Oktyabrın 21-də Gürcüstanda yerli özünüidarəetmə orqanlarına seçkilər başlayıb.

Dalga tv Reporta istinadən xəbər verir ki, səhər saat 8:00-da 3644 seçki məntəqəsinin hamısı vaxtında açılıb.

Gürcüstan Mərkəzi Seçki Komissiyasının (MSK) sədri Tamar Jvaniya çıxış edərək bildirib ki, bu gün seçicilər 2058 bələdiyyə üzvünü, 64 şəhər meri və 64 şura üzvünü seçəcəklər.

Bu gün 369 nəfər namizəd mer vəzifəsi, o cümlədən 13 nəfər paytaxt Tbilisi şəhərinin meri vəzifəsi uğrunda mübarizə aparır.

Səsvermənin gedişini ümumilikdə 75 min 611 müşahidəçi, həmçinin, 4820 jurnalist izləyəcək.

Seçici siyahılarında 3 milyon 440 min 123 seçicinin adı var.

Səsvermə saat 20:00-da başa çatacaq.

"Oktyabrın 21-də Gürcüstanda yerli özünüidarəetmə orqanlarına seçki keçiriləcək. Gürcüstan qanunvericiliyinə görə, oktyabrın 21-i ölkədə qeyri-iş günüdür".

“Report”un Gürcüstan bürosu xəbər verir ki, bunu Gürcüstan Mərkəzi Seçki Komissiyasının (MSK) sədri Tamar Jvaniya oktyabrın 20-də keçirdiyi brifinqdə deyib.

MSK sədri deyib ki, sabah seçicilər 2058 bələdiyyə üzvü, 64 şəhər meri və 64 şura üzvünü seçəcəklər. Seçkilərlə əlaqədar 22 siyasi partiya, 5 seçici bloku və təşəbbüs qrupu MSK-da qeydiyyatdan keçib.

T.Jvaniyanın sözlərinə görə, seçkilərdə 369 şəxsin mer vəzifəsinə, o cümlədən 13 nəfərin Tbilisi şəhər meri vəzifəsinə namizədliyi irəli sürülüb.

Majoritar namizədlərin sayı 4727, partiya siyahısında namizədlərin sayı 12902 nəfərdir.

Seçkilərlə əlaqədar 3644, o cümlədən 10 qapalı seçki məntəqəsi səsverməyə tam hazırdır.

Səsvermənin gedişini ümumilikdə 75 min 611 müşahidəçi izləyəcək. Onlardan 54389 –u seçici subyektinin, 20641- yerli təşkilatların, 581-i isə beynəlxalq təşkilatların müşahidəçiləridir.

Prosesi həmçinin 4820 jurnalist izləyəcək.

MSK sədrinin sözlərinə görə, seçki məntəqələri bütün lazımi avadanlıqla təmin olunub. Seçici siyahılarında 3 milyon 440 min 123 seçicinin adı var.

Səsvermə ilə əlaqədar 9 546 450 bülleten çap olunub. Gürcüstanda yaşayan milli azlıqlar üçün Azərbaycan-gürcü və erməni-gürcü dillərində bülletenlər çap olunub. Azərbaycan-gürcü dilində olan bülletenlər 208 seçki məntəqəsinə, gürcü-erməni dilində olan bülletenlər isə 133 məntəqəyə paylanılıb.

Səsvermə oktyabrın 21-də saat 8:00-da başlayacaq, saat 20:00-da başa çatacaq və məntəqələr bağlanacaq.

Gürcüstan prezidenti Giorgi Marqvelaşvili Konstitusiyaya düzəlişlər barədə parlamentin qəbul etdiyi qanunu imzalayıb.

APA-nın yerli bürosunun məlumatına görə, bu barədə dövlət başçısı xüsusi brifinqdə deyib. O bildirib ki, ilk günlərdən aydın idi ki, hakim partiya özü təkbaşına Konstitusiya hazırlayır: “Konstitusiyanı imzalamaq çətin oldu, lakin biz destabilizasiyanın qarşısını almaq üçün hər şey etməliyik.”

