Müdafiə Nazirliyi monitorinq zamanı Azərbaycan tərəfinin guya atəşkəs rejimini pozması barədə Ermənistan Xarici İşlər Nazirliyinin mətbuat xidmətinin rəhbəri Tiqran Balayanın yaydığı məlumata cavab verib.

Nazirliyin mətbuat xidmətindən Sonxeber.az-a bildirilib ki, Ermənistan tərəfinin yaydığı bu məlumat yalan və dezinformasiyadır: "Monitorinqdə iştirak edən beynəlxalq missiyanın nümayəndələri də atəşkəs rejiminin pozulması faktı qeydə almayıblar".

Qeyd edək ki, ATƏT-in fəaliyyətdə olan sədrinin şəxsi nümayəndəsinin mandatına uyğun olaraq, avqustun 31-də Azərbaycan və Ermənistan dövlət sərhədinin Tovuz rayonu istiqamətində monitorinq keçirilib.

MN-dən bildirilib ki, monitorinq insidentsiz başa çatıb.

Ermənistan silahlı qüvvələrinin bölmələri cəbhənin müxtəlif istiqamətlərində iriçaplı pulemyotlardan da istifadə etməklə, sutka ərzində atəşkəs rejimini 130 dəfə pozub.

 Dalga tv-nin  Müdafiə Nazirliyinin saytına istinadən verdiyi xəbərə görə, Ermənistan ordusu Noyemberyan rayonunun Şavarşavan kəndində və adsız yüksəkliklərdə, İcevan rayonunun Paravakar kəndində və adsız yüksəkliklərdə yerləşən mövqelərindən Ağstafa rayonunun Köhnəqışlaq, Qazax rayonunun Kəmərli, Qaymaqlı, Fərəhli, Bala Cəfərli kəndlərində; Berd rayonunun Ayqepar, Mosesqex, Çinari kəndlərində və adsız yüksəkliklərdə yerləşən mövqelərindən Tovuz rayonunun Ağdam, Koxanəbi, Qaralar kəndlərində və adsız yüksəkliklərdə; Krasnoselsk rayonu ərazisindəki adsız yüksəkliklərdə yerləşən mövqelərindən Gədəbəy rayonu ərazisindəki adsız yüksəkliklərdə yerləşən mövqelərimizi atəşə tutub.

İşğalçılar Tərtər rayonunun işğal altında olan Göyarx, Çiləbürt, Yarımca, Ağdam rayonunun Tağıbəyli, Şıxlar, Baş Qərvənd, Cəvahirli, Qaraqaşlı, Sarıcalı, Novruzlu, Mərzili, Xocavənd rayonunun Kuropatkino, Füzuli rayonunun Aşağı Veysəlli, Qobu Dilağarda, Qərvənd, Qaraxanbəyli, Aşağı Seyidəhmədli, Qorqan, Kürdlər, Horadiz, Cəbrayıl rayonunun Nüzgar və Mehdili kəndləri yaxınlığında, həmçinin Goranboy, Tərtər, Ağdam, Xocavənd və Füzuli rayonları ərazisindəki adsız yüksəkliklərdə yerləşən mövqelərindən də Azərbaycan Silahlı Qüvvələrinin mövqelərini atəşə məruz qoyub.

“Dəniz kuboku - 2017” müsabiqəsində iştirak edən Azərbaycan, Rusiya, İran və Qazaxıstanın hərbi gəmilərinin heyətləri dəniz hədəflərinə artilleriya atışları yerinə yetiriblər.

Dalga tv Oxu.Az-a istinadən xəbər verir ki, bu barədə Müdafiə Nazirliyinin mətbuat xidməti məlumat yayıb.

Müsabiqənin şərtlərinə görə döyüş atışları 3,5 kilometr məsafədən icra olunub və tapşırıqların yerinə yetirilməsi faktı beynəlxalq hakimlər briqadası tərəfindən təsdiq edilib.

Tapşırığın icrasına görə yekun nəticə atışlar zamanı dəniz poliqonunda müəyyən edilmiş məsafəni qət edərkən hər bir gəminin sürəti nəzərə alınmaqla bazar ertəsi hakimlər tərəfindən müəyyən ediləcək.

Azərbaycan Türkiyədən pilotsuz uçuş aparatlarını məhv etmək gücündə olan "Drone Killer" silahını alıb.

Bu barədə Türkiyə ordusunun silah arsenalı üçün pilotsuz aparatlar, elektronik cihazlar və robot sistemləri istehsal eən "Harp Age" şirkətinin baş kordinatoru Aytekin Güçlü deyib.

Onun sözlərinə görə, "Drone Killer" silahı yexni texnologiyalar əsasında hazırlanıb.

