Gürcüstanda oktyabrın 21-də keçiriləcək yerli idarəetmə orqanlarına seçkilər üçün bu gündən seçki bülletenlərinin çapına başlanılıb.

APA-nın yerli bürosunun məlumatına əsasən, Gürcüstanın Mərkəzi Seçki Komissiyasının mətbuat katibi Ana Mikeladze bildirib ki, ümumilikdə 9 546 450 bülleten çap olunacaq: “Bülletenlərin çapı doqquz nəşriyyatda beynəlxalq və yerli müşahidəçilərin nəzarəti altında həyata keçiriləcək. Seçicilərə seçki məntəqələrində partiya və ya seçki blokunun, sakrebulonun majoritar qaydada üzvünün və şəhər meri və rayon icra başçısının seçilməsi üçün üç növ bülleten təqdim olunacaq”.

Onun sözlərinə görə, bülletenlər Azərbaycan və erməni dillərində də çap olunacaq.

“Gürcü-Azərbaycan dilində çap olunacaq bülletenlər 208, gürcü-erməni dilində olanlar isə 133 seçki məntəqəsinə paylanılacaq. Həmçinin dörd seçki məntəqəsi üçün gürcü-Azərbaycan-erməni dilində bülletenlər çap olunacaq”, - deyə A.Mikeladze söyləyib.  

Qeyd edək ki, son seçki siyahısında 3 440 123 nəfər seçici qeydiyyata alınıb.

Gürcüstan parlamenti prezident Giorgi Marqvelaşvilinin vetosunu aradan qaldıraraq, Konstitusiyaya düzəlişlər barədə qanunu qəbul edib. 

Dalga tv APA-nın yerli bürosuna istinadən məlumatına görə, qanun layihəsinin lehinə 117, əleyhinə isə 7 deputat səs verib.

Yeni dəyişikliklərə əsasən, Gürcüstanda parlament seçkiləri və prezidentin seçilməsi proseduru dəyişir. Deputatlar proporsional seçki sistemi ilə, prezident isə birbaşa deyil, 300 üzvü olacaq xüsusi seçki kollegiyası tərəfindən seçiləcək.

Yenilənmiş Konstitusiya 2018-ci ilin prezident seçkilərindən sonra qüvvəyə minəcək. Lakin proporsional sistem növbəti seçkilərdə yox, ondan sonrakı seçkilərdə tətbiq ediləcək.

Silahlı Qüvvələrin 2017-ci il üçün hazırlıq planına uyğun olaraq Raket və Artilleriya birləşmələrinin döyüş vərdişlərinin təkmilləşdirilməsi məqsədilə təlimlər keçirilib.
Müdafiə Nazirliyindən Sonxeber.az-a verilən məlumata görə, döyüş şəraitinə uyğun vəziyyətdə keçirilən təlimlərdə artilleriya bölmələrinin marşı icra etməsi, cəmləşmə rayonlarına çıxarılması, qərarların qəbul olunması, gizliliyə riayət etməklə atəş və start mövqelərinin tutulması, döyüşün gedişində yerdəyişmə və digər tapşırıqlar yerinə yetirilib.
Təlimlərdə praktiki döyüş atışlarının dəqiqliyini və intensivliyini təmin etmək məqsədilə müasir avtomatlaşdırılmış idarəetmə sistemlərindən və atəşin korrektə edilməsi üçün pilotsuz uçuş aparatlarından istifadə edilib.

“Gürcüstanın Müdafiə Nazirliyinin həyata keçirdiyi fundamental islahatlar çox uğurludur”.

APA-nın Gürcüstan bürosunun məlumatına görə, bunu NATO-nun baş katibinin Qafqaz və Mərkəzi Asiya üzrə xüsusi nümayəndəsi Ceyms Appaturay Gürcüstanın müdafiə naziri Levan İzoriya ilə görüşdə deyib. O bildirib ki, NATOGürcüstanda islahatlar prosesini dəstəkləmək üçün səylərini əsirgəməyəcək: “NATO və Gürcüstan arasında əməkdaşlığın müxtəlif istiqamətləri var. Biz NATO-ya üzv ölkələrin nazirlərinin görüşünü və gələn il NATO sammitini gözləyirik. Bunların hamısı Gürcüstanın NATO-ya inteqrasiyasında irəliləyişə nail olmağa kömək edəcək”.

