Günün ikinci intihar hadisəsi Şirvan şəhərində qeydə alınıb.

Hüquq-mühafizə orqanlarından verilən məlumata görə, Şirvan şəhəri Səməd bəy Mehmandarov küçəsi, ev 16 ünvanında yaşayan 1973-cü il təvəllüdlü Səfayət Malik oğlu Ağayev özünü yaşadığı evin həyətindəki yardımçı tikilidən asaraq intihar edib. 43 yaşlı kişinin asılmış meyitini onun həyat yoldaşı tapıb.

Məlumata görə, S.Ağayev intihardan əvvəl məktub yazıb və məktubunda işsizliyini, çoxlu borcunun olmasını, buna görə də belə bir addım atdığını qeyd edib.
Özünü asan kişi ailəlidir və uzun müddətdir işsiz imiş.

Faktla bağlı Şirvan şəhər Prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanılıb, araşdırmalar davam etdirilir.

Bu, borca görə baş verən ilk hal deyil. Belə ki, ancaq ötən gün iki belə hadisə olub. Bakıda borca görə intihar qeydə alınıb. Xəzər rayonunun Binə qəsəbəsində yaşayan qəsəbə sakini 1977-ci il təvəllüdlü Aynur Cəfər qızı Xancanova özünü yaşadığı evin həyətindəki yardımçı tikilidən asaraq intihar edib.
Canına qəsd edən qadının iki övladı məktəbdə dərsdə, əri isə işdə olub. 39 yaşlı qadının intihar etməsinə səbəb olaraq onun ailəsinin böyük miqdarda borcu olması göstərilir.

Ağcabədi rayonunda da intihara cəhd baş verib. Şəhər sakini, 1964-cü il təvəllüdlü Zərnişan Şəfayət qızı Ələkbərova yaşadığı evin həyətində üzərinə yanacaq tökərək özünü yandırıb.

52 yaşlı qadının özünü yandırmasına ilkin ehtimal olaraq onun ailə üzvlərinin külli miqdarda borcu olduğu göstərilir.

Azərbaycanlıların kompakt yaşadığı Gürcüstanın Marneuli rayonunun Lecbəddin kəndində etiraz aksiyası keçirilib.

"Dalğa TV"nin məlumatına görə, kənd sakinləri uzun illər Gürcüstanda yaşayan azərbaycanlı vətəndaşların soyadlarının Ədliyyə Evlərində fəaliyyət göstərən torpaq və reyestr xidmətində səhv yazıldığına etiraz ediblər. Aksiya iştirakçılarının sözlərinə görə, Gürcüstanda yaşayan azərbaycanlılar xarici pasport, şəhadətnamə, ev sənədləri alan zaman sənədin surətinin təqdim olunmasına baxmayaraq, sözlərin yazılış qaydalarına düzgün əməl olunmadığını bildiriblər. Aksiyada həmçinin qeyd edilib ki, sovet dönəmindən yazılan sənədlərdə qeyd edilən h, q, d, s və digər hərflər gürcü və ingilis dillərinə köçürüləndə sənədin əsli ilə uyğun gəlmir, bu da gələcəkdə soydaşlarımıza problemlər yaşadır. Nəticədə onlar sənəddə düzəliş etmək üçün vəkil tutaraq məhkəməyə müraciət edir və aylarla vaxt itirirlər. Tədbirdə vurğulanıb ki, pensiyaya çıxan ahıl yaşlı kişi və qadınlar da bəzən bu problemlərlə rastlaşır və pensiyalarını vaxtında ala bilmirlər.

Soydaşlarımız hazırda digər bir problemlə də rastlaşdıqlarını bildiriblər: "Biz hazırda evlərimizə qaz çəkdirmək istəyən zaman dövlət torpaq və reyestr xidmətindən lazım olan sənədləri ala bilmirik. Bizi süründürür və dəfələrlə bu və ya digər təşkilatlardan sənəd gətirməyimiz tələb olunur, həmçinin xəritələrimiz səhv çəkilir və sonda artıq pul xərcləməyimiz lazım olur, evlərimizin sənədlərinin bərpası isə aylarla uzanır. Hazırda qış ayıdır və hələ də evlərimizin sənədləri düzəlməyib və evlərimizə qaz çəkilməyi gecikir".

Etiraz aksiyası iştirakçılarının problemlərini dinləyən Gürcüstan parlamentinin deputatı Mahir Dərziyev problemlə bağlı Gürcüstanın Ədliyyə Naziri Tea Tsulukyaniyə müraciət etdiyini bildirib: "Yaxın günlərdə soydaşlarımızın sənədlərinin bərpası məsələləri öz həllini tapacaq.

Ədliyyə nazirliyində adların bərpası məsələsi ilə əlaqədar komissiya yaradılıb və müəyyən bir sənəddə bir hərf də səhv gedibsə, onun düzəldilməsi tez bir zamanda yerində həll olunacaq", - deyə deputat vurğulayıb.

