Ümumdünya Səhiyyə Təşkilatı öz rəsmi saytında Avropa ölkələrində qızılcanın yayılması haqqında məlumat yerləşdirib.

2017-ci il yanvar ayında Avropada 500 qızılca halı qeydə alınıb. Virus yayılmaqda davam edir. Fevralda rəqəmlər daha da artıb.

Ən çox qızılca virusu İtaliya və Rumıniyada yayılıb. Belə ki, Rumıniyada 2016-cı ilin əvvəlindən qızılca xəstəliyinə 3400 dəfə təsadüf edilib. 17 insan bu xəstəlikdən həlak olub. Alimlərin fikrinə görə, bunun səbəbi bu ölkələrdə qızılcaya qarşı peyvəndləşmənin lazımi səviyyədə olmamasıdır.

İtaliyada ilin əvvəlində 238 qızılca halı qeydə alınıb.

Qızılca virusu bir insandan digərinə hava-damcı yolu ilə keçir. Qızılca virusu çox sürətlə böyük məsafələrə yayıla bilir. Bu virusun törətdiyi xəstəlik ağır fəsadların inkişafına səbəb ola bilər. Bu fəsadlar arasında:

- pnevmoniya (ağciyərin iltihabı)

- otit (qulaq iltihabı)

- ensefalit (beyin iltihabı)

- korluq və s.

Qızılca ölümə də səbəb ola bilər (xüsusilə körpə uşaqlarda).

Qızılcanın ən effektli profilaktik tədbiri peyvənddir.

Şəmkirdə gənclərin mübahisəsi odlu silahdan açılan atəşlə iki nəfərin xəsarət alması ilə nəticələnib.

Yaralılardan birinin vəziyyəti ağır, digərinin səhhəti isə nisbətən yüngül kimi dəyərləndirilir.

Silahlı insident Şəmkir rayonunun Dəllər-Cəyir kəndində baş verib. Dəllər Daşbulaq kənd sakini 31 yaşlı Vahid Əsgərov Şəmkir sakini həmyaşıdı Cavid Şirinova odlu silahdan atəş açıb. Güllə yarası alan sonuncu ətrafdakıların köməkliyi ilə Şəmkir Mərkəzi Rayon Xəstəxanasına çatdırılıb. İlkin tibbi yardımdan sonra yaralı Gəncə şəhərindəki özəl xəstəxanalardan birinə aparılıb.

Elşən Quliyev - həkim: "Şöbəmizə güllə yarası ilə Şirinov Cavid Faiq oğlu daxil olub. Xəstədə sağ baldır nahiyyəsinin yuxarı üçdə birində güllə yarası aşkarlanıb. Dərhal yardım göstərilib. Rentgen müayinələrdən keçirilib. Sonradan xəstə yaxınları yaralını özəl xəstəxanalardan birinə evakuasiya etdilər".

Hadisə tərəflər arasındakı mübahisədən yaranıb. Əvvəlcə əlbəyaxa olan gənclərin hirsi bir qədər sakitləşsə də, sonradan mübahisə Vahid Əsgərova məxsus "Niva" markalı avtomobildə yenidən qızışıb. Bu zaman Vahid avtomobilində saxladığı odlu silahla Cavidi yaralayıb.

Şahid: "Çöldə bir az mübahisə etdilər. Ancaq bilmədik nəyə görə edirlər. Biz həyətdə işləyirdik. Çıxdıq çölə, dedilər bir nəfəri güllələdilər".

Hadisə zamanı yaxınlıqdakı 33 yaşlı Zirəddin Qarayev də xəsarət alıb. Həmin şəxs də yaxınları tərəfindən Gəncədəki özəl klinikalardan birinə yerləşdirilib. Hələlik odlu silahdan istifadə edən Vahid Əsgərov saxlanılmayıb. Şəmkir Rayon Polis Şöbəsinin əməkdaşları bu istiqamətdə əməliyyat- axtarış tədbirlərini davam etdirir.

