İyunun 19-da qoşunların döyüşə hazırolma qabiliyyəti, qüvvə və vasitələrin idarə olunmasının təşkili, onların qarşılıqlı fəaliyyətinin yoxlanılması məqsədilə genişmiqyaslı əməliyyat-taktiki təlimləri başlayıb.

Dalga tv-nin  Sonxeber.az-a istinadən  məlumatına görə, təlimlərə 23 min nəfərədək şəxsi heyət, 120-dək tank və zirehli texnika, 180-dək müxtəlif çaplı raket və artilleriya qurğusu, reaktiv yaylım atəş sistemi və minaatan, 30-dək müxtəlif təyinatlı döyüş aviasiyası, eləcə də yeni növ radioelektron kəşfiyyat vasitələri və pilotsuz uçuş aparatları cəlb olunacaq.

Təlimlər iyunun 24-dək davam edəcək.

http://videoblok.com/embed/43244

Müdafiə Nazirliyi cəbhədə vəziyyətlə bağlı bəyanat yayıb.

APA-nın məlumatına görə, bəyanatda deyilir ki, Azərbaycan Respublikasının Dağlıq Qarabağ ərazisindəki qoşunların qarşıdurma xəttində Ermənistan silahlı qüvvələrinin bölmələri davamlı surətdə təxribatlar törədir.

"Düşmən Silahlı Qüvvələrimizin mövqelərini və cəbhəboyu yaşayış məntəqələrimizi iriçaplı silahlardan və artilleriya qurğularından atəşə tutmaqda davam edir.

Ermənistan silahlı bölmələrinin növbəti təxribatının qarşısını alarkən iyunun 15-də ordumuz itki verib.

Görülən qətiyyətli cavab  tədbirləri nəticəsində iyunun 15-i və 16-da işğalçı qüvvələrin 6 hərbi qulluqçusu məhv edilib, yaralıları da var.

Müdafiə Nazirliyi xəbərdar edir ki, düşmənin bu cür əməllərinin qarşısı qətiyyətlə alınacaq və verəcəyi itkilərə görə bütün məsuliyyət Ermənistanın hərbi-siyasi rəhbərliyinin üzərinə düşəcək", - deyə bəyanatda bildirilir.

https://youtu.be/qbHMSjzYjW0

Azərbaycan Respublikası ilə Türkiyə Respublikası arasında imzalanan hərbi əməkdaşlıq haqqında Sazişə əsasən, iyunun 12-dən etibarən Naxçıvanda iki ölkənin Silahlı Qüvvələrinin birgə əməliyyat-taktiki təlimləri başlanıb.

Dalga tv-nin  Oxu.Az-a istinadən məlumatına görə, iyunun 15-də - Milli Qurtuluş Günündə Naxçıvan Muxtar Respublikası Ali Məclisinin Sədri Vasif Talıbov, Azərbaycan Respublikasının müdafiə naziri, general-polkovnik Zakir Həsənov və Türkiyə Respublikası Silahlı Qüvvələrinin mexanikləşdirilmiş briqada komandiri, general-mayor Ərcan İlhan birgə əməliyyat-taktiki təlimi izləyiblər.

Təlimə Əlahiddə Ümumqoşun Ordusunun birləşmə və hissələri ilə yanaşı, Əlahiddə Sərhəd Diviziyasının, Əlahiddə Əməliyyat Briqadasının və Mülki Müdafiə Alayının bölmələrinin ümumilikdə 5 minə yaxın şəxsi heyəti, 250-dən artıq zirehli və 500-ə yaxın avtomobil texnikası cəlb edilib.

Təlimin gedişində təmir-təxliyə, maddi-texniki və tibbi təminat tapşırıqları da uğurla yerinə yetirilib. Təlimə cəlb edilmiş birləşmə və hissələr qarşıya qoyulmuş tapşırıqları uğurla yerinə yetirərək hədəf və maketlərin 90 faizindən çoxunu məhv edib və düşmən üzərində qələbə çalıblar.

Sonda hərbi vertolyotlar Azərbaycan və Türkiyə bayraqlarını səmada nümayiş etdirib, ümummilli lider Heydər Əliyevin “Hər bir insan üçün onun milli mənsubiyyəti onun qürur mənbəyidir. Mən həmişə fəxr etmişəm, bu gün də fəxr edirəm ki, mən Azərbaycanlıyam” kəlamı səslənib.

