“Asiya və Avropa arasında təbii körpü kimi strateji roluna görə Azərbaycan hər zaman regional və trans-regional uzlaşma təşəbbüslərinin fəal iştirakçısı və reallaşmasında aparıcı rol oynayan dövlət olub. Bu gün Azərbaycan coğrafi qovşaq adlandırılan Şərq-Qərb və Şimal-Cənub dəhlizlərinin təşviqi üçün üç mühüm layihənin yerinə yetirilməsinə qoşulub”.

Xarici İşlər Nazirliyinin mətbuat xidmətindən APA-ya verilən məlumata görə, bu sözləri xarici işlər naziri Elmar Məmmədyarovun Vişeqrad qrupu və Şərq Tərəfdaşlığı ölkələrinin xarici işlər nazirlərinin iclasında çıxışında deyib.

Nazir bildirib ki, strateji Bakı-Tbilisi-Qars layihəsi, Azərbaycan, Gürcüstan və Türkiyə arasında dəmiryol xəttinin istifadəyə verilməsi regional ticarəti asanlaşdıracaq və Şərq və Qərb arasında fasiləsiz dəmiryolu xəttinə çıxışı mümkün edəcək: “Biz layihənin bu il başa çatdırılmasını gözləyirik. Asiya və Avropa arasında daşımaların qiymət və vaxt baxımından effektliyini artırmaqla, BTQ hazırkı yollara güclü alternativdir. 2016-cı ildə Çindən başlayaraq Mərkəzi Asiya, Xəzər dənizi, daha sonra Azərbaycan və Gürcüstanı keçməklə Avropaya istiqamətlənən konteyner qatarını istifadəyə verdik. Bu sınaq qatarı sübut etdi ki, bu yol tranzit müddətini 30-35 gündən 15 günədək azalda bilər.

Azərbaycan həmçinin digər önəmli layihənin, illik 25 milyon ton yük potensialı olan və Xəzər dənizində ən böyük və çoxməqsədli limanın-yeni Bakı Beynəlxalq Dəniz Limanınin (Ələt) tikintisinə başlayıb. Avropa, Rusiya və İranın dəmiryolları qovşağında və Bakı hava limanının yaxınlığında yerləşən Ələt limanı regional mərkəzə kəsintisiz əlaqə və hava yükdaşıması, həmçinin digər Xəzər dənizi limanlarına səmərəli dəmiryol çıxışı əldə etməyə imkan yaradacaq.

“TEN-T-in inkişafı” (Trans European Transport Network-TEN-T(Trans Avropa Nəqliyyat Şəbəkəsi)) üzrə keçən il Rotterdamda qəbul edilmiş Nazirlər Bəyanatı nəqliyyat dialoqunu irəlilətmək üçün dolğun platforma təqdim edir. Biz Şərq-Qərb dəhlizinin Azərbaycan hissəsi, yol və dəmiryol xətlərinin TEN-T mərkəzi şəbəkəsinə, həmçinin Şimal-Cənub dəhlizinin TNT-T hərtərəfli şəbəkələrinə daxil edilməsini alqışlayırıq.

Çini Avropa ilə birləşdirən Trans Xəzər Beynəlxalq Tranzit Xətti kimi regional layihələrə Mərkəzi Asiya dövlətləri və Türkiyə də daxil olmaqla, daha geniş iştirak nəzərdən keçirilməlidir. Bu həmçinin Avropa İttifaqının trans Avropa şəbəkələrinin daha sonra Şərqə genişləndirilməsi məqsədi daşıyan Avropa İttifaqının uzlaşma gündəliyinə də uyğun olacaq”. 

Azərbaycan prezidenti İlham Əliyev Ukraynanın Kiyev Şəhər Dövlət Administrasiyasının başçısı Vitali Kliçkonu qəbul edib.

APA-nın məlumatına görə, Vitali Kliçko ilə bu yaxınlarda Münhendəki görüşünü xatırlayan dövlət başçısı onun Azərbaycana səfərinin maraqlı keçəcəyinə, ölkələrimiz, o cümlədən Bakı ilə Kiyev arasında əlaqələrin möhkəmləndirilməsi işinə xidmət edəcəyinə ümidvar olduğunu bildirib.

Əməkdaşlıq və qarşılıqlı təcrübə üçün yaxşı perspektivlərin olduğunu vurğulayan İ. Əliyev V. Kliçkonun bu səfərinin həmkarları ilə görüşmək, paytaxtımızda gedən inkişaf prosesləri və Bakıda inşa olunan idman obyektləri ilə yaxından tanış olmaq üçün imkan yaratdığını deyib.

Azərbaycana səfərindən böyük məmnunluq hissi keçirdiyini bildirən Kiyev Şəhər Dövlət Administrasiyasının başçısı Vitali Kliçko Bakıda uzun müddət olmadığını və paytaxtımızın gözəlliyinin onda dərin təəssürat yaratdığını vurğulayıb. O, bu səfəri ilə bağlı ölkələrimiz, eləcə də Bakı ilə Kiyev arasında əməkdaşlığın genişləndirilməsi baxımından böyük hazırlıq işlərinin görüldüyünü deyib.

