Azərbaycan prezidenti, Silahlı Qüvvələrin Ali Baş Komandanı İlham Əliyevin təsdiq etdiyi plana əsasən sentyabrın 18-də müxtəlif qoşun növlərinin və qismlərinin iştirakı ilə genişmiqyaslı təlimlər başlayır.

APA-nın Müdafiə Nazirliyin saytına istinadən verdiyi məlumata görə, təlimlərə 15.000 nəfərədək şəxsi heyət, 150-dən artıq tank və zirehli texnika, 120-dək müxtəlif çaplı raket və artilleriya qurğusu, reaktiv yaylım atəş sistemi və minaatan, 20 ədəd müxtəlif təyinatlı döyüş aviasiyası, eləcə də yeni növ radioelektron kəşfiyyat vasitələri və pilotsuz uçuş aparatları cəlb olunacaq.

Mürəkkəb dağlıq relyef və radioelektron, həmçinin təlimlərin niyyəti ilə müəyyən edilmiş digər xarakterik xüsusiyyətlər şəraitində keçirilən təlimlərdə qoşunlar müasir ümumqoşun əməliyyatlarının keçirilməsinin müxtəlif üsullarının icrası üzrə bacarıq və vərdişləri praktiki olaraq təkmilləşdirəcəklər.
 

Təlimlərin müvafiq mərhələləri zamanı müxtəlif poliqonlarda yeni silah sistemlərinin də istifadəsilə döyüş atışlarının keçirilməsi nəzərdə tutulur.
 

Təlimlər sentyabrın 22-dək davam edəcək.

https://youtu.be/1LC5HoGCNog

Gürcüstanın müxalif Vətənpərvərlər Alyansı Partiyası Tbilisidə “Qızılgül inqilabı” meydanında kütləvi etiraz aksiyası keçirib.

APA-nın Gürcüstan bürosunun məlumatına əsasən, aksiya iştirakçıları konstitusiya islahatlarının həyata keçirilməsi, Rusiya ilə dialoqun başlanması və sosial problemlərin həll olunmasını tələb ediblər.

Bəzi etirazçılar aclıq aksiyasına başlayıb. Partiyanın liderlərindən biri, parlamentin vitse-spikeri və Tbilisi meri vəzifəsinə namizəd İrma İnaşvili analoji etiraz aksiyalarının davamlı olacağını bildirib. İ.İnaşvili partiyanın Gürcüstanın Rusiya ilə yeni münasibətlərə başlamasının da tərəfdarı olduğunu deyib: “Bunun üçün Rusiya ilə dialoq lazımdır. Dialoqa alternativ yoxdur”.

Aksiya Azadlıq meydanına qədər “Yaşasın Gürcüstan” şüarı ilə yürüşlə davam etdirilib. Partiya Tbilisi ilə yanaşı etiraz aksiyalarını Batumidə də keçirəcək.

Gürcüstanın “Leyboristlər partiyası” Tbilisi meri vəzifəsinə namizədini irəli sürüb.

APA-nın yerli bürosunun məlumatına əsasən, gürcü leyboristlərinin namizədi partiyanın siyasi katibi Giorgi Quqavadır.  
 

Bununla da Tbilisi meri vəzifəsinə namizədlərin sayı doqquza çatıb.
 

Qeyd edək ki, Tbilisi meri postuna hakim Gürcü Arzusu Partiyası keçmiş energetika naziri Kaxa Kaladzenin, müxalif Vahid Milli Hərəkat Partiyası jurnalist Zaal Udumaşvilinin, müxalif Avropalı Gürcüstan Partiyası Elene Xoştariyanın, Quruculuq Hərəkatı Partiyası Tengiz Şerqelaşvilinin, Vətənpərvərlər Alyansı Partiyası parlamentin vitse-spikeri İrma İnaşvilinin, Demokratik Hərəkat və Azad Gürcüstan partiyaları Kaxa Kukavanın, müxalif “Yeni Gürcüstan” partiyası isə Giorgi Vaşadzenin namizədliyini irəli sürüb.
 

Oktyabrın 21-də keçiriləcək yerli idarəetmə seçkilərində müstəqil namizəd Aleko Elisaşvili də mübarizə aparacaq.

Müxalif “Avropa Gürcüstanı” partiyası azərbaycanlıların sıx yaşadığı Qardabani rayonunda icra başçısı vəzifəsinə namizədini təqdim edib. 

APA-nın yerli bürosunun məlumatına əsasən, bu vəzifəyə Telman Həsənovun namizədliyi irəli sürülüb.

T. Həsənovu seçicilərə partiyanın lideri David Bakradze təqdim edib. Təqdimat mərasimində Qardabani rayonunda mövcud sosial və infrastruktur problemlərə toxunulub. 
 

Qeyd edək ki, müxalif “Avropa Gürcüstanı” partiyası azərbaycanlıların sıx yaşadığı Marneuli rayonunun icra başçısı vəzifəsinə Əhməd İmanquliyevin namizədliyini irəli sürüb.

Gürcüstanda yerli idarəetmə seçkiləri oktyabrın 21-də keçiriləcək.

Bu gün Bakıda "Azəri-Çıraq-Günəşli" (AÇG) yataqlar blokunun işlənməsi üzrə Hasilatın Pay Bölgüsü sazişinin (PSA) 2050-ci ilə qədər uzadılmasını nəzərdə tutan sazişin imzalanması ilə əlaqədar keçirilən mərasimdə Gürcüstanın baş naziri Giorgi Kvirikaşvilinin təbriki oxunub.

 
APA-nın məlumatına görə, Gürcüstanın baş naziri G. Kvirikaşvili sazişin imzalanmasının tarixi hadisə olduğunu vurğulayıb. Baş nazir "Azəri-Çıraq-Günəşli" (AÇG) yataqlar blokunun işlənməsi üzrə Hasilatın Pay Bölgüsü sazişinin (PSA) 2050-ci ilə qədər uzadılmasının ölkələr arasında əməkdaşlığın inkişafına, rifaha xidmət edəcəyini bildirib.

Gürcüstan azərbaycanlıları Tbilisidə parlament binasının qarşısında Myanmarda müsəlmanların kütləvi qətlə yetirilməsinə etiraz olaraq aksiyası keçiriblər.

APA-nın Gürcüstan bürosunun məlumatına əsasən, Gürcüstan Müsəlmanları Ali Dini İdarəsinin sədri Seyid Mirtağı Musəvi Myanmarda müsəlmanlara qarşı zorakılığa son qoymağa, dünya ictimaiyyətini diqqətini bu faciəyə yönəltməyə çağırıb.

Aksiyaya Gürcüstanın azərbaycanlıların sıx yaşadıqları Marneuli və Qardabani rayonlarından da vətəndaşlar və din xadimləri qatılıb. Aksiya iştirakçıları "Myanmarda müsəlmanların soyqırımına yox" şüarı səsləndiriblər. 

Aksiyaya Gürcüstan Yevangelist-baptist kilsəsinin yepiskopu Malxaz Sonqulaşvili də qatılıb. O, Myanmardakı hadisələri kəskin pisləyib.

Aksiyanın sonunda qətnamə qəbul olunub.

Sənəd  BMT-nin Gürcüstandakı nümayəndəliyinə təqdim ediləcək.