"Bu silahdan almaq üçün müxtəlif ölkələrdən, xüsusilə Afrika və yaxın Şərq ölkələrindən təkliflər gəlib. İlk ixrac edən ölkə Azərbaycandır", - deyə o bildirib.

"Drone Killer" hücum edən pilotsuz uçuş aparatlarını anında məhv etmək, həmçinin, bu aparatları təsirsiz vəziyyətə salmaq gücünə sahibdir.

Qeyd edək ki, erməni hərbi birləşmələri pilotsuz aparatlar vasitəsilə zaman-zaman həm kəşfiyyat, həm də hücum xarakterli təxribatlara əl atır. Hətta sərhədboyu ərazilərdə yaşayan mülki əhaliyə pilotsuz aparatlardan da hücumlar edilir. "Drone Killer" düşmənin texnikasını məhv etmək baxımından kifayət qədər güclü silahdır.

Türkiyə Eksportçuları Şurasının saytında yayılan məlumata görə isə son iki ayda Azərbaycan Türkiyədən bir milyonluq silah alıb.

Azərbaycanın daxili işlər naziri, general-polkovnik Ramil Usubov Gürcüstan Respublikasının daxili işlər naziri Giorgi Mqebrişvilinin dəvəti ilə bu ölkədə rəsmi səfərdədir.

Daxili İşlər Nazirliyinin mətbuat xidmətindən APA-ya verilən məlumata görə, daxili işlər nazirlərinin avqustun 3-də keçirilən görüşündə Azərbaycanla Gürcüstan arasında dostluq və qardaşlıq münasibətlərinin müəyyənləşdirilmiş strategiyaya uyğun uğurla inkişaf etdiyi, hər iki ölkə rəhbərliyinin qarşılıqlı əlaqələrin daha da dərinləşdirilməsinə xüsusi önəm verdiyi qeyd olunub.

Eyni zamanda, dövlətlərin müvafiq qurumları arasında əməkdaşlığın, ilk növbədə, beynəlxalq terrorçuluq, transmilli mütəşəkkil cinayətkarlıq, xüsusən narkotiklərin qanunsuz dövriyyəsi, insan alveri və qanunsuz miqrasiya ilə mübarizə sahəsində birgə işbirliyinin, təcrübə və informasiya mübadiləsinin, yaradılmış normativ-hüquqi bazanın yaxın dost və strateji tərəfdaş olan ölkələrimizin mənafeyinə, bölgədə təhlükəsizliyin təmini işinə xidmət etdiyi diqqətə çatdırılıb.

Görüşdə regional təhlükəsizlik sahəsində, o cümlədən sərhədyanı bölgələrdə əməkdaşlığın mövcud vəziyyəti və prioritet istiqamətləri barədə ümumi fikir mübadiləsi aparılıb, qarşılıqlı maraq doğuran bir sıra digər məsələlər də müzakirə olunub.

Gürcüstan rəsmiləri Rusiya prezidenti Vladimir Putinin işğal altında olan Abxaziyaya gözlənilən səfərini təxribat adlandırıblar.

APA-nın yerli bürosunun məlumatına görə, Gürcüstan prezidentinin xarici siyasət məsələləri üzrə müşaviri Tengiz Pxaladze deyib ki, Putinin Abxaziyaya səfəri Rusiyanın işğalçılıq siyasətinin davamıdır: “Gözlənilən səfər Rusiyanın tarixi ədalətsizliyi leqallaşdırmaq cəhdidir. Gürcüstanın işğal olunmuş əraziləri tanımamaqla bağlı siyasəti çox güclüdür. Əminəm ki, Gürcüstan bu münaqişədə qalib gələcək və ədalət bərqərar olacaq”.

Gürcüstanın barışıq və vətəndaş bərabərliyi məsələləri üzrə dövlət naziri Ketevan Tsixelaşvili də hesab edir ki, Putinin Abxaziyaya səfəri faktiki anneksiyanın davamıdır: “Səfər davam edən təxribatdır. Bu cəhd Rusiya tərəfindən faktiki anneksiya cəhdidir. Buna görə də bizim vəzifəmiz istənilən təxribatın qarşısını almaqdır. Ölkə üçün həyati əhəmiyyət kəsb edən sülhün saxlanılması bizim vəzifəmizdir”. 

Qeyd edək ki, Rusiya mətbuatının məlumatına əsasən prezident Vladimir Putin Cənubi Osetiyada 2008-ci il avqust müharibəsinin növbəti ildönümündə Abxaziyaya səfər edəcək. Səfər çərçivəsində Putin Abxaziyanın de-fakto lideri Raul Xacimba ilə görüşəcək.