaralanıb.

Ölümlərin əsas səbəbləri qadınların həyat yoldaşlarından boşanmaq istəmələri, qeyri-rəsmi nikahda yaşamaq təklifini rədd etmələri və qısqanclıq olub.

Cinayətlərin 55,5 faizi odlu silahla törədilib. 12 qadın tapança, 3 qadın tüfəng, 7-si bıçaq, 1-i boğularaq və 1-i isə boğazı kəsilərək öldürülüb.

Törətdikləri cinayətlərdən sonra qatillərin 3-ü intihar edib, biri intihara təşəbbüs göstərib.

"Bakı ilə Tiflisin qardaşlaşmasını nəzərdə tutan sənədləri hazırlayırıq. Hazırda Gürcüstanın Azərbaycandakı səfirliyi və Bakı şəhər meriyası arasında müvafiq danışıqlar aparılır. Biz danışıqların yekununu gözləyirik. Bundan sonra həmin sənədlər imzalanacaq".

"Dalğa TV"nin məlumatına görə, bunu Tiflis şəhərinin meri David Narmaniya deyib.

Onun sözlərinə görə, iki şəhər arasında müxtəlif layihələr, o cümlədən investisiya layihələri həyata keçiriləcək: "Qarşılıqlı turizm tədbirlərinə də geniş yer verəcəyik. Azərbaycandan Gürcüstana turist axını getdikcə genişlənir və bu bizi sevindirir. Bu sahənin inkişafı üçün dövlət və özəl sektor böyük işlər həyata keçirir".

D. Narmaniya azərbaycanlıların kompakt yaşadığı bölgələrdə də turizmin inkişaf etdiriləcəyini bildirib: "İlk öncə turizmin inkişafına təkan verəcək mədəni infrastrukturu genişləndirmək, sonra isə müxtəlif layihələri həyata keçirmək istəyirik".