Sonra Vitali Kliçko dünya şöhrətli boksçu Məhəmməd Əliyə həsr olunmuş, üzərində Məhəmməd Əlinin şəxsi avtoqrafı olan məhdud nəşrli kitab-albomun bir nüsxəsini hədiyyə olaraq prezident İlham Əliyevə təqdim edib.

Qeyd edək ki, dövlət başçısına təqdim olunan bu kitab-albom məhdud nəşrin 16-cı nüsxəsidir.

Ermənistan silahlı qüvvələri işğal altında olan Azərbaycan torpaqlarında hərbi təlim keçirir.

Dalga tv -nin APA-ya istinadən xəbərinə görə, ermənilər bu gün saat 11:00-dan etibarən Ağdamın Uzundərə adlanan ərazisində təlimlərə başlayıb.

Erməni hərbçilər irimiqyaslı hərbi təlimlərdə, əsasən, ağır artilleriya qurğularından istifadə edirlər. Ağır artilleriya və zirehli texnikalardan açılan atəş səsləri rayonun bütün yaşayış məntəqələrində eşidilir. 

Türkiyənin, Azərbaycanın və Gürcüstanın kiçik və orta sahibkarları (KOS) ortaq elektron bazarda görüşəcəklər. 

Dalga tv Xəbər.ge-yə stinadən verdiyi xəbərə görə, tərəflərin görüşü bu ilin may ayında keçiriləcək.

Dünya KOS Platfroması Fondunun baş icraçı direktoru Tunç Uyanık layihə haqqında məlumat verərkən bildirib ki, ilkin mərhələdə Azərbaycan, Türkiyə, Gürcüstanın KOS-larının iştirak edəcəyi elektron alış-veriş platforması Asiya, Avropa və Afrikadakı həmkarları ilə əlaqələrini genişləndirəcəklər.

T.Uyanıkın sözlərinə görə, bu təşəbbüs sürətli qloballaşan iqtisadi bazarda KOS-lara dəstək olmaq üçün reallaşdırılır: "Bu layihə ilə 4 əsas problemin həll edilməsi nəzərdə tutulub. Bu çətinliklər əsasən internetin biznes məqsədilə istifadə edilməsi, daxili və beynəlxalq bazarla əlaqə yaratmaq, daha iri müştəri bazarı və maliyyə bazarına giriş əldə etməkdən ibarətdir". 

“Azərbaycan, Gürcüstan və Türkiyənin enerji sahəsində birgə həyata keçirdikləri irimiqyaslı layihələr, təkcə Cənubi Qafqazın deyil, bütövlükdə Avropanın enerji təhlükəsizliyində mühüm rol oynayır”.

AZƏRTAC xəbər verir ki, bu sözləri Gürcüstanın energetika nazirinin müavini Mariam Valişvili Qara Dəniz İqtisadi Əməkdaşlıq Təşkilatı Parlament Məclisinin (QDİƏTPM) İqtisadiyyat, ticarət, texnologiya və ekologiya məsələləri üzrə komitəsinin Tbilisidə keçirilən 48-ci iclasında deyib.

Onun sözlərinə görə, Azərbaycan, Gürcüstan və Türkiyənin birgə əməkdaşlığı regionun inkişafında da mühüm rol oynayır. Birgə həyata keçirilən enerji layihələri nəticəsində ölkələrimiz və xalqlarımız arasındakı dostluq əlaqələri daha da möhkəmlənib.

“Bizim əməkdaşlığımız QDİƏT-ə üzv olan ölkələr üçün də əhəmiyyətlidir. Birgə əməkdaşlıq etməklə biz alternativ enerji layihələrini, bio və digər enerji mənbələrindən istifadədə də uğur qazana bilərik”,– deyə Valişvili vurğulayıb.

Gürcüstan Rusiyadan gələn təhlükəyə qarşı öz müdafiə qabiliyyətini gücləndirəcək.

 Dalga tv Xəbər.ge-yə istinadən xəbər verir ki, bunu parlament qarşısında çıxışı zamanı Gürcüstan Müdafiə naziri Levan İzoriya söyləyib. O, Gürcüstan ordusunun yüksək döyüş qabiliyyətinin Rusiyanın hücum riskini azaldacağını bildirib:

“Biz 2008-ci il müharibəsinin təcrübələrindən faydalanacağıq. Hazırda ordu üçün əsas prioritet raketdən müdafiə sistemilərinin gücləndirilməsidir. Biz həmçinin ordu idarəçiliyinin desentralizasiyasını həyata keçirəcəyik. Bu isə lazımlı məqamlarda qərarların müstəqil surətdə verilməsi üçün ediləcək”.