Azərbaycanda dəhşətli intihar hadisəsi baş verib.

Beyləqan Rayon Polis Şöbəsindən "verilən məlumata görə, Füzuli rayon Şəkərli kənd sakini, Beyləqan ərazisində Fin qəsəbəsində məskunlaşmış 11 yaşlı Qara Ağayev evlərində özünü asıb. İntiharın səbəbləri məlum deyil.

Faktla bağlı cinayət işi başlanıb, araşdırmalar davam etdirilir.

Yanvarın 12-də Azərbaycanın Gürcüstandakı səfirliyinin vasitəçiliyi ilə Azərbaycan Təhsil nazirliyi tərəfindən 2015-2016-cı tədris ili üçün Gürcüstanda fəaliyyət göstərən Azərbaycan dilli məktəblərin IV, V, VI və VIII sinifləri üçün dərslik kitablarını Gürcüstanın elm və təhsil nazirliyinə təqdim edəcək.

Azərbaycan səfirliyindən verilən məlumata görə, səfirlik və KİV nümayəndələrinin iştirakı ilə Gürcüstan elm və təhsil nazirliyinə 12 adda 9810 nüsxə dərslik təhvil veriləcək və sonra nazirliyin hazırladığı siyahı ilə Azərbaycan dilli orta məktəblərə paylanılacaq. Məlumatda bildirilib ki, gətirilən kitabların içində azərbaycanlı şagirdlər üçün ⅦAzərbaycan dili", "Ədəbiyyat" dərslikləri və müəllimlər üçün metodik vəsaitlər var.

Azərbaycan səfirliyindən bildirilib ki, son iki ildə (2014 və 2015-ci illərdə) Gürcüstanın Azərbaycan dilli məktəbləri üçün 47105 ədəd “Azərbaycan dili", "Ədəbiyyat" fənləri üzrə dərslik kitabları və müəllimlər üçün metodik vəsaitlər səfirliyin vasitəsi ilə Gürcüstanın elm və təhsil Nazirliyinə təhvil verilib.

Sumqayıt Dövlət Universitetinin Filologiya fakültəsinin I kurs tələbəsi Qasımova Rumiyyə Elşən qızının intiharı barədə təfərrüatlar bitmək bilmir.

Qızın universitetdə yaxşı oxumadığı, iki imtahandan kəsilməsi və ailəsi tərəfindən basqı olması haqqında informasiyalar yayılıb. Sumqayıt Dövlət Universitetindən də intihar edən tələbə ilə bağlı məlumat yayılıb və bildirilib ki, həmin tələbə həqiqətən də hadisədən bir gün öncə cari sessiyada ikinci imtahanını verib, lakin lazımi hazırlaşmadığı üçün nəticəsi qənaətbəxş olmayıb.

Rumiyyənin ailəsi onun haqqında yayılan informasiyaları inkar edib. Onlar bildiriblər ki, saytlarda qeyd edildiyi kimi, qız pis oxumayıb. Yaxınlarının dediyinə görə, Sumqayıt Dövlət Universitetində rektorluqdan məlumat gəlib ki, tələbələrdən imtahanlara görə pul yığılsın. Rumiyyənin ailəsinin isə vəziyyəti o qədər də yaxşı deyil. Saray qəsəbəsində 1 sotluq ərazidə anası göyərti əkməklə məşğuldur. Atası isə tikintidə usta işləyir. İki il əvvəl ayağından kəsici alətlə ciddi xəsarət aldığından işləyə bilmir. Anası yığdığı göyərtiləri satmaqla qızının təhsil haqqını ödəməyə çalışıb. 1600 manatlıq təhsil haqqının 1000 manatını ailəsi, 600 manatını isə qohumları ödəyib.

“Atasının onun danlaması barədə xəbərlər də yalandır. Onların heç xəbərləri olmayıb. Atası deyib ki, iş tapar, təhsilhaqqını ödəyər. Amma həmin gün imtahandan yenidən kəsilməsi ilə bağlı xəbəri eşidəndən sonra evə gəlməyib, heç kimə demədən dənizə gedib, intihar edib”.

Rumiyyənin atası Elşən Qasımov açıqlamasında bildirib ki, qızı birinci imtahandan kəsiləndə bunun pul ilə bağlı olduğunu demişdi.

“Birinci imtahandan kəsildi. Evə gəldi, dedi ki, pul söhbətidir, pul verilməsə, kredit təhsil haqqının üstünə gələcək. İkinci imtahanı yanvarın 9-da idi, dedi ki, çalışıb onu verəcək. Mən də dedim ki, o biriləri ver, kəsiri düzəldərik. Birinci imtahan ingilis dilindən, ikinci isə Azərbaycan dilindən idi. Səhər mən işə, o imtahan getdi, 6-ya qədər evə gələrdi, həmin gün telefonu özü ilə aparmamışdı, evdə qalmışdı. Mənə saat 5-də evdən zəng etdilər ki, qız gəlməyib. İşdən çıxıb Universitetin əsas korpusuna getdim. Dedilər ki, onlar 5-də gediblər. Tələbə yoldaşları ilə əlaqə saxladıq. Məlum oldu ki, 24 tələbə imtahandan kəsilib. Rumiyyə isə çox pis olub, ağlayıb ki, “mən evə nə üzlə gedəcəm”. Sonra qrup yoldaşları ilə dayanacağa qədər bir gəliblər və orada ayrılıblar”.

Bütün şəhəri gəzsə də, qızını tapa bilmədiyini deyən E.Qasımov 21:00-da 102-ə zəng edib və Polis İdarəsindən ona ərizə yazmaq üçün çağırıblar.

