Bakıda keçiriləcək Avropa Oyunları ilə bağlı media nümayəndələri üçün oktyabrın 27-də ilkin təqdimat keçirilmişdir.
AzərTAc xəbər verir ki, təşkilatçılar 2015-ci ildə Bakıda ilk Avropa Oyunlarının keçirilməsi üçün istifadə olunacaq məkan və yerlərin bəzilərini ilk dəfə olaraq ictimayyətə açıqlamışlar.
Bu məqsədlə Bakıda idman tədbirlərinin keçiriləcəyi bir sıra yerlərə yerli və xarici jurnalistlərin turu təşkil edilmişdir.
Tədbirə rəhbərlik edən Avropa Olimpiya Komitəsinin prezidenti Patrik Hikki bildirmişdir: “Olimpiya kəndində lazımi qaydada qurulmuş otaqlar və yaşayış sahələri 2015-ci ildə Bakıda keçiriləcək ilk Avropa Oyunlarında iştirak edəcək atletlər üçün mümkün qədər ən gözəl şəraitlərin təmin edilməsinə yönəlmiş düşüncənin sübutudur".
Media turu Bakıda planlaşdırılan unikal oyunlar təcrübəsinə nəzər salmaq imkanı yaratmışdır. Eyni zamanda, turda Bakı İdman Zalı, Azadlıq meydanı, Gimnastika arenası və Olimpiya stadionunun görüntüləri təqdim olunmuşdur. Bu isə Avropa Oyunlaır üçün məkanların hazırlanması və tikintisi işində böyük irəliləyiş olduğunu göstərir.
Azərbaycanın gənclər və idman naziri Azad Rəhimov qeyd etmişdir ki, atletlərin yüksək keyfiyyətli məkanlarla təmin edilməsi üçün gələn aylar ərzində stadionların və idman mərkəzlərinin yoxlanılmasına və mükəmməl şəkildə uyğunlaşdırılmasına diqqət yetiriləcəkdir. Azərbaycan hökuməti Avropa Oyunların beynəlxalq idman təqvimində mühüm tədbir kimi göstərmək, eləcə də yeni hava limanı terminalını, 13 nəqliyyat layihəsini, o cümlədən bir çox digər infrastruktur və şəhərin abadlaşdırılması layihələrini nümayiş etdirmək üçün Bakının hər yerində genişmiqyaslı hazırlıq işlərinə sərmayə qoyur.

Qazaxıstanın Almatı şəhərində keçirilən boks üzrə dünya çempionatına bu gün yekun vurulub.

Apasport.az saytının məlumatına görə, yarışın son günündə Azərbaycan komandasının heyətində Cavid Çələbiyevin (56 kq) ardınca Məmmmədrəsul Məcidov da birinci olub.

+91 kq çəki dərəcəsində yarışan boksçumuz yerli İvan Dıçko ilə döyüşdən sonra kolleksiyasına dünya çempionatının daha bir qızıl medalını əlavə edib. O, həlledici görüşünü nokautla başa vuraraq titulunu qoruyub. M. Məcidov ilk 2 raundda 27:30 hesabı ilə uduzub. Sonuncu hissədə isə idmançımız hücum taktikasını seçərək yenidən dünyanın ən güclüsü olduğunu sübut edib. Öncə Dıçkonu nokdauna salan Olimpiya mükafatçımız ardınca daha tutarlı zərbə ilə qazaxıstanlı idmançıya doğma azarkeşləri qarşısında nokautla qalib gəlib.

Beləliklə, Azərbaycan milli komandası 12 gün davam edən dünya çempionatını 2 qızıl və 1 bürünc medalla başa vurub.

Qeyd edək ki, daha öncə Teymur Məmmədov (91 kq) bürünc medala sahib olmuşdu.

“Qalatasaray” futbol komandasının ulduz futbolçusu Didye Droqba növbəti mövsüm də böyük ehtimalla bu komandanın uğurları üçün çalışacaq. APA-nın xəbərinə görə, “Qalatasaray” prezidenti Ünal Aysal klubun telekanalına müsahibəsində Fil Dişi Sahilindən olan futbolçuya yeni müqavilə təklif etməyə hazırlaşdıqlarını söyləyib. O bildirib ki, 36 yaşlı ulduz karyerasına davam etmək istəyir.

Didye Droqbanın da cavabı gecikməyib. O qeyd edib ki, Ünal Aysalın açıqlamasını sevinclə qarşılayıb və rəhbərliyin təklifini qəbul etməyə hazırdır.

Qeyd edək ki, bu ilin yanvar ayında “Qalatasaray”a transfer olan D. Droqbanın müqaviləsi 1,5 illik idi və bu mövsümün sonunda bitəcək.