Xaricdə yaşayan azərbaycanlıların ölkəyə gəlmələrinə şərait yaratmaq üçün dövlət tərəfindən sosial turizm layihələri həyata keçiriləcək. 

Milli Məclisdən Trend-ə verilən məlumata görə, bu, yeni hazırlanan "Turizm haqqında" qanun layihəsində nəzərdə tutulub.

Sosial turizm üzrə xərclər isə dövlət büdcəsi, eləcə də yerli, bələdiyyə büdcələri hesabına, habelə könüllülük əsasında öz işçiləri və ya digər şəxslərin xeyrinə sosial turları maliyyələşdirən fərdi sahibkarın, hüquqi şəxsin və ya digər təşkilatın hesabına həyata keçirilir.

Layihədə qeyd edilir ki, dövlət tərəfindən dövlət qulluqçularının xeyrinə sosial turizmin maliyyələşdirilməsi halları, həcmi və bu maliyyələşdirmə əhatə olunan dövlət qulluqçularının dairəsi müvafiq icra hakimiyyəti orqanı tərəfindən müəyyən edilir.

Sosial turizmlə bağlı reklam sosial reklam hesab olunacaq.

“Ağsu rayon Mərkəzi Xəstəxanasına verilən elektrik enerjisi borca görə kəsilib”.

“Qafqazinfo” xəbər verir ki, bu barədə Report-a “Azərişıq” ASC-dən bildirilib.

Qurumdan əlavə olunub ki, istehlak olunan enerjinin haqqı ödənilməlidir: “Üç ay ərzində Ağsu rayon Mərkəzi Xəstəxanasına elektrik enerjisinə olan borcları ilə bağlı xəbərdarlıq olunub. Buna baxmayaraq, bir manat da borc ödənilməyib. Bu borc xəstəxananın sayğac göstəricisi əsasında hesablanıb. Elektrik enerjisinin bərpa olunması üçün borc ödənilməlidir”.

Qeyd edək ki, Ağsu rayon Mərkəzi Xəstəxanasına verilən elektrik enerjisi kəsilib. Baş həkim Şəhrəbanu Məlikova bildirib ki, hazırda xəstəxanada 22 dializ xəstəsi, əməliyyat olunmalı xəstələr, habelə küvezdə yeni doğulmuş körpə var.

Hacıqabulda bir müddət əvvəl qızı tərəfindən döyülən 52 yaşlı qadın ölüb.

“Qafqazinfo”nun APA-ya istinadən məlumatına görə, Hacıqabul rayonu Meyniman kənd sakini, 1964-cü il təvəllüdlü Təranə Ağasəlim qızı Babayeva bir müddət əvvəl 17 yaşlı qızı Ağacanlı Səadət Səxavət qızı tərəfindən döyülərək ağır xəsarətlər alıb.

T. Babayevanın aldığı xəsarətlərdən ötən gecə qardaşının evində öldüyü qeyd edilir. Hazırda meyit müayinə edilmək üçün Şirvan Məhkəmə Tibbi Ekspertiza və Patoloji Anatomiya mərkəzinə yerləşdirilib.

Ölən qadının qardaşı Günəş Həsənov iddia edir ki, bacısı qızı tərəfindən döyülmə nəticəsində ölüb. Hadisənin təfərrüatları barədə əlavə məlumat veriləcək.

Faktla bağlı Hacıqabul rayon prokurorluğu tərəfindən araşdırma aparılır.

Bərdə rayonunda ər arvadına dözülməz işgəncələr verib. 

Musavat.com xəbər verir ki, hadisə rayonun Ləmbəran kəndində qeydə alınıb. İki uşaq anası olan 23 yaşlı qadın əri tərəfindən verilən işgəncələrdən sonra ata evinin qapısının önünə atılıb. 1993-cü il təvəllüdlü Məmmədova Məsmə Hafiz qızı naməlum səbəbdən əri tərəfindən od götürmək üçün olan maşa ilə döyülüb. Daha sonra əri samovardakı qaynar suyu M.Məmmədovanın üstünə töküb.