Ali Məclisin Sədri Əlahiddə Ümumqoşun Ordusunun silahlanmasına daxil olmuş yeni silah, texniki avadanlıqlar və pilotsuz uçuş aparatlarına baxıb.

Azərbaycan Respublikası müdafiə nazirinin müavini - Əlahiddə Ümumqoşun Ordu komandanı, general-leytenant Kərəm Mustafayev təlimin başa çatması barədə raport verdikdən sonra təlimdə iştirak edən şəxsi heyətlə görüş olub.

Ali Məclisin Sədri təlimdə fərqlənən zabit, gizir və əsgərləri qiymətli hədiyyələrlə mükafatlandırıb.

Sonda zabit, gizir və əsgərlər şəxsi heyət arasındakı birlik və bərabərliyin ifadəsi olan “Hamı bir nəfər, bir nəfər hamı üçün” şüarını səsləndiriblər.

Bu gün Tbilisidə Abxaziyadan olan məcburi köçkünlər etiraz aksiyası keçiriblər.

APA-nın Gürcüstan bürosunun məlumatına görə, məqsəd Ermənistanın onların dədə-baba yurdlarına qayıtmasına Avropa Şurasında maneə törətməsidir.

Aksiya təşkilatçılardan biri, “İşğala qarşı hərəkat” QHT-nin rəhbəri Onise Qerqetava Ermənistan hakimiyyətinin beynəlxalq toplantılarda Gürcüstan dövlətini dəstəkləmədiyini, Abxaziyadan olan məcburi köçkünlərin doğma torpaqlara qayıtmasına əngəl törətdiyini, Ermənistan nümayəndələrinin Avropa Şurasının müvafiq qətnaməsinə səs vermədiklərini, onların şantaj və düşmənçiliyinin hər addımda hiss olunduğunu bildirib: “Hazırda evlərimizdə Ermənistandan olan ermənilər yaşayır. Ermənistan səfirliyinə təqdim etdiyimiz qətnamədə tələb olunur ki, Ermənistan vətəndaşları olan ermənilər evlərimizdən çıxsınlar və biz evlərimizə qayıdaq”.
 

O. Qerqetava bildirib ki, onların tələblərinə cavab verilmədiyi təqdirdə etiraz aksiyası davam edəcək: “Tələbimiz odur ki, Ermənistan Gürcüstanın ərazi bütövlüyünə və suverenliyinə hörmət etsin, dədə-baba yurdlarımıza qayıtmağımız üçün qəbul olunan qətnaməyə imza atsın, habelə Cənubi Qafqazda işğalçılıq siyasətinə son qoysun”.
 

Qeyd edək ki, Ermənistan səfirliyinə təqdim olunan qətnaməni mindən çox adam imzalayıb.

İyunun 16-da Silahlı Qüvvələrin Təlim və Tədris Mərkəzində Heydər Əliyev adına Azərbaycan Ali Hərbi Məktəbinin növbəti buraxılışının məzunları ilə görüş keçirilib.

Müdafiə Nazirliyinin mətbuat xidmətindən Sonxeber.az-a verilən məlumata görə, Müdafiə Nazirliyinin, xüsusi təyinatlı təhsil müəssisələri rəhbərlərinin və gənc leytenantların iştirakı ilə keçirilən tədbir xalqımızın ümummilli lideri Heydər Əliyevin və ölkəmizin ərazi bütövlüyü uğrunda şəhid olanların xatirəsinin yad edilməsi, dövlət himninin ifası ilə başlayıb.

Müdafiə naziri, general-polkovnik Zakir Həsənov məzunlar qarşısında çıxış edərək ilk zabit rütbələri almaları münasibətilə onları təbrik edib.

Azərbaycan Respublikasının Prezidenti, Ali Baş Komandan İlham Əliyevin tapşırığına əsasən, Silahlı Qüvvələrdə aparılan islahatlar, hərbi təhsil sistemində həyata keçirilən vacib tədbirlər, təşkilat-ştat strukturunun təkmilləşdirilməsi barədə danışan müdafiə naziri şəxsi heyətin döyüş və mənəvi-psixoloji hazırlığında qarşıda duran mühüm vəzifələri diqqətə çatdırıb.

