Abşeron rayonunda 66 yaşlı müəllim özünü yaşadığı evdə asaraq intihar edib.

"Qafqazinfo" "Report"a istinadən xəbər verir ki, hadisə Xırdalan şəhəri, Quşçuluq Massivi döngə 6 ev 45-də qeydə alınıb.

Belə ki, 1950-ci il təvvəllüdlü Mirzəyeva Azelma Xamis qızı yaşadığı evdə özünü asaraq intihar edib.

Məlumata görə, A.Mirzəyevanın meyiti onun evinə fərdi təhsil almağa gələn şagirdləri tərəfindən aşkarlanıb.

Qeyd edək ki, A.Mirzəyeva 297 saylı orta məktəbdə 39 il İngilis dili müəllimi kimi fəaliyyət göstərib. Onun həyat yoldaşı 15 il bundan qabaq vəfat edib, övladı yoxdur.

297 saylı orta məktəbdən verilən məlumata görə, A.Mirzəyeva 2015-ci ildə təqaüdə çıxıb. O, 2002-ci ildə respublika üzrə "Ən yaxşı müəllim" 2-ci dərəcəli diplomu ilə seçilib.

Faktla bağlı araşdırmalara başlanılıb. Müəllimin intihar etməsinin səbəbləri araşdırılır.

Azərbaycan Dövlət Gömrük Komitəsinin və Gürcüstan Gəlir Xidmətinin nümayəndələri sərhəd keçid məntəqələrində (SKM) sanitariya və fitosanitariya yoxlamaları üçün risklərin idarə olunması və risk təhlilində Avropa standartlarının istifadəsinə dair ikitərəfli təlimdə iştirak ediblər.

BMT-nin Azərbaycandakı ofisindən "Report"a verilən məlumata görə, təlim "Azərbaycan və Gürcüstan arasında Qırmızı Körpü sərhəd-keçid məntəqəsinin inkişafına dəstək" layihəsi çərçivəsində baş tutub. Birgə layihə Birləşmiş Millətlər Təşkilatının İnkişaf Proqramı (UNDP) tərəfindən həyata keçirilir və Avropa İttifaqı tərəfindən maliyyələşdirilir.
Ümumilikdə, Azərbaycanın Tovuz, Astara, Xaçmaz, Balakən, Biləsuvar və Gürcüstanın Qardabani və Kazbegi SKM-lərini təmsil edən 25 nümayəndə Bakıda üçgünlük təlimdə iştirak edib.
Təlim çərçivəsində iştirakçılar sanitar və fitosanitar nəzarəti üzrə Dövlət Gömruk Komitəsinin iş prosedurunu öyrənmək üçün Azərbaycan Dövlət Gömrük Komitəsinin Mərkəzi Laboratoriyasına baş çəkiblər.
Layihənin ümumi məqsədi Gürcüstan və Azərbaycan arasında sərhəddən malların hərəkətinin asanlaşdırılmasına töhfə verməkdir. 

Gürcüstanda azərbaycanlıların yığcam yaşadıqları Marneuli rayonunda müasir tədris mərkəzi açılıb.

“Report”un Gürcüstan bürosu xəbər verir ki, bu rayonda yaşayan azərbaycanlıların təşəbbüsü ilə fəaliyyətə başlayan mərkəz soydaşlarımızın gürcü dilini öyrənmələrində və yerli ictimaiyyətə inteqrasiyasında mühüm rol oynayacaq.

Mərkəzin açılış mərasimində Kvemo-Kartli bölgəsinin qubernatoru Paata Xizanişvili, Marneuli Rayon İcra Hakimiyyətinin başçısı Merab Topçişvili, Gürcüstan parlamentinin deputatları Ruslan Hacıyev və Tamaz Naveriani, rayon bələdiyyəsinin sədri Nəbi Abdullayev, barış və inteqrasiya məsələləri üzrə dövlət nazirinin müşaviri Zaur Darğalı, Azərbaycanın bu ölkədəki səfirliyinin humanitar və mədəniyyət məsələləri üzrə müşaviri Samirə Ağayeva iştirak ediblər.

Paata Xizanişvili Marneulidə yaşayan milli azlıqların gürcü dilini öyrənmələrində bu mərkəzin müstəsna roy oynayacağını bildirib və mərkəzin azərbaycanlıların təşəbbüsü ilə açılmasını nümunəvi addım kimi qiymətləndirib.

