Bakıda Gənclər və İdman Nazirliyinin və Azərbaycan Şahmat Federasiyasının birgə təşkilatçılığı ilə Azərbaycanın Dövlət Müstəqilliyi Gününə həsr olunmuş “Baku Open-2013” Beynəlxalq şahmat festivalı keçirilmişdir.
Azərbaycan Şahmat Federasiyasından AzərTAc-a bildirmişlər ki, festivalın “A” və “B” qruplarında ölkəmizlə yanaşı, 18 ölkədən 224 şahmatçı qələbə uğrunda mübarizə aparmışdır. Onlardan 33-cü beynəlxalq qrossmeyster, 28-i beynəlxalq usta və 9-u FİDE ustasıdır.
Çempionatın “A” (güclülər) turnirində qalib adını hesabına yeddi xal yazan Rusiya şahmatçısı Pavel Smirnov qazanmışdır. Belaruslu Sergey Zhiqalko və Rusiya şahmatçısı Aleksey Dreev 6,5 xal toplayaraq ikinci-üçüncü yerləri bölüşdürmüşlər. Qadınlar arasında isə ən yaxşı nəticəni həmyerlimiz Nərmin Kazımova və İran şahmatçısı Atousa Pourkaşiyan (4,5 xal) göstərmişlər.
Yarışın “B” qrupunda isə Fariz Əhmədov və Elxan Bayramov səkkiz xal toplayaraq birinci-ikinci yerləri bölüşdürmüşlər. Əlavə göstəricilərə görə Fariz Əhmədov birinci yerin sahibi olmuşdur.
İsveçrə sistemi üzrə keçirilmiş turnirin ümumi mükafat fondu 50 min ABŞ dolları təşkil etmişdir.

26 yaşlı argentinalı futbolçu Lionel Messi və onun atası İspaniya xəzinəsinə təxminən 4 milyon avro məbləğində vergi ödəməməkdə təqsirləndirilir.
Prokurorluğun məlumatına görə onlar 2007-2009-cu illərdə Messinin fotoşəkillərindən istifadə etmək hüququnu satmaq üçün xaricdəki şirkətlərdən istifadə etmişlər.
Vergi ödəməkdən yayınmaqda təqsirləndirilən “Barselona” komandasının hücumçusu Lionel Messi və atası Xorxe İspaniyada məhkəmə qarşısında cavab verməli olacaqlar.
Ata və oğul Messilər yerli vergi müfəttişliyinə sanballı məbləğdə cərimə ödəmələrinə baxmayaraq, məhkəmədən yaxa qurtara bilməmişlər.
Onlar hər ikisi bu ittihamları inkar edir. İndi onları Barselona məhkəməsində istintaq gözləyir.
Messilər ailəsi avqust ayında vergi müfəttişliyinə 5 milyon avro (ödəmədikləri verginin müvafiq faizlərlə birlikdə məbləğini) ödəmişdir. Başqa məlumatlara görə, cərimənin ümumi məbləği 25 milyon avroya bərabər olmuşdur. Lakin prokurorluq işə xitam vermək istəmir, çünki iqtisadi böhran başlayandan vaxtdan İspaniya vergi müfəttişliyi vergiləri ödəməkdən yayınanlar barəsində çox sərt siyasət yeridir.
Bu ittihamlar başqa futbol ulduzlarının çoxundan fərqli olaraq indiyə qədər sadə insan hesab edilən Lionelin nüfuzuna xələl gətirə bilər.

2020-ci ildə keçiriləcək Yay Olimpiya Oyunlarının paytaxtı Tokio seçilib.

Müvafiq qərar Buenos-Ayresdə Beynəlxalq Olimpiya Komitəsinin (BOK) üzvləri arasında keçirilən səsvermə zamanı qəbul edilib.

“Bütün müraciətlər yüksək səviyyədə idi. Lakin qalib bir olmalıdır. BOK bəyan edir ki, Olimpiya Oyunları-2020-nin paytaxtı Tokio olacaq”, - deyə səsvermənin nəticələrini elan edən BOK prezidenti Jak Roqqe bildirib.

Qeyd edək ki, Yay Olimpiya Oyunlarının paytaxtı olmaq uğrunda Tokio, İstanbul və Madrid mübarizə aparıb.

"Dünya Çempionatı-2014"ün seçmə mərhələsi çərçivəsində növbəti oyunlar keçirilib. D qrupunda Türkiyə millisi yeni baş məşqçisi Fatih Terimlə seçmə mərhələdə Andorra ilə qarşılaşıb.

Modern.az xəbər verir ki, qardaş ölkə komandası Andoranı 5:0 hesabı ilə məğlub edib. Bu qələbədən sonra Türkiyənin xalı 10-a yüksəlib. İndi Türkiyə sentyabrın 10-da Rumıniyada bu ölkə yığması ilə qarşılaşmda mütləq qələbə qazanmalıdır ki, Dünya Çempionatına gedən yolu açılsın. Rumıniyanın hazırda 13 xalı var.

Əks halda Türkiyə millisi "Dünya Çempionatı-2014"ə çıxa bilmək imkanlarından məhrum olacaq.

Amerika Açıq Tennis turnirinin 11-ci yarış günündə sürpriz yaşanıb.

Son çempion Endi Marrey dünya tennis reytinqində 9-cu sırada gedən Stansilav Vavrinkaya məğlub olaraq yarım finala adlamaq şansını qaçırıb. Hər 3 setdə də rəqibinə uduzan Marrey titulunu da qorumaya bilməyib.