Ermənistan silahlı qüvvələrinin bölmələri cəbhənin müxtəlif istiqamətlərində 60 millimetrlik minaatanlardan da (1 mərmi) istifadə etməklə sutka ərzində atəşkəs rejimini 139 dəfə pozub.

Azərbaycan Müdafiə Nazirliyindən Sonxeber.az-a verilən məlumata görə, Ermənistanın Noyemberyan rayonunun Dovex kəndində və adsız yüksəkliklərdə, İcevan rayonunun Vazaşen, Paravakar kəndlərində və adsız yüksəkliklərdə yerləşən mövqelərdən Qazax rayonunun Qaymaqlı, Bala Cəfərli kəndlərində və adsız yüksəkliklərdə, Berd rayonunun Mosesqex, Çinari kəndlərində və adsız yüksəkliklərdə yerləşən mövqelərdən Tovuz rayonunun Əlibəyli, Ağdam, Koxanəbi kəndlərində və adsız yüksəkliklərdə, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonu ərazisindəki adsız yüksəkliklərdə yerləşən mövqelərimiz atəşə tutulub.

Tərtər rayonunun işğal altında olan Göyarx, Çiləbürt, Yarımca, Ağdam rayonunun Nəmirli, Tağıbəyli, Şıxlar, Baş Qərvənd, Abdinli, Qaraqaşlı, Kəngərli, Sarıcalı, Acarlı, Novruzlu, Yusifcanlı, Mərzili, Xocavənd rayonunun Kuropatkino, Füzuli rayonunun Aşağı Veysəlli, Qobu Dilağarda, Qərvənd, Qaraxanbəyli, Aşağı Seyidəhmədli, Qorqan, Kürdlər, Horadiz, Cəbrayıl rayonunun Nüzgar və Mehdili kəndləri yaxınlığında, həmçinin Göygöl, Goranboy, Tərtər, Ağdam, Xocavənd və Füzuli rayonları ərazisindəki adsız yüksəkliklərdə yerləşən mövqelərdən də Silahlı Qüvvələrimizin mövqeləri atəşə tutulub.

Gürcüstan parlamenti 117 səslə ölkə Konstitusiyasına düzəlişləri qəbul edib.
 

APA-nın yerli bürosunun məlumatına görə, parlament sədri İrakli Kobaxidze qərarı tarixi adlandırıb.

Parlamentdə təmsil olunan müxalif “Vahid Milli Hərəkat” və “Avropalı Gürcüstan” partiyaları iclasda iştirakdan imtina ediblər. Müxalif “Vətənpərvərlər Alyansı” isə dəyişikliklərin əleyhinə səs verib.
 

Yenilənmiş Konstitusiyanın 2018-ci ilin prezident seçkilərindən sonra qüvvəyə minməsi gözlənilir.
 

Parlamentin qədul etdiyi əsas düzəlişlər parlament seçkiləri və prezidentin seçilməsi proseduru ilə bağlıdır. Qəbul olunmuş dəyişikliklərə əsasən, deputatların proporsional seçki sistemi ilə, Gürcüstan prezidentinin isə birbaşa deyil, 300 üzvü olacaq xüsusi seçki kollegiyası tərəfindən seçilməsi nəzərdə tutulur.  

Dəyişikliklər təsdiq üçün prezident Giorgi Marqvelaşviliyə təqdim olunacaq. Dövlət başçısı Konstitusiyaya nəzərdə tutulmuş bir sıra dəyişikliklərlə razı olmadığını dəfələrlə bəyan edib. Onun dəyişikliklərə veto qoymaq hüququ var.

Azərbaycan və Türkiyə Hərbi Hava Qüvvələrinin “TurAz Qartalı-2017” təlimləri çərçivəsində birgə taktiki uçuş təlimləri davam edir.

APA-nın Qarabağ bürosunun xəbərinə görə, təlimlərə iki ölkənin Hərbi Hava Qüvvələrinə məxsus “MiQ-29”, “F-16”, “Su-25”, “C-130 Herkules”, “A-400 M”, “CASA CN-235” təyyarələri və “Mi-35”, “Mi-17”, “Sikorski S-70” helikopterlərindən ibarət 30-dək aviasiya vasitəsi qatılıb.

Azərbaycan Hərbi Hava Qüvvələrinin baş şturmanı, polkovnik Faiq Əliyev bildirib ki, təlimlərdə iki ölkənin hərbi hava qüvvələri birləşmiş əməliyyatların planlaşdırılaraq həyata keçirilməsi üzrə qarşılıqlı fəaliyyət və döyüş uzlaşması imkanlarını yoxlamaq, birgə havadöyüşləri, yer hədəflərinə hücum, hava hücumundan müdafiə sistemlərinə qarşı birgə döyüş fəaliyyətinin aparılması, havaməkanındakı uçuş zonalarını, ərazidəki qalxma-enmə zolaqlarını, marşrut üzrə aeronaviqasiya vəziyyətini öyrənmək, uçuş, enmə və ehtiyat aerodromlarındakı şəraitlə tanış olmaq məqsədilə uçuşlar həyata keçirirlər.

Təlimlərdə Türkiyədən 170-dən çox şəxsi heyət iştirak edir. Bu gün təlimlər çərçivəsində F-16, MiQ-29 və Su-25 döyüş təyyarələri şərti hədəfi məhv etmək üçün birlikdə havaya qalxıblar. Həmçinin, MiQ-29 və F-16 təyyarələri birgə olaraq uzaq, orta və yaxın məsafəli şərti hava döyüşü tədbirlərini icra ediblər. Azərbaycan pilotları Türkiyə təyyarələrində, türk “şahinləri” isə bizim təyyarələrdə uçuşlar həyata keçiriblər.

