Bu gün Gəncədə yolu keçən piyadanı avtomobil vurub.

APA-nın Qərb bürosunun məlumatına görə, hadisə şəhərin Şah İsmayıl prospektində qeydə alınıb.

Goranboy rayon sakini 1958-ci il təvəllüdlü Bayram Mustafayev “QAZ–3129” markalı avtomobilə hərəkətdə olarkən yolu keçmək istəyən şəhər sakini 1954-cü il təvəllüdlü Xumar Quluzadəni vurub. Sürücü müxtəlif bədən xəsarətləri alan qadını dərhal xəstəxanaya çatdırıb. Piyadaya sağ bazunun çıxığı və sol dizin sıyrığı diaqnozu qoyulub. Qadının vəziyyəti orta-ağırdır.

Faktla bağlı Gəncə şəhər Baş Polis İdarəsində araşdırma aparılır

Gürcüstanda azərbaycanlıların kompakt yaşadıqları Qardabani rayonunda Gürcüstan Elm və Təhsil Nazirliyinin, Qardabani rayon İcra Hakimiyyətinin və rayon bələdiyyəsinin dəstəyi və “Gürcüstanda Azərbaycanlı Müəllimlər İttifaqı”nın təşəbbüsü və təşkilatçılığı  ilə Azərbaycan dilli məktəb şagirdləri arasında bilik yarışı  keçirilib. APA-nın Gürcüstan bürosunun məlumatına görə,  yarışda 10 məktəbin, (Qardabani 3 nömrəli, Vaxtanqisi, Candar, Nəzərli, Kosalı, Kalinino, Ağtəhlə, Qaracalar, Qaratəhlə və  Muğanlı kənd orta məktəblərinin) VIII, IX, X və XI siniflərində oxuyan 40-dan çox azərbaycanlı şagird iştirak edib. Yarışda şagirdlər ümumi fənlər üzrə (Gürcü-dili, Azərbaycan dili, ədəbiyyat, İngilis dili, tarix, riyaziyyat, coğrafiya, biologiya, kimiya, fizika) 10 sualı cavablandırıblar. Qeyd edək ki,  müsabiqədə iştirakçılara verilən sualları cavablandırmaq üçün 30 dəqiqə vaxt verilib. Suallar arasında Azərbaycan dili və Ədəbiyyat fənninə geniş yer verilib.

Bilik yarışında Kosalı məktəbinin VIII sinif şagirdi şagirdi Musa Musayev, Nəzərli İçtimai məktəbinin  IX sinif şagirdi Almaz Məmmədov, Nəzərli İçtimai məktəbinin X sinif şagirdi Məhəbbət Həsənov, Qardabani 3 saylı İctimai məktəbin XI sinif şagirdi Tükəzban İsgəndərova qalib gəliblər.

Qaliblərə “Gürcüstanda Azərbaycanlı Müəllimlər İttifaqı” tərəfindən xüsusi diplom və  hədiyyələr təqdim edilib. Hədiyyələrin təqdimat mərasimində Qardabani rayon icra başçısının müavini Dünyamalı Hacıyev, bələdiyyə sədrinin müavini Rəfi Orucov, professor Mahmud Hacıxəlilov, məktəb direktorları, müəllimlər, ziyalılar və valideynlər iştirak ediblər.

“Gürcüstanda Azərbaycanlı Müəllimlər İttfaqı”nın sədri Səadət Zeynalova APA-ya açıqlamasında bilik yarışlarının yaxın vaxtlarda azərbaycanlıların kompakt yaşadığı Marneuli, Bolnisi, Dmanisi rayonlarında da keçiriləcəyini bildirib. O, yarışların keçirilməsində əsas məqsədin azərbaycanlı şagirdlərin bilikli və savadlı olmasını yoxlamaq və onları gələcəkdə arzuladıqları ali məktəblərə hazırlaşdırmaq olduğunu qeyd edib.

Şəmkirdə ölümlə nəticələnən avtomobil qəzası baş verib.

APA-nın qərb bürosunun verdiyi məlumata görə, hadisə rayonun Seyfəli kəndi ərazisində qeydə alınıb.

Rayon sakini, 1962-ci il təvəllüdlü Fəxrəddin Abbasovun idarə etdiyi “VAZ 21011” markalı avtomobil kanala aşıb. Hadisə zamanı sürücü ölüb.

Hadisə yerinə Şəmkir Yanğından Mühafizə Hissəsinin xilasediciləri cəlb edilib, avtomobil və sürücünün meyiti sudan çıxarılıb.

Faktla bağlı araşdırma aparılır.

“Azneft” İstehsalat Birliyinin N.Nərimanov adına Neft Qaz Çıxarma İdarəsinin 3 saylı Neft Yığım Məntəqəsinin estakadasının uçduğu ərazinin yaxınlığında naməlum kişi meyiti aşkar edilib.

Axtarış-Xilasetmə Qərargahından APA-ya verilən məlumata görə, meyitin itkin düşən neftçilərə aid olub-olmaması müəyyənləşdirilir.

Meyitin şəxsiyyəti müəyyənləşdirildikdən sonra ictimaiyyətə ətraflı məlumat veriləcək.

Qeyd edək ki, Azərbaycan prezidentinin “Azərbaycan Respublikası Dövlət Neft Şirkətinin “Azneft” İstehsalat Birliyinin Neft yığım məntəqəsində baş vermiş hadisə ilə əlaqədar bəzi tədbirlər haqqında” 16 dekabr 2016-cı il tarixli sərəncamına əsasən Dövlət Dəniz Administrasiyasının Gəmilərin Hərəkətinin İdarəolunması Milli Mərkəzində Fövqəladə Hallar Nazirliyi, Müdafiə Nazirliyi, Dövlət Sərhəd Xidməti, Dövlət Dəniz Administrasiyası, SOCAR və Azərbaycan Xəzər Dəniz Gəmiçiliyi QSC-nin aparıcı mütəxəssislərindən ibarət yaradılan Qərargah tərəfindən təsdiq edilən plana uyğun olaraq, müəyyən edilən sektorlar üzrə axtarış-xilasetmə əməliyyatları davam etdirilir.