Merab Topçişvili deyib ki, mərkəz xalqlarımız arasında dostluq əlaqələrini daha da möhkəmləndirəcək.

Samirə Ağayeva mərkəzin açılışını “Bilik günü” adlandırıb, uşaqların və yeniyetmələrin müasir standartalara uyğun metodlarla təhsil alacaqlarına inamını ifadə edib.

Digər natiqlər də mərkəzin fəaliyyətə başlamasını əlamətdar hadisə adlandırıb, yeniyetmə və gənclərin asudə vaxtlarının səmərəli təşkilində xüsusi əhəmiyyət kəsb etdiyini vurğulayıblar. 

Qeyd edək ki, Qrinviç Təhsil Mərkəzi ilk dəfə Gəncə şəhərində fəaliyyətə başlayıb. Hazırda mərkəzin Gəncə və Bakı şəhərində ofisləri fəaliyyət göstərir. 

Xarici dövlətin səlahiyyətli orqanı tərəfindən verilmiş sürücülük vəsiqəsinə malik Azərbaycan vətəndaşları ölkə ərazisinə daxil olduğu vaxtdan bir aydan artıq müddətdə burada nəqliyyat vasitələrini idarə etmək niyyətində olarsa, əcnəbilər isə Azərbaycanda müvəqqəti və ya daimi yaşamaq üçün icazə alarsa, sürücülük vəsiqələri imtahansız müvafiq icra hakimiyyəti orqanı tərəfindən 30 dəqiqə ərzində dəyişdiriləcək.

APA-nın məlumatına görə, bu, Azərbaycan prezidenti İlham Əliyevin 18 noyabr 2016-cı il tarixli sərəncamı ilə qüvvəyə minən “Yol hərəkəti haqqında” Azərbaycan Respublikasının Qanununda dəyişikliklər edilməsi barədə” 2016-cı il 11 noyabr tarixli qanunda əksini tapıb.

Qanuna edilən əlavəyə əsasən, Azərbaycan vətəndaşı yol hərəkətinin tənzimlənməsi sahəsində Azərbaycanın tərəfdar çıxdığı beynəlxalq müqavilələrə uyğun olaraq xarici dövlətin səlahiyyətli orqanı tərəfindən verilmiş və etibarlıq müddəti qurtarmamış sürücülük vəsiqəsi əsasında Azərbaycan ərazisində nəqliyyat vasitələrini ölkə ərazisinə daxil olduğu gündən bir ay ərzində idarə etmək hüququna malikdir. Azərbaycan vətəndaşı ölkə ərazisində nəqliyyat vasitələrini həmin müddətdən artıq idarə etmək üçün sürücülük vəsiqəsini dəyişdirməlidir. Bu halda Azərbaycan vətəndaşları sürücülük vəsiqəsi dəyişdirərkən tətbiq edilən prosedur eyni ilə tətbiq olunacaq. Yəni, sürücülük vəsiqəsinin dəyişdirilməsi sahibinin ərizəsi əsasında əvvəllər malik olduğu bütün kateqoriyalar saxlanılmaqla, imtahansız Azərbaycanın müvafiq icra hakimiyyəti orqanı tərəfindən 30 dəqiqə ərzində həyata keçiriləcək.

Xarici dövlətin səlahiyyətli orqanı tərəfindən verilmiş və etibarlıq müddəti qurtarmamış sürücülük vəsiqəsi olan Azərbaycan vətəndaşı sürücülük vəsiqəsinin dəyişdirilməsi üçün şəxsiyyət vəsiqəsi, sürücülük vəsiqəsi, qanunla müəyyən edilmiş dövlət rüsumunun ödənilməsi barədə sənəd təqdim etməlidir. Müvafiq olaraq 60 və daha çox yaşı olan şəxslər üçün, 70 və daha çox yaşı olan şəxslər üçün, siyahısı Azərbaycan Respublikasının müvafiq icra hakimiyyəti orqanı tərəfindən müəyyən edilən xəstəlikləri olan şəxslər üçün isə tibbi arayış da tələb olunacaq.

