Bakı-Tiflis-Qars (BTQ) dəmir yolu bağlantısı layihəsinin icrasında marşrut boyunca torpaq sahələrinin alınması ilə bağlı problem artıq çoxdan həll olunub və bu layihə üçün bu cür maneələr yoxdur.

APA-nın məlumatına görə, bunu jurnalistlərə açıqlamasında Bakıda səfərdə olan Gürcüstanın iqtisadi və dayanaqlı inkişaf naziri Georgi Kvirikaşvili bildirib: «Layihə vaxtında istismara veriləcək. Test qatarı 2014-cü ilin sonunda dəmir yoluna buraxılacaq və 2015-ci ildə layihə təhvil veriləcək».

Nazirin sözlərinə görə, bu gün Bakıda keçirilən ikitərəfli Əlaqələndirmə Şurasının iclasında görülən işlər müzakirə olunub və mövcud problemlər həll olunub: «Bu layihə Gürcüstan, Azərbaycan və Türkiyə üçün strateji əhəmiyyət daşıyır. Düşünürəm ki, layihə əlavə yükdaşımaları cəlb edəcək və ölkələrimiz arasında qonşuluq, dostluq və kommersiya əlaqələrini gücləndirəcək».

G.Kvirikaşvili əlavə edib ki, artıq bu gün Mərkəzi Asiya ölkələri və Çin bu layihəyə böyük maraq göstərir: «Tam əminəm ki, BTQ layihəsi perspektivli olacaq. Bu dəmir yolunun tikintisi ilə bağlı verilən qərar müdrik idi və Azərbaycan, Gürcüstan və Türkiyə arasında əməkdaşlıq əlaqələrini yeni səviyyəyə qaldıracaq. Gürcüstan hər şey edəcək ki, işlərini vaxtında başa çatdırsın».

İstanbulda Yaşar Doğunun xatirəsinə həsr olunmuş beynəlxalq güləş turniri davam edir.
AzərTAc xəbər verir ki, 42-ci dəfə keçirilən turnirdə sərbəst güləş üzrə Azərbaycan yığma komandası da iştirak edir.
Turnirin ilk günündə yığma komandamızın üzvləri 1 qızıl, 1 gümüş və 1 bürünc medala sahib olmuşlar.
Keçirdiyi bütün görüşləri qələbə ilə başa vuran Olimpiya mükafatçımız Xetaq Qazyumov (97 kq) turnirin qalibi olmuşdur. O, ardıcıl olaraq Türkiyə yığmasının 5 güləşçisini mübarizədən kənarlaşdırmışdır. Turnirdə 97 kiloqram çəki dərəcəsində mübarizə aparan digər təmsilçimiz Roman Bəkirov isə bürünc medal qazanmışdır.
Məhəmməd Müslümov (65 kq) da rəqiblərindən üstün olmuş və finala yüksəlmişdir. Ancaq həlledici görüşdə İtaliya güləşçisinə uduzan təmsilçimiz gümüş medalla kifayətlənmişdir. Bu çəkidə digər təmsilçimiz Ağahüseyn Mustafayev ardıcıl iki türkiyəli rəqibini üstələsə də, yarımfinalda İtaliya güləşçisinə uduzmuşdur. Bürünc medal uğrunda həlledici görüşü də məğlub başa vuran güləşçimiz turniri beşinci sırada tamamlamışdır.
Turnirə fevralın 16-da yekun vurulacaqdır.

İspaniya kubokunun yarımfinal mərhələsinin cavab oyunlarına yekun vurulub.

Dalgatv-nin Qol.Az-a istinadən verdiyi xəbərə görə, son oyun günündə "Real Sosyedad" və "Barselona" komandaları üz-üzə gəlib.

İlk görüşdə səfərdə rəqibinə 0:2 hesabı ilə uduzan "Real Sosyedad" klubu doğma meydanda həmin məğlubiyyətin əvəzini çıxa bilməyib. Bu oyunda rəqibi ilə 1:1 bərabərə qalan "Barselona" finala yüksəlib.

Qeyd edək ki, İspaniya kubokunun finalında "Barselona" və "Real" (Madrid) klubları üz-üzə gələcək.

FİFA milli komandaların növbəti reytinq cədvəlini açıqlayıb.

Dalgatv-nin Qol.Az-a istinadən verdiyi xəbərə görə, Azərbaycan millisinin mövqeyində yenə də dəyişiklik baş verməyib.

Fevral ayında heç bir matç oynamayan Berti Foqtsun komandası 363 xala 94-cü pillədə qərarlaşıb. Türkiyə yığması isə ötən ayla müqayisədə iki pillə geriləyərək 45-ci pilləyə düşüb.

Qeyd edək ki, siyahıya yenə də İspaniya millisi başçılıq edir. Almaniya yığması mövqeyini qoruyaraq ikinci, Argentina isə üçüncüdür.

Rusiyada keçirilən Olimpiadada bir ilk qeydə alınıb.

Dalgatv-nin Anspress-ə  istinadən verdiyi xəbərə  görə, qadınlar arasında dağ xizəyi üzrə yarış Olimpiada tarixinə keçib. Belə ki, ilk dəfə olaraq yarışın qızıl medalına eyni anda iki idmançı sahib çıxıb. Dominik Gisin və Tina Maze oyunu eyni nəticə ilə tamamlayıblar. Onlar 2,7 km-lik yarışı bir dəqiqə 41.57 saniyə ilə bitiriblər.

Soçi Olimpiyadasında iştirak edən Gisin İsveçrə, Maze isə Sloveniya təmsilçisi olub. İkinci pillənin sahibi olmayan yarışda bürünc medalın sahibi Lara Gut olub.

Sloven atlet bir qızıl medala iki idmançının qazanmasında pis bir şey olmadığını deyib. “Tam əksinə. Bu hal mənim xoşuma gəldi. Çünki Dominique ilə yaxın dostuq".

Norveç millisi XXII Soçi Qış Olimpiya Oyunlarının medal sıralamasında yenidən birinci pilləyə yüksəlmişdir.
AzərTAc xəbər verir ki, 88 ölkədən 2800-dən artıq idmançının qatıldığı Olimpiya Oyunlarında Norveç millisinin hesabında bu günədək 4 qızıl, 3 gümüş və 4 bürünc medal vardır.
Kanada yığması 9 medalla (4-3-2) ikinci, Almaniya millisi isə 5 medalla (4-1-0) üçüncü pillədə qərarlaşmışlar.
Artıq XXII Qış Olimpiya Oyunlarında 22 ölkədən idmançılar medal qazanmışlar.
Olimpiya Oyunlarına fevralın 23-də yekun vurulacaqdır.