L. İzoriya öz növbəsində NATO-nun xüsusi nümayəndəsini Gürcüstana avroatlantik inteqrasiya istiqamətində göstərdiyi böyük dəstəyə görə təşəkkür edərək qeyd edib ki, Gürcüstan alyansın strateji tərəfdaşı olaraq təhlükəsizliyin təmin olunması üzrə səyləri davam etdirir. 

"Gürcüstanla yanaşı, region da təhlükəsizlik problemləri ilə üzləşir və təəssüf ki, bu, bütün dünya üçün ümumi olub”.

APA-nın yerli bürosunun məlumatına görə, bunu Gürcüstanın baş naziri Giorgi Kvirikaşvili Batumidə müdafiə və təhlükəsizlik məsələləri ilə bağlı keçirilən konfransda deyib.

Baş nazir bildirib ki, sülh və sabitliyin qorunub saxlanması daha çox səylər tələb edir: “Bu gün bu problemlərin öhdəsindən gəlmək üçün daha dərin müzakirələrə ehtiyac var. Bizim təhlükəsizlik üzrə konfrans bu cür müzakirələrin keçirilməsi üçün əhəmiyyətli regional formata çevrilib”.

  
G. Kvirikaşvili Gürcüstanın döst ölkə və tərəfdaşlarına dəstəyə görə təşəkkür edərək qeyd edib ki, bu, ölkə üçün çox vacibdir: “Yalnız bu yolla biz təkcə ölkədə deyil, bütün regionda sülh, təhlükəsizlik və davamlı inkişafı təmin edə bilərik”. 

Gürcüstanın ərazilərinin işğalına toxunan baş nazir deyib ki, Rusiyanın ölkəyə qarşı aqressiyası davam etməkdədir: “Rusiyanın aqressiv siyasəti etnik diskriminasiya və təmizləmə kimi proseslərdə özünü göstərir. Təxribatçı addımlara baxmayaraq, Gürcüstan 2008-ci ildə əldə olunmuş atəşkəs rejimi ilə bağlı sazişə sadiqdir və Rusiyanın beynəlxalq norma və prinsiplər əsasında öhdəliklərinin yerinə yetirməsinə nail olmaq üçün diplomatik addımlar atır”.

Gürcüstan prezidenti Giorgi Marqvelaşvili beynəlxalq tərəfdaşları Rusiyaya qarşı ümumi strategiya hazırlamağa çağırıb.

APA-nın yerli bürosunun məlumatına əsasən, belə bir bəyanatla dövlət başçısı Batumidə müdafiə və təhlükəsizlik məsələləri ilə bağlı keçirilən konfransda çıxış edib.

O, beynəlxalq ictimaiyyəti Rusiyanın regionda, o cümlədən Gürcüstanda aqressiv və təxribatçı siyasətinə cavab və reaksiya verəcək ümumi strategiya hazırlamağa çağırıb: “Gəlin, Rusiyanın qonşularına qarşı siyasətinə aydın cavablar verəcək vahid strategiya yaradaq. Dünyanın üstün maraqlar sferalarına bölünməsi yalnız Rusiyanın qonşuları üçün deyil, dünya miqyasında da təhlükə yaradır”. 

G. Marqvelaşvili həmçinin qeyd edib ki, Gürcüstanın Avropa və NATO-ya inteqrasiya prosesi davam edir: “Paralel olaraq biz demokratik prosesləri davam etdiririk. Gürcüstanın üzləşdiyi problemlərə baxmayaraq, ölkəmiz  məsuliyyətli beynəlxalq oyunçu olaraq dünyada sabitlik və təhlükəsizliyi təmin edən beynəlxalq missiyalarda fəal iştirak edir”.