Tovuz rayon sakini boğazına kəsici alətlə xəsarət yetirib. APA-nın qərb bürosunun verdiyi məlumata görə, rayon sakini 1978-ci il təvəllüdlü Samir Məmmədov sərxoş vəziyyətdə boğazını kəsici alətlə kəsib. O dərhal Tovuz rayon Mərkəzi Xəstəxanaya yerləşdirilib. Vəziyyətinin orta ağır olduğu bildirilir.

Faktla bağlı hüquq-mühafizə orqanları tərəfindən araşdırma aparılır.

Bu gün Bakı Ağır Cinayətlər Məhkəməsində adam oğurluğunda təqsirləndirilən Zamiq Xasıyev, Aqil Şəmiyev və Ruslan Əliyevin cinayət işi üzrə məhkəmə prosesi başa çatıb.

APA-nın xəbərinə görə, hakim Mail Bayramovun sədrliyi ilə keçirilən prosesdə hökm oxunub.

Hökmə əsasən, Ruslan Əliyev 14 il 6 ay, Zamiq Xasıyev və Aqil Şəmiyevin hər biri isə 12 il müddətinə azadlıqdan məhrum ediliblər.

Qeyd edək ki, Abşeron rayonunun Xırdalan şəhərində yerləşən “Karat MMC”-nin Dəyirman şöbəsinin ofisindən 1 milyon manat məbləğində pul oğurlanması ilə bağlı keçirilmiş əməliyyat-istintaq tədbirləri ilə Qobu qəsəbə sakini, 28 yaşlı Ramil İmaməliyev saxlanılıb. İstintaqla müəyyən olunub ki, əvvəllər “Karat MMC”-də çalışan Ramil İmaməliyev işdən çıxdıqdan sonra ofisdən oğurluq etmək fikrinə düşüb. O, şirkətin ofisindəki seyfdə külli miqdarda pul olduğunu qabaqcadan bilib. 2014-cü il aprelin 11-də gecə saatlarında ofisin binasına gələn Ramil İmaməliyev dam örtüyünü sökərək içəri daxil olub. O, ofisdəki seyfin qapısını sındıraraq 1 milyon manat pulu idman çantasına dolduraraq gedib.

Oğurluq pulları Qobu qəsəbəsində yaşadığı evə gətirən Ramil İmaməliyev bu barədə qardaşı Ramiz İmaməliyev və anası Ceyran İmaməliyevaya məlumat verib. Onlar pulun əsas hissəsini evin müxtəlif yerlərində gizlədiblər. Ramil İmaməliyev pulun bir hissəsini özü ilə götürərək “İnfiniti” markalı, 90 HZ 200 dövlət nömrə nişanlı avtomobil alıb. Saxlanılarkən maşının yük yerindən 5000 manat, Qobu qəsəbəsindəki evdən isə 31 min 338 manat pul aşkarlanaraq götürülüb.

Ramil İmaməliyev istintaqa ifadəsində bildirib ki, oğurladığı pulların demək olar ki, yarısını bir qrup şəxs hədə-qorxu gələrək onun əlindən zorla alıb. Əməliyyat axtarış tədbirlərini davam etdirən polis əməkdaşları bu cinayətdə şübhəli bilinən 4 nəfəri - Kürdəmir rayon sakini, 35 yaşlı Aqil Şəmiyevi, Qobustan rayon sakini, 31 yaşlı Zamiq Xasıyevi, Beyləqan rayon sakinləri, 30 yaşlı Röyal Qədirovu və 32 yaşlı Ruslan Əliyevi də saxlayıb.

Araşdırmalarla müəyyən edilib ki, həmin şəxslər R. İmaməliyevi izləyərək Bakıda yerləşən restoranlardan birinin qarşısında başına torba keçirib, zorla avtomobilə oturdublar. Onlar özlərini hüquq-mühafizə orqanlarının əməkdaşları kimi təqdim edərək 450 min manat pul tələb ediblər.

Ramil İmaməliyev girovluqdan azad olmaq üçün anasına zəng edərək 400 min manatı göndərməyi tapşırıb. Anası Ceyran İmaməliyeva isə pulu kiçik oğlu Ramizə verib və deyilən yerə göndərib. Ramiz İmaməliyev 450 min manatı təqdim etdikdən sonra Ramil sərbəst buraxılıb.

Əldə olunan pul saxlanılan şəxslər arasına bölüşdürülüb. Əməliyyat istintaq tədbirləri zamanı pulun 20 min manatı Zamiq Xasıyevlə Aqil Şəmiyevdən, 98 min manatı isə Ruslan Əliyevdən götürülüb. Eləcə də İmaməliyevlərin evində axtarış aparılarkən gizlədilmiş 6600 manat və 800 ABŞ dolları tapılıb. Ramiz İmaməliyev daha sonra etiraf edib ki, qardaşı tutulmazdan bir neçə gün əvvəl ona və anasına zəng edərək, oğurluq pulların 200 min manatını qəbiristanlıqda gizlətməyi tapşırıb. Ramiz İmaməliyev həmin pulu sellofan torbaya bükərək nənəsinin Qobu qəsəbə qəbiristanlığındakı qəbrinin yanında basdırıb. Polis əməkdaşları deyilən əraziyə baxış keçirərkən 190 800 manat pulu taparaq istintaqa təhvil veriblər.