Nazir deyib: "Döyüş hazırlığının artırılması məqsədilə silahlanmaya ən müasir döyüş texnikası, raket və artilleriya sistemləri, hərbi təyinatlı digər vasitələr qəbul edilir, modernləşmə aparılır, müxtəlif səviyyəli genişmiqyaslı təlimlər keçirilir, yeni poliqonlar tikilir, mütəxəssislərin hazırlığı və digər fəaliyyətlər davam etdirilir".

Müdafiə naziri bildirib ki, hərbi qulluqçuların təminatının, sosial-məişət şəraitinin, sağlamlıq məsələlərinin daim diqqətdə saxlanılması və yaxşılaşdırılması üçün yeni hərbi şəhərciklərin, daimi və xidməti mənzillərin istifadəyə verilməsi də dövlətimizin prioritet məsələlərindəndir.

Nazir qeyd edib ki, Azərbaycan ordusunun hər bir zabiti rəhbərlik etdiyi kollektivə şəxsi nümunə və dövlətə sadiq olmalı, Vətənə və torpağa sevgi, düşmənə nifrət hissi ilə xidmət etməlidir. "Dövlətimiz və xalqımızın etimadını doğrultmaq üçün peşəkarlıq səviyyənizi, bilik və bacarığınızı artıraraq düşməndən üstün olmalısınız. Ordu qarşısında bir vəzifə dayanır - müharibəyə hazır olmaq və torpaqlarımızı düşməndən azad etməklə ərazi bütövlüyümüzü təmin etmək", - deyə general-polkovnik Z.Həsənov vurğulayıb.

Müdafiə naziri çıxışının sonunda zabitlərə hərbi xidmətlərində uğurlar arzulayıb və əmin olduğunu bildirib ki, hər bir hərbi qulluqçu üzərinə düşən vəzifənin məsuliyyətini dərindən dərk edərək Vətənimizin müdafiə qabiliyyətinin daha da güclənməsinə dəyərli töhfələr verəcəkdir.

İyunun 17-də ABŞ Konqresinin əsas binası olan Kapitolda ABŞ- Azərbaycan Ticarət Palatasının (USACC) təşkilatçılığı və Vaşinqtonda fəaliyyət göstərən 20-dən çox qadın sahibkar və nüfuzlu təşkilat rəhbərlərinin dəstəyi ilə “Azərbaycan və Gürcüstanda qadınların cəmiyyətdə və iqtisadi inkişafda rolu” mövzusunda xüsusi tədbir keçirilib.

Azərbaycanın ABŞ-dakı səfirliyindən APA-ya verilən məlumata görə, bu təşəbbüs ötən ilin sentyabr ayında ABŞ ticarət missiyasının tərkibində Azərbaycan və Gürcüstana səfər etmiş qadın sahibkarlar, o cümlədən “Browne & Associates, Inc.” şirkətinin baş icraçı direktoru və ABŞ-ın Milli Tibb Assosasiyasının prezidenti Doris Braun, “C.L. Russell Group” şirkətinin rəhbəri Koni Rasel tərəfindən irəli sürülüb, ABŞ ticarət nazirliyi və Vaşinqtonun kiçik və yerli biznes inkişafı departamenti tərəfindən dəstəklənib. Həmçinin, tədbirin təşkili ilə bağlı ABŞ Konqresinin bir sıra qadın üzvləri, o cümlədən Şeyla Cekson Li və Brenda Lorens öz dəstəyini ifadə ediblər.

Tədbirin açılışında “C.L. Russell Group” şirkətinin baş icraçı direktoru Koni Rasel qonaqları salamlayaraq, onun əhəmiyyətindən danışıb və 2016-cı ilin sentyabr ayında Azərbaycan və Gürcüstana səfəri barədə xoş təəssüratlarını bölüşüb. O, ölkəmizdəki qonaqpərvərlikdən və turizm imkanlarından heyran qaldığını, ikitərəfli iqtisadi əməkdaşlığın inkişafı üçün böyük potensialın olduğunu vurğulayıb.  K.Rasel cəmiyyətin inkişafında qadınların rolundan bəhs edərək, müstəqilliyinin 25 illiyini qeyd edən Azərbaycan və Gürcüstanda bu sahəyə böyük diqqət yetirildiyinin şahidi olduğunu və hər iki ölkə tərəfindən uğurlu siyasətin həyata keçirildiyini söyləyib.

