Türkiyənin baş naziri Binəli Yıldırım Azərbaycan prezidentinə təbrik məktubu göndərib. APA-nın xəbərinə görə, təbrikdə deyilir:

“Hörmətli cənab prezident, əziz qardaşım. Azərbaycanın milli bayramı – Respublika Günü münasibətilə zati-alinizə və qardaş Azərbaycan xalqına hökumətim adından və şəxsən öz adımdan ən səmimi təbriklərimi yetirirəm.

Türkiyə Azərbaycanın müstəqilliyinə yenidən qovuşduqdan sonra qısa müddət ərzində hər sahədə əldə etdiyi yüksək nailiyyətlərdən və sürətli inkişafdan böyük iftixar hissi keçirir. Azərbaycanın bu nailiyyətlərini daha da artıracağına və regionumuzda parlayan bir ulduz olmağa davam edəcəyinə bütün qəlbimlə inanıram. Türkiyə bu prosesdə qardaş Azərbaycan ilə çiyin-çiyinə addımlamaqda davam edəcək. Qısa müddət ərzində böyük inkişaf yolu keçərək nümunə təşkil edəcək səviyyəyə çatan əlaqələrimizin daha da möhkəmləndirilməsi istiqamətindəki iradəmizi bir daha vurğulamaq istəyirəm.

Fürsətdən istifadə edərək, zati-alinizə bir daha möhkəm cansağlığı və xoşbəxtlik, dost və qardaş Azərbaycan xalqına isə əmin-amanlıq və rifah diləyirəm”.

Nyu-Yorkda keçirilən 36-cıTürk Günü və Festivalı çərçivəsində türk xalqlarının Manhettendə izdihamlı yürüşü təşkil edilib.

Azərbaycanın Diasporla İş üzrə Dövlət Komitəsinin mətbuat xidmətindən APA-ya verilən məlumata görə, ABŞ-dakı türk cəmiyyətləri tərəfindən təşkil olunmuş yürüşdə Türkiyənin Nyu-Yorkdakı baş konsulu Ertan Yalçın, Türk Amerika Dərnəkləri Federasiyasının sədri Atilla Pak, Federasiyanın sədr müavini, Azərbaycan Nyu-York Assosiasiyasının vitse-prezidenti və Amerika-Azərbaycan Mədəniyyət Mərkəzinin prezidenti Nadiya Zöhrə Şərifi və digər cəmiyyətlərin rəhbərləri, üzvləri iştirak ediblər.

Nadiya Zöhrə Şərifi tədbirdə çıxış edərək dünyada yaşayan 200 milyona yaxın türkün 50 milyonundan çoxunu Azərbaycan türklərinin təşkil etdiyini vurğulayıb. O, hər il yürüş keçirməklə dünyaya, bütün türklərə birlik mesajı verdiklərini deyib: “Gəlin yaxın olaq, bir olaq və birlikdə güclü olaq. Çünki biz güclü olsaq, bütün türk millətləri güclü olacaq. Bizim qardaşlığımız və birliyimiz davamlı olsun. Yaşasın Azərbaycan! Yaşasın türk millətləri!”

Yürüşə Azərbaycan, Qazaxıstan, Özbəkistan və Krım türkləri də qatılıb. Amerikada yaşayan Azərbaycan cəmiyyətinin üzvləri yürüşdə iştirak edərək Azərbaycan və türk bayraqlarını dalğalandırıblar. Manhettendə Madison prospektindən başlayan yürüş BMT-nin mənzil-qərargahı qarşısında sona çatıb.

Qeyd edək ki, Amerika türklərinin bayram kimi qeyd etdiyi Türk Günü yürüşü Amerikadakı türk cəmiyyətlərinin birlik və bərabərlik rəmzi kimi dəyərləndirilir.

Gürcüstanın baş naziri Giorgi Kvirikaşvili mayın 23-də özünün türk həmkarı Binəli Yıldırımla görüşüb.

Daha sonra isə strateji tərəfdaşlıq üzrə ali şuranın görüşü baş tutub, görüşdə iki ölkənin nazirlər kabinetlərinin üzvləri iştirak edib.