Daha çox yeməklərə xüsusi dad vermək üçün istifadə edilir. Bununla bərabər həmdə bir çox xəstəliklərin müalicəsində də rolları böyükdür. Söhbət ədviyyatlardan gedir. Mağzalarda cürbəcür dada və qiymətə malik ədviyyatlar satılır. Hətta kilosu 5 min manata olan ədviyyatlar belə var.

Dalga tv xezerxeber.az-a istinadən bildirir ki, ariana, kalyandra, kori, xmeli-suneli. Bunlar hər hansısa bir termin yox satışda olan ədviyyatlardır. Satıcıların sözlərinə görə adları qəribə olsada,amma ən çox tələb olunan ədviyyatlar sırasındadırlar. Kori tərkibinin zənginliyi ilə seçilir və daha çox ət yeməklərində istifadə edilirlər
Ədviyyatlar daha çox Türkiyə, İran və Hindistandan gətirilir. Bu ədviyyat isə kətan toxumudur. Kilosu 8-10 manat arasında dəyişən bu məhsula son zamanlar maraq artıb.
Ədviyyatların əksəriyyəti daha çox xaricdən gətirilsədə,amma yerli istehsal olanlar da var. Bilgəh Zəfəranı keyfiyyəti ilə yanaşı qiymətinə görədə digər ədviyyatlardan fərqlənir. Kilosu təxminən 4-5min manata başa gəlir. Bir çox xəstəliklərin müalicəsi üçün nəzərdə tutulan keçi buynuzunun qiyməti isə 14 manatdan təklif edilir. Ümumiyyətlə isə bazarda ən çox satılan ədviyyatlara istiot, mixək və sarıkökdür.

Azərbaycanda ilk dəfə olaraq, bu il aprelin 10-dan mayın 10-dək Bakıda keçiriləcək Birinci Şopinq Festivalının, eləcə də ondan sonra keçiriləcək “Bakı-2017” IV İslam Həmrəyliyi Oyunları, “Formula 1" yarışının baş tutacağı tarixlər üçün hotellərdə yerlərin bronlaşdırılmasına hələ martdan başlanılıb.

Dalga tv-nin məlumatına görə, bunu Trend-ə Azərbaycan Turizm Assosiasiyası (AzTA) sədrinin müşaviri Müzəffər Ağakərimov deyib.

M.Ağakərimovun sözlərinə görə, şopinq festivalına ərəb ölkələri ilə yanaşı, İrandan, Rusiyadan və Avropa ölkələrindən də turistlərin gələcəyi gözlənilir. Artıq paytaxtdakı hotellərin, xüsusilə brend hotellərin yerlərinin çoxu bron edilib.

M.Ağakərimov əlavə edib ki, ümumilikdə aprel-may ayları üçün Azərbaycanın hotellərindəki yerlər daha çox ərəb turistlər tərəfindən bron edilib.

AzTA rəsmisi əlavə edib ki, şopinq festivalı yalnız alış-veriş etmək baxımından əhəmiyyətli deyil: 

“Bu festival ölkəyə turist cəlb etmək baxımından əhəmiyyətlidir. Ona görə də turizm şirkətləri və hotellər həm şopinq festivalına, həm də ondan sonra keçiriləcək “Bakı-2017” IV İslam Həmrəyliyi Oyunları, Formula 1 yarışına ciddi hazırlaşmalı və turistlər üçün əlavə proqramlar hazırlamalıdırlar”.

Azərbaycana gələn əcnəbi turistlərin maraq dairəsinin ölkələr üzrə fərqli olduğunu deyən M.Ağakərimov bildirib ki, əlavə proqramlar da turistlərin maraq dairəsi nəzərə alınmaqla tərtib edilməlidir: 

“İrandan gələn turistlər daha çox Azərbaycanın mətbəxi, suvenirlərlə maraqlanırlar. Yaponiyadan gələn turistləri isə daha çox Azərbaycanın tarixi, onun qədim abidələri maraqlandırır. Buna görə də turizm şirkətləri onları maraqlandıran istiqamətlər üzrə proqramlar tərtib edə bilərlər. Məsələn, Avropadan gələnlər üçün şərab dequstasiyası, islam ölkələrindən gələnlər üçün Azərbaycana məxsus şirniyyyatlardan istifadə etməklə çay dequstasiyası təşkil edilə bilər. Avropadan gələnlər həmçinin, Azərbaycanın məscidləri ilə də maraqlanırlar. Belə turistlər üçün Azərbaycanın tolerant ölkə olduğunu göstərən proqramlar təşkil edilə, onların məscidlərə, kilsələrə, sinaqoqlara səfərləri təşkil edilə bilər”.