Tədbirə əsas qonaq qismində dəvət olunmuş ABŞ ticarət nazirinin köməkçisinin birinci müavini Holi Vineyard ABŞ-ın qadın sahibkarlığının inkişaf etdirilməsi sahəsində təcrübəsindən danışaraq, qadınların iqtisadi fəallığının genişləndirilməsi və səlahiyyətlərinin artırılmasının ölkəsi, o cümlədən hazırkı Administrasiya üçün xüsusi əhəmiyyət daşıdığını bildirib. O, həmçinin Azərbaycan və Gürcüstana təşkil edilmiş ticarət missiyalarının ABŞ şirkətlərinin regionla iş birliyinin qurulmasında və qarşılıqlı ticarət əlaqələrinin inkişafında vacib rol oynadığını qeyd edib.

Daha sonra Azərbaycanın ABŞ-dakı səfiri Elin Süleymanov tədbirdə çıxış edərək, ilk dəfə olaraq müsəlman Şərqində qadınlara seçkilərdə iştirak və seçilmək hüququnun məhz Azərbaycanda verilməsinin tarixi nailiyyət hesab olunduğunu, bu gün də qadın siyasətinin müstəqil Azərbaycan dövlətinin əsas prioritet sahələrindən olduğunu diqqətə çatdırıb. O, Azərbaycanda qadınların ictimai-siyasi fəallığının ildən-ilə daha da artdığını, dövlət qulluğunda çalışanlar və sahibkarlar arasında qadınların xüsusi çəkisinin yüksəldiyini, eləcə də onların ölkəmizdə elm, təhsil, mədəniyyət, səhiyyə, idman və digər sahələrin inkişafında müstəsna rol oynadıqlarını vurğulayıb. Bildirilib ki, bu gün qadınlarımız təkcə respublikamızda deyil, ölkəmizin hüdudlarından kənarda da yaxşı tanınır, beynəlxalq qurumlarda ölkəmizi ləyaqətlə təmsil edirlər. Azərbaycanın Birinci vitse-prezidenti xanım Mehriban Əliyevaya YUNESKO və İSESKO-nun xoşməramlı səfiri adı verilməsi bunun ən bariz nümunəsidir. Azərbaycanda bir neçə qlobal tədbirin, o cümlədən 2012-ci ildə “Eurovision” mahnı müsabiqəsinin, 2015-ci ildə Birinci Avropa Oyunları və 2017-ci ildə IV İslam Həmrəyliyi Oyunlarının yüksək səviyyədə keçirilməsi məhz xanım Mehriban Əliyevanın təşkilatçılığı ilə mümkün olub.

Səfir Süleymanov eyni zamanda çıxışında ABŞ Konqresinin üzvü Stiv Skaliz və digər işçilərinə qarşı bu gün törədilmiş silahlı hücum ilə bağlı başsağlığı ifadə edib, bu hadisə nəticəsində yaranmış vəziyyətə baxmayaraq, ABŞ-ın hökumət rəsmiləri və Konqres üzvlərinin köməkçilərinin tədbirdə iştirakını böyük göstərici kimi qiymətləndirib. O, həmçinin tədbirdə Azərbaycan və Gürcüstan arasında yaranmış və get-gedə möhkəmlənən strateji tərəfdaşlıqdan söhbət açaraq, ABŞ-da mütəmadi olaraq, bu kimi tədbirlərin birgə təşkilinin əhəmiyyətini vurğulayıb.

Tədbirdə çıxış edən digər natiqlər, o cümlədən Gürcüstanın ABŞ-dakı səfirinin müavini Qeorqi Tsikolia, USACC-nin icraçı direktoru Süsən Sadıqova və Orta Şərq İnstitutunun maliyyə direktoru Tamara Kalandiya Azərbaycan və Gürcüstanın sosial-iqtisadi inkişafında qadınların rolundan söhbət açmış, qadın hüquqlarının qorunması və gender bərabərliyi sahəsində aparılmış islahat və əldə edilmiş nailiyyətlərdən məlumat veriblər. Bununla yanaşı, Q.Tsikolia Gürcüstan ilə Azərbacyan arasında mövcud dostluq və əməkdaşlıq əlaqələrindən danışıb, eləcə də tədbirin hər iki ölkədə qadınların cəmiyyətdəki rolu barədə ABŞ ictimaiyyətinin məlumatlandırılması üçün yaxşı imkan olduğunu qeyd edib.