Tərəflər iqtisadiyyat, mədəniyyət və kiber-təhlükəsizlik məsələləri sahəsində əməkdaşlığın dərinləşdirilməsi üzrə 4 sənəd imzalayıblar.

Baş nazir Giorgi Kvirikaşvilinin sözlərinə görə, azad ticarət haqqında müqavilənin genişləndirilməsi xüsusi maraq kəsb edir. Gürcüstanın baş naziri hesab edir ki, yeni müqavilə Gürcüstan məhsulunun Türkiyə bazarına çıxarılmasını genişləndirmək imkanı verəcək.

Aşağıdakı sənədlər imzalanıb:

“Gürcüstan və Türkiyənin ədliyyə nazirlikləri əməkdaşlıq haqda birgə bəyanat imzalayıblar”;

“Gürcüstanla Türkiyə Respublikası arasında birgə iqtisadi və ticarət komissiyasının (JETCO) təsis edilməsi haqqında” bəyannamə;

“Gürcüstanla Türkiyə Respublikası arasında mədəniyyət sahəsində əməkdaşlıq proqramı”;

“Gürcüstanın Ədliyyə Nazirliyi ilə Türkiyə Respublikasının Nəqliyyat, Dənizçilik və Kommunikasiya Nazirliyi arasında kiber-təhlükəsizlik sahəsində əməkdaşlıq haqqında memorandum”.

Razılaşmaya əsasən, Gürcüstanla Türkiyə Respublikası gələcək əməkdaşlığın formatını müəyyən edən birgə iqtisadi və ticarət komissiyasını yaradacaqlar.

Gürcüstanın hökumət başçısının sözlərinə görə, dünya qarşısında duran çağırışlar fonunda, regional qeyri-stabillik şəraitində Gürcüstanla Türkiyə arasında yüksək səviyyəli strateji tərəfdaşlıq və siyasi dialoqun dəyəri daha da artır.

“Gürcüstanla Türkiyə arasında uğurlu əməkdaşlıq təcrübəsi və perspektivləri iri nəqliyyat-energetika layihələrində müşahidə olunur. Bakı-Tbilisi-Kars dəmir yolu layihəsini qeyd etməmək olmaz, onun da birinci qolunun planlı buraxılışı 2017-ci ilin yayına nəzərdə tutulub. Bu layihə Cənub qaz dəhlizi ilə birlikdə nəqliyyat marşrutlarının şaxələnməsinə xidmət edəcək və layihə iştirakçıları olan Gürcüstan və Azərbaycan Respublikasının iqtisadi əhəmiyyətini, həm də bizim üçtərəfli tərəfdaşlığımızın əhəmiyyətini daha yaxşı nümayiş etdirir. Bu dəhliz böyük “İpək yolu” layihəsinin bərpa olunmasının çox vacib seqmentidir ki, bu da Çində bir neçə gün bundan əvvəl keçirilən sammitdə bir daha qeyd olunub”, – deyə Kvirikaşvili bildirib.

Türkiyənin baş naziri öz növbəsində Gürcüstanın ərazi bütövlüyü prinsipini dəstəklədiyini vurğulayıb,

“Heç kimin Gürcüstanın ərazi bütövlüyünü və onun suveren hüquqlarını pozmaq hüququ yoxdur. İndi və ya gələcəkdə yarana biləcək istənilən problem ikitərəfli əməkdaşlıq qaydasında tənzimləməlidir, xüsusən də Abxaziya və Sxinvali regionu ilə bağlı olan problemlər”, – Binəli Yıldırımı bildirib.

O, xatırladıb ki, Türkiyədə baş tutmayan hərbi çevrilişdən bir neçə gün sonra Giorgi Kvirikaşvili ölkəyə gəlib və vurğulayıb ki, Türkiyə və türk xalqı bu həmrəyliyi yüksək qiymətləndirir.

Binəli Yıldırım və Türkiyənin nazirlərin kabinetinin üzvləri Gürcüstana mayın 22-də gəliblər. Türkiyə Gürcüstanın ən iri iqtisadi tərəfdaşıdır.

Politoloqların fikrincə, üçtərəfli format regionda sülhə və təhlükəsizliyə xidmət edən addımdır.