“1-ci polis bölməsindən mənə zəng etdilər, gedib ərizəmi yazdım, qızın şəklini verəndə zəng etdilər ki, Trovmatologiyaya gəl. Gedib gördüm ki, meyit morqdadır, oradan götürüb gəldim. Qızımı dəniz qırağında tapıblar. Axtarış şöbəsinin rəisi deyib ki, özü çıxardıb. Sumkasında bütün hər şey yerində idi, tələbə biletini də ayrı yerdən balıqçı tapıb vermişdi”.

E.Qasımov bildirib ki, imtahanlara görə pul istənildiyi çoxdan tələbələrə deyilmişdi.

“Evdə ağzından qaçırtmışdı ki, 200 manat istənilir. Tam şəkildə deyə bilməmişdi. Dedim ki, o biri imtahanları ver, kəsir olanı düzəldərik. Qızımın ölümü ilə bağlı yazılan bütün informasiyalardan xəbərim var. Bununla bağlı lazımi yerlərə, Təhsil Nazirliyinə də şikayət edəcəm”.

Qeyd edək ki, yanvarın 9-da itkin düşmüş Sumqayıt şəhər sakini Rumiyyə Qasımovanın üzərində zorakılıq əlamətləri görünməyən meyiti yanvarın 10-da dəniz sahilində tapılıb.

Gürcüstanda ötən ilin dekabr ayından başlayaraq 27 nəfərin "donuz qripi" (H1N1) virusuna yoluxduğu qeydə alınıb.

"Dalğa TV"nin  məlumatına görə, bunu bu gün Gürcüstan Səhiyyə nazirliyinin infeksiya və yoluxucu xəstəliklərə nəzarət Departamentinin rəhbəri Paata İmnadze bildirib.

Brifinqdə jurnalistlərin suallarını cavablandıran P. İmnadze qeyd edib ki, təmsil etdiyi qurum H1N1 virusuna qarşı mübarizə aparır: "Vətəndaşlarımızın peyvənd olunmasına başlanılıb. Bu günədək 12 min Gürcüstan vətəndaşı dövlətin dəstəyi ilə peyvənd edilib. Daha 8 min nəfər özəl xəstəxanalarda bu prosesdən keçiblər. Vətəndaşlarımız fevral ayının sonunadək H1N1 virusa qarşı peyvənd olunacaqlar".

P. İmnadze Gürcüstan ərazisində H1N1 virusundan ölüm hallarının qeydə alınmadığını bildirib. O, azərbaycanlıların kompakt yaşadığı bölgələrdə bu xəstəliyə yoluxma hallarının olmadığını da əlavə edib.

Bakıda sifarişli qətl törədilib.

Sabunçu rayon Polis İdarəsindən verilən məlumata görə, hadisə Zabrat qəsəbəsində qeydə alınıb.

Qəsəbə sakini, 1968-ci il təvəllüdlü Sevil Rzayeva yaşadığı evdə naməlum şəxslər tərəfindən qətlə yetirilib.

Polis və prokurorluq əməkdaşlarının birgə həyata keçirdiyi istintaq-əməliyyat tədbirləri nəticəsində qətlin qadının həyat yoldaşının sifarişi əsasında həyata keçirildiyi müəyyənləşib.

Araşdırmalar zamanı məlum olub ki, S. Rzayevanın əri Rüstəm Rzayev Elşad Həsənov və onun qohumu Kərim Həsənova arvadını qətlə yetirmək üçün 2 min manat verib.

Həyata keçirilən tədbirlər nəticəsində R. Rzayev, E. Həsənov və K. Həsənov tutularaq istintaqa təhvil veriliblər.

Faktla bağlı Sabunçu rayon Prokurorluğu tərəfindən cinayət işi başlanıb, istintaq gedir.

"Dalğa TV"nin məlumatına görə, hər il Gürcüstanda ənənəvi olaraq bu bayram bütün pravoslav xristianlarının iştirakı ilə təntənəli şəkildə qeyd edilir. Məlumata görə, Gürcüstanda Milad bayramı V-VI əsrdən başlayaraq qeyd edilir. Həmin gün pravoslav xristianlar ailəvi şəkildə məbədlərə gedərək dualar oxuyur, şam yandırır və dini ayinlər icra edirlər.

Marneulidə Milad bayramı təntənəli şəkildə qeyd olunub. Artıq üçüncü ildir ki, Marneulidə Milad bayramı münasibətilə "Alilo" adlanan xüsusi yürüş təşkil edilir.

Yürüş iştirakçıları olan pravoslav xristianlar, Marneuli Yeparxiyasının yepiskopu Georgi şəhərin ən böyük küçəsi olan Rustaveli küçəsində qarşılarına çıxan insanları bayram münasibəti ilə təbrik edərək onlara sülh, sevinc, xeyirxahlıq və əmin-amanlıq arzulayıblar.

Sonra tədbir iştirakçıları Marneuli rayon icra hakimiyyəti qarşısında din adamlarının iştirakı ilə dini ayinlər həyata keçiriblər. Tədbirdə Marneuli rayon icra hakimiyyətinin rəhbəri Merab Topçişvili və digər rəsmi şəxslər iştirak ediblər. Tədbirə azərbaycanlılar da qatılıblar.

Milad bayramında "Alilo" yürüşünün iştirakçıları milli paltar geyinərək öküzlər qoşulan arabanı Rustaveli küçəsi ilə sürüblər və pravoslav xristianlar, azərbaycanlılar və digər millətlərin nümayəndələri arabaya bayram hədiyyələri, şirniyyat və ərzaq məhsulları qoyublar.

Tədbirdən sonra hədiyyələr, toplanan ianələr kimsəsiz insanlara, imkansız ailələrə, uşaq evlərinə verilib.