"Hər kəsi Milad Bayramı münasibəti ilə təbrik etmək istəyirəm. Sülh, sağlamlıq, gələcəyə inam diləmək istəyirəm", – Gürcüstan baş naziri Qiorqi Kvirikaşvili Gürcüstan vətəndaşlarıni Milad bayramı münasibəti ilə belə təbrik edib.

Qiorqi Kvirikaşvili Sameba Kafedral Kilsəsində bayram ibadətində həyat yoldaşı və hökumət üzvləri ilə birgə iştirak edib. Bayram ibadətini Gürcüstanın Katalikos-Patriarxı, müqəddəs İkinci İlia həyata keçirib.

Bakıda qızıl alverçisinin qətlinin bəzi təfərrüatları məlum olub.

"Dalğa TV" Apa-ya istinadən xəbər verir ki, hüquq-mühafizə orqanlarından verilən məlumata görə, 1965-ci il təvəllüdlü Məryam Namet-zadə qızı və bacısı oğlu tərəfindən yatdığı yerdə öldürülüb. M. Namet-zadənin qızı Günel Hüseynova qətli törədəndən sonra hadisənin digər iştirakçılarını evdə qoyaraq mənzili tərk edib. O, bir neçə saat sonra evə qayıdıb və hadisənin iştirakçılarını evdən çıxarıb.

İlkin məlumata görə, qətl tamah məqsədi ilə törədilib. Bildirilir ki, G. Hüseynova saxlanılarkən polisə rüşvət təklif edib. O, polisdən 5 milyon manat müqabilində işin bağlanılmasını xahiş edib. Polis qızın bu təklifini rədd edərək, onu istintaqa təhvil verib. Nəsimi Rayon Məhkəməsinin qərarı ilə bu gün təqsirləndirilən şəxslər barəsində həbs-qətimkan tədbiri seçilib.

Qeyd edək ki, yanvarın 5-də Namet-zadə Məryam Tofiq qızının yaşadığı mənzilində üzərində çoxsaylı kəsilmiş-deşilmiş xəsarətlərlə müşayiət olunan meyiti aşkarlanıb. Həyata keçirilmiş tədbirlər nəticəsində cinayətin mərhumun qızı, 1988-ci il təvəllüdlü Günel Hüseynova, qohumu (bacısı oğlu) 1998-ci il təvəllüdlü Nicat Eyvazov və 1997-ci il təvəllüdlü Ceyhun Əsgərov tərəfindən törədilməsi müəyyənləşib.

Hazırda cinayət işi üzrə istintaq tədbirləri davam etdirilir.

Gürcüstanın Kutaisi şəhərində çoxmərtəbəli binada qəza baş verib.

"Dalğa TV" Apa-ya istinadən xəbər verir ki, Konstantin Qamsaxurdiya küçəsində binanın beton konstruksiyasının uçması nəticəsində küçədə hərəkət edən ana və uşaq yaralanıb. Onlar xəstəxanaya yerləşdiriliblər. Lakin hadisə nəticəsində ciddi xəsarət alan 4 yaşlı uşağı xilas etmək mümkün olmayıb. O, xəstəxanada dünyasını dəyişib. Ananın vəziyyəti isə qənaətbəxşdir.

Olay yerinə xilasetmə xidməti və hüquq-mühafizə orqanlarının əməkdaşları cəlb olunub. Fakt üzrə Gürcüstan CM-nin 116-cı maddəsi ilə (ehtiyatsızlıqdan adam öldürmə) cinayət işi qaldırılıb, araşdırma aparılır.

Bu gün Tiflis yaxınlığındakı Soğanlıq (Poniçala) kəndində 23 yaşlı azərbaycanlı gəncin qətli ilə bağlı aksiya keçirilib.

"Dalğa TV"nin Apaya istinadən verdiyi xəbərə görə, aksiyaya səbəb kənddə vəhhabi təriqətinə məxsus azərbaycanlının öz dostunu qətlə yetirməsi olub. Qətlə yetirilən Fikrət Əhmədovun yaxınları və kənd sakinləri bu gün keçirdikləri aksiyada radikal vəhhabiliyin yayılmasına etiraz ediblər.

Gürcüstanın müxtəlif yerlərindən gəlmiş müsəlmanlar "Vəhhabizm vandalizm!", "Vəhhabilik İslam deyil!" və digər şüarlar qaldırıblar.

Aksiyada çıxış edən Əhli-Beyt məscidinin axundu Hacı Rahid Kərimov, Gürcüstan Müsəlmanları İdarəsinin Kvemo Kartli bölgəsi üzrə nümayəndəsi Hacı Qurban Murquzov və başqaları vəhhabiliyin İslam dininə aidiyyəti olmadığını bildirib, bu təriqətə qoşulanları kəskin şəkildə pisləyiblər.