Batumidə Azərbaycan-Gürcüstan-Türkiyə müdafiə nazirlərinin üçtərəfli görüşü keçirilib. Gürcüstanın müdafiə naziri Levan İzoria üç ölkə arasındakı əlaqələrdən, müdafiə sahəsində əməkdaşlığın perspektivlərindən, regionda və dünyada gedən proseslərdən, qlobal terrorizm və separatizmdən danışıb. Üçtərəfli görüşdə Azərbaycan, Gürcüstan və Türkiyə arasında hərbi əməkdaşlığın perspektivləri, regional təhlükəsizlik, bölgədə həyata keçirilən iqtisadi layihələrin birgə mühafizəsi və digər məsələlər müzakirə olunub. Bildirilib ki, üçtərəfli əməkdaşlıq regionda təhlükəsizliyə töhfə olacaq. Regional layihələrin birgə mühafizəsi təkcə layihələrin təhlükəsizliyinə deyil, regionda sabitliyə, xalqlarımızın sosial rifah halının yaxşılaşmasına və inkişafa təkan verəcək. İclasda Dağlıq Qarabağ münaqişəsi, Azərbaycanın və Gürcüstanın ərazi bütövlüyü, Türkiyədəki proseslər diqqət mərkəzində olub. Tərəflər Azərbaycanın və Gürcüstanın ərazi bütövlüyünü birmənalı şəkildə dəstəklədiklərini, Dağlıq Qarabağ və Cənubi Osetiya probleminin dövlətlərin ərazi bütövlüyü çərçivəsində həllinə tərəfdar olduqlarını bildiriblər. Sonda üç ölkənin müdafiə nazirləri birgə protokol imzalayıb.

Bu görüşün əhəmiyyətini "Kaspi” qəzetinə şərh edən Milli Məclisin deputatı, politoloq Elman Nəsirov bildirdi ki, Azərbaycan dövlətinin xarici siyasətində ikitərəfli münasibətlər formatı prioritet təşkil edir: "Cənab prezident dəfələrlə, xüsusilə diplomatlarla görüşlərində bunu qeyd edir ki, ikitərəfli münasibətlər yüksək səviyyədə olanda, bu, çoxtərəfli münasibətlərin də inkişafına gətirib çıxarır. İkitərəfli münasibətlərimiz ayrı-ayrı dövlətlərlə yaxşı olduqda, bu, nəticə etibarı ilə üçtərəfli formatı formalaşdırır. Hazırda Azərbaycan üçtərəfli formatda ayrı-ayrı region dövlətləri ilə sıx əməkdaşlıq edir. Bu nöqteyi-nəzərdən Azərbaycan-Türkiyə-Gürcüstan formatı çox mühüm əməkdaşlıqdan biridir”.

E.Nəsirovun sözlərinə görə, Azərbaycanın ikitərəfli formatda həm Türkiyə, həm də Gürcüstanla strateji tərəfdaşlıq münasibətləri var: "Belə olan vəziyyətdə üçtərəfli format üçün çox münbit şərait yarandı və reallaşdı. Üçtərəfli format nəticə etibarilə geniş spektrli məsələləri özündə ehtiva edir. Yəni burada həm iqtisadi, ticarət, humanitar, həm də hərbi-texniki əməkdaşlıq əlaqələrindən söhbət gedir. Eyni zamanda müdafiə sahəsində də əlaqələrin inkişafı burada ehtiva olunur. Gürcüstanın Batumi şəhərində Azərbaycan-Türkiyə-Gürcüstan müdafiə nazirlərinin keçirdiyi görüş də üçtərəfli formatın müdafiə sferasında əlaqələrin inkişafını əhatə edən addımdır. Strateji tərəfdaş olan üç dövlət müdafiə sahəsində əlaqələndirilmiş, koordinasiya olunmuş fəaliyyətlərini müzakirə edir, eyni zamanda perspektivlərlə bağlı mövqelərini ortaya qoyurlar. Hər üç dövlətin hərbi, o cümlədən müdafiə sahəsindəki əməkdaşlığını genişləndirməsi nəticə etibarilə regionda sülhə və təhlükəsizliyə xidmət edən addımdır. Eyni zamanda regionda bir çox çağırışlara və təhlükələrə qarşı birgə mübarizə məsələlərini özündə ehtiva edir. Söhbət ilk növbədə beynəlxalq terrorizmə, o cümlədən bu kimi müxtəlif qorxulu tendensiyalara qarşı birgə mübarizə aparmaqdan gedir. Hesab edirəm ki, müdafiə nazirlərinin Batumi şəhərində keçirilən görüşü regionda sülhün və təhlükəsizliyin daha da möhkəmləndirilməsi yönümündə atılmış addımdır. Həmçinin üç dövlətin strateji tərəfdaşlıq münasibətlərinin bundan sonrakı inkişafı üçün yeni imkanlar açan bir görüşdür”.