M.Ağakərimov qeyd edib ki, bu tədbirlərdən sonra Azərbaycana gələn turistlərin sayının artacağı gözlənilir. Onun sözlərinə görə, “Bakı-2017” IV İslam Həmrəyliyi Oyunlarından sonra Azərbaycana Malayziya, İndoneziya kimi ölkələrdən də turistlərin gələcəyi proqnozlaşdırılır.

Qeyd edək ki, bu il aprelin 10-dan mayın 10-dək Bakıda Birinci Şopinq Festivalı, mayın 12-22-də İslam Həmrəyliyi Oyunları, iyunun 23-25-də Formula 1 yarışı keçiriləcək.

Su insan orqanizminin əsas tərkib hissəsidir. Suyun kifayət miqdarda qəbulu insan sağlamlığı üçün olduqca vacibdir.

Təəssüf ki, müasir insanların əksər hissəsi, demək olar ki, su içmir. Çay, qəhvə, müxtəlif qazlı içkilər və s. suyun yerini tutub. Lakin həkimlərin və alimlərin ümumi fikirinə görə, heç bir ən faydalı içki, heç bir təbii şirə və s. təmiz içməli suyu əvəz edə bilməz. Su insan orqanizmi üçün ən faydalı və əvəzolunmaz "məhsullardan" biridir.

Səhər acqarına 1 stəkan ilıq limon şirəsi əlavə olunmuş suyun qəbulu çox gözəl müalicəvi və profilaktik vasitə sayılır.

1 stəkan ilıq suya 1 çay qaşığı limon şirəsi əlavə edin və səhər acqarına qida qəbulundan 30 dəqiqə əvvəl kiçik qurtumlarla için. Bu çox sadə vasitə:

- orqanizmi oyadır, tonuslaşdırır, daha gümrah edir, iş qabiliyyətini artırır

- mədə-bağırsaq sisteminin fəaliyyətini yaxşılaşdırır

- qəbizliklə mübarizə edir

- damarları təmizləyir, onların elastikliyini artırır

- mübadilə prosesləri sürətləndirir

- arıqlamağa kömək edir

- beyinin fəaliyyətini yaxşılaşdırır

- oynaqlarda iltihabları azaldır

- dərinin vəziyyətinə müsbət təsir edir

- orqanizmi toksinlərdən və şlaklardan təmizləyir.

Təbii ki, 1 stəkan təmiz su kifayət deyil. Sağlam insan gün ərzində təxminən 2 l təmiz su içməlidir.

Amerika alimləri çayın növbəti faydasını aşkar ediblər. Eksperiment göstərib ki, çay qidaların qlikemik indeksini və nəticədə qanda şəkərin səviyyəsini azaldır.

Bu şəkərli diabetdən əziyyət çəkən və bu xəstəliyə görə risk qrupunda olan insanlar üçün çox vacibdir.

The Daily Mail xəbər verir ki, alimlərin fikrinə görə, çayın orqanizmdə qlükozanın mənimsənilməsini ləngidən xüsusiyyəti bu populyar içkidə olan polifenol maddələri ilə bağlıdır.

Bundan əvvəl keçirilmiş elmi araşdırmalar çayın ürək-damar sistemi üçün çox faydalı olduğunu təsdiq edib. Həmçinin çay beyinin fəaliyyətini aktivləşdirir, xərçəngin inkişafının qarşısını alır, orqanizmi cavanlaşdırır.

Alimlər gün ərzində 3-5 fincan təzə dəmlənmiş çayı içməyi tövsiyə edir.