Çıxışçılar vəhhabi təriqətindən olanların Soğanlıq kəndində qarşıdurma yaratmağa cəhd etdiklərini, onların mövqeyini qəbul etməyən kənd sakinlərinə təzyiq göstərdiklərini bildiriblər. Onlar hüquq-mühafizə orqanlarını vəhhabiliyin qarşısını almağa çağırıblar.

"Biz 2013-cü ildə naməlum şəxslərin kənddə məscid tikintisinə etiraz etdik və üç dəfə Tiflis şəhər meriyası qarşısında etiraz aksiyası keçirdik. Sonra tikinti dayandırıldı. İndi hər cümə günləri bu yarımçıq tikiliyə ayrı-ayrı kəndlərdən müxtəlif insanlar, çeçenlər, ərəblər, naməlum şəxslər gəlir, zirzəmidə namaz qılırlar. Biz buna etiraz edirik", - deyə, Hacı Rahid Kərimov bildirib.

Qətlə yetirilmiş Fikrət Əhmədovun anası Zərəngül Əhmədova isə bildirib ki, kənd sakini Ramin İsayev oğluna iki bıçaq zərbəsi vurub: "O, oğlumdan soruşub ki, niyə "İmedi" kanalına müsahibə verib və vəhhabiləri pisləyib. Amma mən onun müsahibəsinə baxmışam. Oğlum orda qeyri-adi bir şey deməyib, ondan soruşublar ki, vəhhabilər məscidin zirzəmisində nə işlə məşğul olurlar. O da bildirib ki, mən bunu deyə bilmərəm, gedin özlərindən soruşun".

Z. Əhmədova deyib ki, oğlunu qətlə yetirən Ramin İsayev onların uzaq qohumudur və oğlu ilə də əvvəllər normal münasibəti olub: "O, altı ay bundan əvvəl vəhhabilərə qoşulub. Dünən kənd sakini Növrəs Əliyev oğlumun qətli ilə bağlı "Rustavi-2" kanalına müsahibə verib. Vəhhabilərdən ona hədə-qorxu mesajı gəlib. Yazıblar ki, sənin də başını kəsəcəyik".

Qeyd edək ki, ötən il dekabrın 27-də "İmedi" kanalına müsahibə verən Fikrət Əhmədov vəhhabi təriqətinin üzvü olan həmkəndlisi Ramin İsayev tərəfindən bıçaqlanaraq qətlə yetirilib.

Telavidə öldürülən polisləri bu gün dəfn edəcəklər.

"Dalğa TV" xəbər verir ki vida mərasimi Telavi Müqəddəs Məryəm adına kilsədə keçiriləcək.

Kaxetidə baş tutacaq mərasimə baş naziri və daxili işlər nazirini də gözləyirlər.

Xatırladaq ki, patrul-inspektor Maia Cavaxişvili və polis kapitanı Qela Lamazoşvili 30 dekabr tarixində qətlə yetiriliblər.

Daxili İşlər Nazirliyinin məlumatına əsasən ittiham edilən şəxs polislərə atəşi öz həyətindən açıb. Hadisə nəticəsində polis kapitanı yerindəcə, Maia Cavaxişvili isə xəstəxanaya çatdırıldıqdan sonra dünyasını dəyişib.

Hüquq mühavizəçiləri ittiham edilən şəxsi isti iz əsasında yaxalayıblar.

Yanvarın 6-da Bakı və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.

Gecə və səhər bəzi yerlərdə zəif duman olacaq. Cənub-qərb küləyi gündüz şimal-qərb küləyi ilə əvəz olunacaq, arabir güclənəcək.

"Dalğa TV"nin Apa-ya istinadən xəbər verir ki , Ekologiya və Təbii Sərvətlər Nazirliyinin Milli Hidrometeorologiya Departamentindən  verilən məlumata görə, havanın temperaturu Abşeron yarımadasında gecə 0-3 dərəcə isti, gündüz 5-9 dərəcə isti, Bakıda gecə 0-2 isti, gündüz 6-8 dərəcə isti olacaq.

Yanvarın 6-da rayonlarda gecə və səhər bəzi yerlərdə yağıntılı olacağı, qar yağacağı, gün ərzində əsasən yağmursuz keçəcəyi gözlənilir. Ayrı-ayrı yerlərdə duman olacaq. Qərb küləyi ayrı-ayrı yerlərdə arabir güclənəcək. Aran rayonlarında gecə 3-8 dərəcə şaxta, gündüz 5-10 dərəcə isti, dağlarda gecə 5-10 dərəcə şaxta, yüksək dağlıq ərazilərdə 15-20 dərəcə şaxta, gündüz 0-5 dərəcə isti, bəzi yerlərdə 4 dərəcə şaxta olacağı gözlənilir.

Yanvarın 6-8-də Abşeron yarımadasında atmosfer təzyiqinin xeyli tərəddüdü arabir güclənən gilavar və xəzri küləklərinin bir-birini əvəz etməsi meteohəssas insanlar çün əsasən əlverişsizdir.