Bununla ürəyi soyumayan ər həyat yoldaşının başını balta ilə kəsmək istəyib. Ancaq qonşuların müdaxiləsi ilə bunun qarşısı alınıb.

Bütün bunlardan sonra M.Məmmədova körpə uşağının biri ilə Bakıya gətirilib. Onu Binəqədi rayonunun Çiçək qəsəbəsində yerləşən ata evinin qapısına atıblar. Ağır xəsarətlər alan qadının yaxınları onu xəstəxanaya huşsuz halda çatdırıblar.

Faktla bağlı Bərdə Rayon Polis Şöbəsində araşdırma aparılır. Cinayət işi başlanılıb.

Gürcüstanda azərbaycanlıların kompakt yaşadığı Marneuli şəhərində ölüm hadisəsi baş verib.

APA-nın Gürcüstan bürosunun məlumatına görə, hadisə Marneulinin mərkəzi bazarında qeydə alınıb. Şəhidlər bildirir ki, səhər saatlarında svan (gürcüdilli xalq) olduğu güman edilən gənclə bazarda çalışan 50 yaşlı azərbaycanlı, Marneuli şəhər sakini Məlahət Məmmədova arasında mübahisə baş verib. Mübahisə zamanı həmin gəncin M. Məmmədovaya qarşı güc tətbiq etdiyi, nəticədə yerə yıxılan qadının başından zərbə alaraq öldüyü deyilir.

Lakin Gürcüstan Daxili İşlər Nazirliyi hadisəni qətl kimi xarakterizə etməyib. Nazirlik M. Məmmədovanın halının qəflətən pisləşdiyini və onun dünyasını dəyişdiyini açıqlayıb. Faktla bağlı Gürcüstan CM-nin 116-cı maddəsi ilə (ehtiyatsızlıqdan adam öldürmə) cinayət işi qaldırılıb.

Bu gün azərbaycanlıların kompakt yaşadığı Gürcüstanın Marneuli rayonunda fəaliyyət göstərən Mülki Məşğulluq Mərkəzində azərbaycanlı rejissor İmam Həsənovun “Müqəddəs inək” sənədli filmi nümayiş olunub. APA-nın Gürcüstan bürosunun məlumatına görə, film İsmayıllı rayonunun Lahıc qəsəbəsində 2012-2015 illərdə çəkilib. Filmin süjetinə görə, maldarlığı inkişaf etdirmək məqsədi ilə kəndə Avropadan inəklər gətirmək planı yerli sakinlərinin narahatlığına səbəb olur. Kənddə yeniliklə köhnəlik arasında qarşıdurma yaranır. Kənd ağsaqqalları hesab edirlər ki, əcnəbi inəyin südündə kimyəvi maddələr çoxdur və buna görə də təhlükəlidir. Filmdə kənd icmasının adət-ənənələrinə sadiq qaldığı və yeniliyə hazır olmadıqları göstərilir. Sonda kənd sakinləri yeniliklə razılaşırlar.

Filmin rejissoru İmam Həsənov APA-ya açıqlamasında “Müqəddəs inək” filminin Azərbaycan, Almaniya, Rumıniya və Qatar ölkələrinin dəstəyi ilə çəkildiyini bildirib: “Film Meksikada, Los Ancelesdə, Tiflisdə oktyabr ayında keçirilən “Sinedok” filmlər festivalında və Koreyada nümayiş olunub. Film alman, ingilis, portuqal və gürcü dillərində səsləndirilib və Los Ancelesdə üç mükafata layiq görülüb. “Yarat” yaradıcılıq mərkəzində, Gəncə, Şəki, Mingəçevir, Telavinin gürcü və azərbaycanlılar yaşayan Qaracalar kəndində də nümayiş etdirmişik. Biz filmi nümayiş etdirməkdə yaratdığımız filmin hamı tərəfindən necə qarşılanmağını öyrənməyə çalışırıq,” deyə rejissor bildirib.

Rejissor gələcəkdə Almaniyanın dəstəyi ilə Azərbaycan əfsanəsindən bəhs edən “Səbət” adlı bədii film çəkəcəyini qeyd edib.