Gürcüstan Hərbi Hava Qüvvələrinin nümayəndələri təlimləri izləmək üçün aerodroma gəlib. Məqsəd gələcəkdə Gürcüstan təyyarəçilərinin də “TurAz Qartalı” təlimlərinə qoşulmasını müzakirə etməkdir.

Bunda başqa, Mingəçevir məktəbliləri də təlimləri izləmək üçün aerodroma gəliblər.

Birgə taktiki təlimlər sentyabrın 30-dək davam edəcək.

Gürcüstanda “Eternity-2017” kompüter dəstəkli komanda-qərargah təlimi başlayıb. 

APA-nın yerli bürosunun Gürcüstanın Müdafiə Nazirliyinə istinadən verdiyi xəbərə görə, NATO-Gürcüstan Təlim və Qiymətləndirmə mərkəzində keçirilən təlimdə gürcü hərbçilərlə yanaşı Azərbaycan və Türkiyə hərbçiləri iştirak edir. 
 

Təlimin keçirilməsində məqsəd əsas ixrac boru kəmərlərinin mühafizəsinin gücləndirilməsində strateji əməkdaşlığın təmin olunmasıdır. Təlimdə Bakı-Tbilisi-Ceyhan neft kəmərinin böhran vəziyyətlərdə mühafizəsi üçün əməliyyatların ssenarisi nəzərdən keçirilir. 
 

Təlim sentyabrın 29-da başa çatacaq. 

“Azərbaycan və Gürcüstan sərhədçiləri arasında sıx əlaqələr mövcuddur”.

APA-nın Gürcüstan bürosunun məlumatına görə, bunu Azərbaycanı Dövlət Sərhəd Xidmətinin (DSX) rəis müavini, general-mayor Fərhad Tağızadə Tbilisidə deyib.

Azərbaycan və Gürcüstan arasında quru sərhədinin mühafizəsi ilə bağlı layihənin nəticələri haqda danışan F. Tağızadənin sözlərinə görə, layihə çərçivəsində qarşıya qoyulmuş bütün məqsəd və vəzifələrə nail olunub: “Layihə çərçivəsində sərhədlərin mühafizəsinə dair texniki dəstək almışıq.  Azərbaycan və Gürcüstan sərhədçiləri üçün təlimlər və həmçinin təlimçilər üçün təlimlər də təşkil olunub.  Eyni zamanda bir sıra Avropa ölkələrinə səfərlər çərçivəsində təcrübə mübadiləsi aparılıb.”

Rəis müavini qeyd edib ki, layihənin əsas nailiyyətlərdən biri də  iki ölkə sərhədçiləri arasında əlaqələrin daha da sıxlaşmasıdır: “Bu əlaqələr çərçivəsində əməkdaşlıq bundan sonra da davam etdiriləcək”. 

“Azərbaycan və Gürcüstan arasında quru sərhədinin mühafizəsinin daha yaxşı əlaqələndirilməsi” adlı üç illik layihə Avropa İttifaqı, BMTİnkişaf  Proqramı və Azərbaycan və Gürcüstan hökumətlərinin dəstəyi ilə həyata keçirilib.

5 milyon avrodan çox büdcəsi olan  layihənin əsas məqsədi regionda ümumi təhlükəsizliyə müsbət təsir göstərməklə Azərbaycan və Gürcüstan arasında quru sərhəddə əlaqələndirilmiş tədbirlər mexanizmini yaratmaq və tətbiq etmək üçün hər iki ölkənin sərhəd orqanlarının fəaliyyət potensialını daha da inkişaf etdirməkdən ibarətdir.

Layihənin nəticələrinin təqdimat konfransında çıxış edən Avropa İttifaqının (Aİ) Gürcüstandakı nümayəndəliyinin rəhbərinin müavini Karlo Natale bildirib ki, layihə Aİ-nin Şərq Tərəfdaşlığı proqramı çərçivəsində həyata keçirilib: “Biz ölkələrə qaçaqmalçılıq və  trafikinqlə mübarizədə daha effektiv vasitələrdən istifadə etmək, regional və qlobal əməkdaşlığın möhkəmləndirilməsində kömək edirik”.

BMT İnkişaf  Proqramının Gürcüstandakı rəhbəri Niels Skott  regionda davamlı inkişafın təşviq olunması istiqamətində layihənin əhəmiyyətini qeyd edib: “Müasir sərhədlər insanların yeni bazarlara daxil olması, ticarət, turizm, təhsil və iqtisadi əməkdaşlıq üçün açıq qapı rolunu oynayır”.

Gürcüstan və Ermənistan parlamentlərarası əməkdaşlığın daha da inkişaf etdirilməsi barədə razılığa gəlib. 
 

APA-nın yerli bürosunun xəbərinə görə, bu barədə Gürcüstan parlamentinin sədri İrakli Kobaxidze erməni həmkarı Ara Babloyanla keçirdiyi görüşdən sonra deyib. “Şadıq ki, Gürcüstan və Ermənistan arasında münasibətlər dinamik inkişaf edir və məhsuldardır. Gürcüstan üçün qonşu ölkələrlə tərəfdaşlıq və dostluq münasibətlərinin qurulması əsas prioritetlərdən biridir”, - deyə o, söyləyib.

 
Erməni spiker A. Babloyan  isə öz növbəsində qeyd edib ki, iki ölkə arasında münasibətlər yeni mərhələyə keçib: “Bu gün ölkələr arasında müxtəlif sahələrdə münasibətlər dinamik inkişaf edir. Əməkdaşlığın daha da inkişaf etdirilməsi üçün böyük imkanlar var. Görüşdə ikitərəfli və çoxtərəfli münasibətlərin perspektivkləri müzakirə olunub”.