“Mən Dağlıq Qarabağ məsələsinin bütün azərbaycanlılar üçün necə ağrılı məsələ olduğunu bilirəm. Bilirəm ki, azərbaycanlıların demək olar, 99 faizi Dağlıq Qarabağ məsələsində vahid mövqedən çıxış edir. 20 ildən çox keçməsinə baxmayaraq, bu məsələnin həll olunmamasına görə Azərbaycan xalqının məyusluğunu başa düşürəm”.

APA-nın məlumatına görə, bunu Azərbaycan Dövlət İqtisadi Universitetin tələbələri ilə görüşdə ABŞ-ın Azərbaycandakı səfiri Riçard Morninqstar deyib.

Səfir bildirib ki, ABŞ Minsk Qrupunun həmsədr ölkəsi kimi 20 ildir bu sahədə işləyir: “Biz Minsk Qrupu ilə birgə işləyərək, bu məsələnin nizamlanmasına nail olmaq üçün əlimizdən gələni edəcəyik. Hesab edirəm ki, əsas problemlərdən biri hər iki ölkə - həm Azərbaycan, həm də Ermənistanın böyük güclərin, böyük dövlətlərin, xüsusilə ABŞ-ın daha çox səy göstərməsini gözləməsidir. Regionlara səfər edərkən, küçədə insanlar məndən soruşurlar ki, məsələ niyə həll olunmur? Əmin edirəm ki, bu asan olsaydı, biz bunu edərdik. İnanıram ki, bu məsələ yalnız o zaman həll oluna bilər ki, münaqişə tərəfləri problemin birdəfəlik həllinə qəti qərar versinlər”.

Səfir ümidvar olduğunu bildirib ki, prezidentlərin yaxın vaxtlarda baş tutacaq görüşündə hər iki ölkə başçısı bu problemi həll etmək və konkret məsələlərlə bağlı razılığa gəlmək üçün qərar qəbul edəcəklər.

ABŞ tərəfindən Dağlıq Qarabağa hər il maliyyə yardım göstərilməsi ilə bağlı suala cavabında R. Morninqstar bildirib ki, bu, Konqresin mandatına uyğun olaraq həyata keçirilir və bu yardım ancaq humanitar məqsədlidir: “Həm də burada söhbət böyük məbləğlərdən getmir”.

 “Gürcü Arzusu” koalisiyasının namizədi Georgi Marqvelaşvilinin 62,12% səs toplayaraq prezident seçildiyi açıqlanıb.

Vahid Milli Hərəkat Partiyasının namizədi David Bakradze 21,72%, “Demokratik Hərəkat – Vahid Gürcüstan” Partiyasının lideri Nino Burcanadze isə 10,19% səs alıblar.  

G. Marqvelaşvili noyabrın 17-də keçiriləcək andiçmə mərasimindən sonra vəzifəsinin icrasına başlayacaq.

Azərbaycan Respublikasının Prezidenti İlham Əliyev türkiyəli həmkarı Abdullah Gül tərəfindən Türkiyənin "Dövlət nişanı" ilə təltif olunub.

Sonra Prezident İlham Əliyev tərəfindən Türkiyə Prezidenti Abdullah Gül "Heydər Əliyev" ordeni ilə təltif olunub.

Təltifolunma mərasimindən sonra Azərbaycan və Türkiyə prezidentləri çıxış ediblər.

Məlumata görə, mərasimdə Azərbaycanın birinci xanımı Mehriban Əliyeva, Azərbaycan və Türkiyənin ictimai-siyasi xadimləri iştirak ediblər.

Türkiyəyə rəsmi səfərə gedən Azərbaycan prezidenti İlham Əliyev bu gün Türkiyə prezidenti Abdulla Gül tərəfindən qəbul edilib.

Çankaya köşkündə rəsmi qarşılama mərasimi keçirilib. İlham Əliyev və xanımı Mehriban Əliyeva Abdulla Gül və xanımı Hayrunnisa Gül tərəfindən qarşılanıb. Rəsmi mərasimdən sonra ikitərəfli görüş başlayıb. Görüşdən sonra birgə mətbuat konfransı keçiriləcək.

İki gün davam edəcək səfər zamanı müxtəlif sahələrə aid sazişlər və protokollar imzalanacaq. Tərəflər regional və qlobal məsələlər ətrafında məsləhətləşmələr aparacaqlar. İ. Əliyevə A. Gül tərəfindən “Dövlət nişanı” təqdim ediləcək.

Bu gün axşam Azərbaycan prezidentinin şərəfinə ziyafət veriləcək. Ziyafətə baş nazir Rəcəb Tayyib Ərdoğan da qatılacaq.

Milli Məclisin bu gün başlayan plenar iclasında spikerlə deputat arasında maraqlı dialoq baş verib.


Dialoq Milli Məclisin sədri Oqtay Əsədovun iclasda büdcənin müzakirəsi ilə bağlı danışacaq şəxslər haqda məlumat verdiyi zaman yaranıb.

Spiker iclasda əvvəlcə parlamentin Sosial siyasət Komitəsinin sədri Ziyad Səmədzadə, sonra Maliyə naziri Samir Şərifov, daha sonra isə İqtisadi İnkişaf nazirinin çıxış edəcəyini deyib.

Bu zaman cümləsini tamamlamamış, millət vəkili Elmira Axundova yerindən replika ataraq, “Deputatlara da söz verin!” deyib. O. Əsədov isə deputatın bu replikasını sərt şəkildə cavablandırıb: “Gəl, otur mənim yerimdə iclası apar”.

Noyabrın 12-də Türkiyədə rəsmi səfərdə olan Azərbaycan Prezidenti İlham Əliyevin Ankaranın Çankaya köşkündə rəsmi qarşılanma mərasimi olub.

Hər iki ölkənin dövlət bayraqlarının dalğalandığı meydanda Azərbaycan Prezidenti İlham Əliyevin şərəfinə fəxri qarovul dəstəsi düzülüb.

Azərbaycanın və Türkiyənin dövlət himnləri səslənib.

Prezident İlham Əliyev və Türkiyə Prezidenti Abdullah Gül fəxri qarovul dəstəsinin qarşısından keçiblər.