Qanuna edilən digər əlavəyə əsasən, Azərbaycanda müvəqqəti olan əcnəbi və ya vətəndaşlığı olmayan şəxs yol hərəkətinin tənzimlənməsi sahəsində Azərbaycanın tərəfdar çıxdığı beynəlxalq müqavilələrə uyğun olaraq xarici dövlətin səlahiyyətli orqanı tərəfindən verilmiş və etibarlıq müddəti qurtarmamış sürücülük vəsiqəsi əsasında Azərbaycan ərazisində nəqliyyat vasitələrini idarə etmək hüququna malikdir. Əcnəbi və ya vətəndaşlığı olmayan şəxs Azərbaycanda müvəqqəti və ya daimi yaşamaq üçün icazə aldıqda, ölkə ərazisində nəqliyyat vasitələrini idarə etmək üçün sürücülük vəsiqəsini həmin icazəni aldığı gündən bir ay müddətində eyni qaydada dəyişdirməlidir.

Həm Azərbaycan vətəndaşları, həm də əcnəbilər bu hallarda sürücülük vəsiqələrini dəyişdirdikdə, xarici dövlətin səlahiyyətli orqanı tərəfindən verilmiş sürücülük vəsiqəsi yeni sürücülük vəsiqəsi ilə birlikdə həmin şəxsə qaytarılacaq.

Ötən ay Gürcüstandan Azərbaycana müxtəlif elektron pulköçürmə sistemləri ilə 906,6 min dollar pul köçürülüb.

“APA-Economics” Gürcüstan Milli Bankına istinadən xəbər verir ki, bu, 2015-ci ilin oktyabr ayı ilə müqayisədə 390,9 min dollar və ya 75,8% çoxdur. Sentyabr ayı ilə müqayisədə oktyabr ayında Gürcüstandan ölkəmizə pul axını 350,5 min dollar və ya 63,03% artıb.

Ümumiyyətlə, hazırda bu ölkədən Azərbaycana köçürülən pulun Gürcüstandan xaricə köçürülmüş pul vəsaitlərində xüsusi çəkisi 5,09%-ə bərabərdir.

Ötən ay Azərbaycandan Gürcüstana 1 225 min dollar pul göndərilib ki, bu da 2015-ci ilin oktyabr ayına nisbətən 115,6 min dollar və ya 8,62% azdır. Bu ilin sentyabr ayı ilə oktyabr ayını müqayisə edəndə məlum olur ki, ötən ay Azərbaycandan Gürcüstana pulköçürmələrin həcmi 128,5 min dollar və ya 11,72% artıb.

Ümumiyyətlə, bu ilin 10 ayının nəticələrinə görə, Azərbaycandan bu ölkəyə köçürülən vəsait ümumi pul köçürməsinin 1,2%-ni təşkil edib.  

İsmayıllı rayonunda ana və qızı arasında baş verən dava qanla nəticələnib.

APA-nın yerli bürosunun xəbərinə görə dəhşətli hadisə bu gün səhər saatlarında rayonun Qalacıq kəndində qeydə alınıb.

Kənd sakini, 1993-cü il təvəllüdlü Həmzəyeva Gülzadə Callad qızı ailə münaqişəsi zəminində anası 1954-cü il təvəllüdlü Həmzəyeva Şükufə Polad qızını döyərək ona bədən xəsarətləri yetirib. Ana qızın əlindən çıxaraq küçəyə qaçıb və qonşulardan kömək istəyərkən Gülzadə Həmzəyeva onun arxasınca küçəyə çıxıb və anasını yenidən döyərək onu evin yanından keçən Qalacıq çayına atıb. Anasını itələyərək çaya aşıran qız onu köməksiz vəziyyətdə qoyaraq evə qayıdıb. Təxminən 5-6 metr hündürlükdən daşlı və kol-koslu çay yatağına yıxılan 62 yaşlı qadını ölümdən qonşular xilas edib. Baş və bədənin müxtəlif nahiyələrindən əzik, çapıq və sınıq xəsarətləri alan Şükufə Həmzəyeva təcili olaraq İsmayıllı rayon Mərkəzi Xəstəxanasına çatdırılıb.

Qalacıq bələdiyyəsindən APA-ya verilən məlumata görə 23 yaşlı Gülzadə Həmzəyeva ruhi xəstədir, dayısının dəstəyi ilə Bakıda müalicə olsunsa da, faydası olmayıb. Birgə yaşadığı anası ilə uzun müddətdir ki, yola getmir, tez-tez onunla dava edərək onu döyür. Onların ayrı yaşaması üçün kənd rəhbərliyi tərəfindən evin həyətinə vaqon da qoyulub, lakin qız anasını bir neçə dəfə öldürməyə cəhd edib. 

Faktla bağlı hüquq-mühafizə orqanları tərəfindən araşdırma aparılır.