Mahir Dərziyev sovet dönəmində soydaşlarımızın pasportlarında yazılan soyadlarının sonundakı "ov" hərflərinin də "lı" , "li" hərfləri ilə əvəz ediləcəyini bildirib: "Bu məsələni də həll etmək üçün işçi qrupu yaradılıb", deyə M. Dərziyev qeyd edib.

Bakıda maraqlı sosial eksperiment keçirilib.

Özünü görmə qabiliyyəti zəif olan şəxs qismində təqdim edən adam küçədə insanlara yaxınlaşır.

O, əlindəki 50 manatı insanlara bir-bir uzadaraq, "5 manatı xırdalayın" deyə, xahiş edir.

Vətəndaşların əksəriyyəti ona əlindəki pulun 5 deyil, 50 manat olduğunu bildirir. Həmin videonu təqdim edirik:

Türkiyənin Düzcə bölgəsində başı kəsilən üç azərbaycanlı Gürcüstanın azərbaycanlıların kompakt yaşadığı Marneuli rayon sakinləridir.

"Dalğa TV"nin məlumatına görə, iki bacı - 56 yaşlı Emma və 46 yaşlı Elnaz Şərifovaları, həmçinin onlardan birinin 19 yaşlı nəvəsi Sahib Şərifovun cəsədləri yaxın günlərdə Marneuliyə gətiriləcək.

Hazırda öldürülən şəxslər haqqında Marneulidə də müxtəlif versiyalar dolaşmaqdadır. Sahib Şərifovun atasının məlumatına görə, onun oğlu Türkiyədə kababçı işləyib. O, hadisə haqqında məlumatlı olmadığını bildirib: "Marneulidə müxtəlif versiyalar yayılıb. Onların təbii qazdan zəhərləndikləri və onların öldürüldüyü barədə xəbərlər var".

Məlumata görə, ölən Marneuli sakinləri hazırda ekspertizadan keçirilir və sonra onlar Marneuliyə göndəriləcəklər.

Xəbər verildiyi kimi, Türkiyənin Düzcə bölgəsində Gürcüstan vətəndaşı olan üç azərbaycanlı evdə boğazı kəsilmiş vəziyyətdə tapılıb.

APA-nın "Haber Gazete"yə istinadən verdiyi məlumata görə, hadisə yerinə gələn polis cinayətin 2-3 gün əvvəl baş verdiyini təsbit edib. Ölənlərdən 2-si qadın, biri uşaqdır.

Meyitləri evə gələn 56 yaşlı Ema Şərifovanın keçmiş həyat yoldaşı Sərvət Öztürk aşkar edib və polisə zəng vurub. Ölən digər şəxslərin Ema Şərifovanın bacısı, 46 yaşlı Elnaz Şərifova və nəvəsi Sahib Şərifov olduğu məlum olub.

Faktla bağlı araşdırmalara başlanılıb.

Gürcüstanda daha iki nəfər H1N1 ("donuz qripi") virusundan ölüb.

"Dalğa TV"nin məlumatına görə, bu barədə Gürcüstanın Xəstəliklərə Nəzarət və İctimai Səhiyyə Milli Mərkəzindən bildirilib.

Bildirilib ki, 2016-cı ilin yanvar ayının əvvəlindən indiyədək 5 nəfər "donuz qripi"ndən və bir nəfər H3N2 virusundan dünyasını dəyişib.

Xəstəliklərə Nəzarət və İctimai Səhiyyə Milli Mərkəzi Gürcüstanda adı çəkilən xəstəliyin yayılması səbəbindən bütün tibb müəssisələrinin və təcili yardım xidmətinin gücləndirilmiş iş rejiminə keçdiyini bildirib.

Gürcüstanda qoyunlar arasında "Göydil" virusu yayılıb.

"Dalğa TV"nin Gürcüstan mətbuatına istinadən verdiyi məlumata görə, Ümumdünya Heyvanların Sağlamlığı Mühafizə Təşkilatı Gürcüstan ərazisində beş virus ocağının aşkarlandığını açıqlayıb.

Gürcüstan kənd təsərrüfatı nazirinin müavini və ölkənin baş baytarı Mixail Soxadze virusun yayıldığını təsdiqləyib. Qoyunların virusa yoluxması halları paytaxt Tiflis yaxınlarında qeydə alınıb. Ümumilikdə, 2190 qoyunun “Göydil” virusuna yoluxduğu ehtimal edilir, artıq 68 qoyunun bu virusa yoluxduğu təsdiqlənib. 35 mal-qaranın da virusa yoluxması ilə bağlı şübhələr var, hazırda yoxlama aparılır.

Qeyd edək ki, Gürcüstanın qoyun ixracında birinci yeri Azərbaycan (86 faiz) tutur. İkinci yerdə isə İordaniyadır.