Qeyd edək ki, Gürcüstan parlamenti oktyabrın 13-də mütləq səs çoxluğu ilə Konstitusiyaya düzəlişlər barədə qanunu qəbul edib. Yeni dəyişikliklərə əsasən Gürcüstanda parlament seçkiləri və prezidentin seçilməsi proseduru dəyişir. Deputatlar proporsional seçki sistemi ilə, prezident isə birbaşa deyil, 300 üzvü olacaq xüsusi seçki kollegiyası tərəfindən seçiləcək. Yenilənmiş Konstitusiya 2018-ci ilin prezident seçkilərindən sonra qüvvəyə minəcək. Lakin proporsional sistem növbəti seçkilərdə yox, ondan sonrakı seçkilərdə tətbiq ediləcək.

Gürcüstanın müxalif “Avropalı Gürcüstan” Partiyası hakimiyyətdəki “Gürcü Arzusu” Partiyasını seçki haqqında qanunu pozmaqda ittiham edib.

APA-nın yerli bürosunun məlumatına görə, “Avropalı Gürcüstan” Partiyasının ldierlərindən biri Giorgi Kandelaki brifinqdə deyib ki, hakim partiyanın Axalkalaki bələdiyyəsinə majoritar namizədləri arasında Ermənistan vətəndaşları var: ““Gürcü Arzusu”nun Axalkalaki bələdiyyəsi üzrə namizədləri Karapet Paloyan, Eduard Elizyan və Edik Berikyan Ermənistan vətəndaşlarıdır. Qanunvericiliyə əsasən, xarici ölkə vətəndaşları seçkiyə qatıla bilməz. Hakim partiyadan həmin namizədlərin geri çağırmağı tələb edirik”. 

G. Kandelaki adları qeyd olunan şəxslərin Ermənistan vətəndaşı pasportlarının surətlərini təqdim edib.

“Gürcü Arzusu” məsələyə hələ münasibət bildirməyib.

Gürcüstanda yerli idarəetmə orqanlarına keçiriləcək seçkiləri 20 minə yaxın yerli və 600 beynəlxalq müşahidəçi izləyəcək.

APA-nın yerli bürosunun məlumatına əsasən, bu barədə Gürcüstan Mərkəzi Seçki Komissiyasının (MSK) mətbuat katibi Ana Mikeladze deyib.

Onun sözlərinə görə, MSK-da seçkilərin müşahidəsi üçün 71 yerli, 30 beynəlxalq və 74 yerli və xarici KİV qeydiyyata alınıb.

Qeyd edək ki, Azərbaycan Mərkəzi Seçki Komissiyasının nümayəndə heyəti də Gürcüstandakı seçkiləri müşahidə edəcək. Seçkilər oktyabrın 21-də keçiriləcək.

Tbilisidə Azərbaycan, Gürcüstan və Türkiyə Silahlı Qüvvələri rəhbərlərinin üçtərəfli görüşü başa çatıb.

APA-nın yerli bürosunun məlumatına əsasən, Azərbaycanın müdafiə naziri, general-polkovnik Zakir Həsənov, Gürcüstanın Silahlı Qüvvələrinin Baş Qərargah rəisi, general-mayor Vladimir Çaçibaya və Türkiyənin Silahlı Qüvvələrinin Baş Qərargah rəisi, general Hulusi Akarın iştirakı ilə keçirilən görüşdə bölgədəki hərbi-siyasi vəziyyət, regional təhlükəsizlik məsələləri ətraflı müzakirə edilib və üçtərəfli hərbi əməkdaşlığın perspektivləri barədə geniş fikir mübadiləsi aparılıb.

Tərəflər beynəlxalq terrorizm və aqressiv separatizmin regiondakı sülhə və sabitliyə, ümumi inkişafa mənfi təsir göstərdiyini vurğulayaraq dövlətlərin təhlükəsizliyinə yönəlmiş təhdidlərə qarşı birgə fəaliyyətin vacibliyini xüsusi qeyd ediblər.

Nümayəndə heyətləri hərbi əməkdaşlığın perspektivləri, üçtərəfli hərbi təlimlərin keçirilməsi və birgə fəaliyyətin bir sıra digər istiqamətlərini də nəzərdən keçiriblər.

Görüşün yekununa dair birgə sənəd imzalanıb.