"Atlas” Araşdırmalar Mərkəzinin sədri, politoloq Elxan Şahinoğlu bildirdi ki, Azərbaycan-Türkiyə-Gürcüstan müdafiə nazirlərinin Batumi görüşünün ölkəmiz üçün çox böyük əhəmiyyəti var: "Çünki həm Türkiyə, həm də Gürcüstan Azərbaycanın strateji müttəfiqidir. Bu bölgə dövlətlərinin ortaq sərhədləri var. Ona görə də müttəfiq olan dövlətlərin birgə hərbi təlimlər keçirməsi, müdafiə nazirlərinin tez-tez görüşməsi zəruridir. Bu üç ölkəni ümumi sərhədlərdən əlavə, böyük enerji layihələri və boru xətləri də birləşdirir. Üstəgəl, yaxın günlərdə Bakı-Tblisi-Qars dəmir yolu da istifadəyə veriləcək. Bu layihələrin təhlükəsizlik məsələləri ön planda tutulmalıdır. Çünki bölgəmizdə çox böyük təhlükəsizlik problemi var. Belə ki, Gürcüstanın və Azərbaycanın torpaqları işğal altındadır. Qarabağda hər an hərbi toqquşma ehtimalı ola bilər və əgər bu olarsa, böyük layihələrə də müəyyən təhlükələr yaranar. Ona görə də hər üç dövlət birgə hərbi təlimlər keçirməklə, təhlükəsizlik sahəsində daim əməkdaşlıq etməklə əslində həmin layihələrin mühafizəsini təşkil edir”.

E.Şahinoğlu söylədi ki, bölgədə iki qeyri-rəsmi hərbi blok formalaşıb: "Bunlardan biri Rusiya-Ermənistan hərbi blokudur. Rusiyanın Ermənistanda hərbi bazaları var və faktiki, bu ölkənin işğalçı siyasətini dəstəkləyir. Hətta erməni generalları deyirlər ki, Rusiya-Ermənistan qoşun birləşmələri Azərbaycan ərazisində də müharibə apara bilər. Rusiya rəsmiləri bu sözlərə etiraz etmirlər. Ona görə də bunun qarşılığında Azərbaycan-Türkiyə-Gürcüstan hərbi ittifaqı güclənməlidir və buna ehtiyac var. Türkiyə NATO dövlətidir, Gürcüstan bu quruma sıx inteqrasiyaya çalışır, Azərbaycan özü də ordusunu NATO standartlarına yüksəldir. Bu üç ölkənin hərbi ittifaqı Rusiya-Ermənistan blokuna qarşı deyil, amma öz təhlükəsizliyi baxımından əməkdaşlıq etmələri çox vacibdir”. 

Gürcüstanda gənc soydaşımız yeni vəzifəyə təyin olunub.

Gürcüstanın barışıq və vətəndaş bərabərliyi məsələləri üzrə dövlət nazirinin Kvemo Kartli üzrə müşaviri vəzifəsində çalışan Zaur Darğallı bu gün Kvemo-Kartli bölgəsinin qubernator müavini vəzifəsinə təyin edilib. APA-nın Gürcüstan bürosunun məlumatına görə, bu barədə “Facebook” səhifəsində Gürcüstan parlamentinin deputatı Savalan Mirzəyev bildirib.

Zaur Füzuli oğlu Darğallı 1988-ci ildə Marneuli şəhərində anadan olub. İlya Çavçavadze adına Dövlət Universitetini bitirib. 2007-2009 illərdə bir sıra regional və beynəlxalq media qurumlarında jurnalist kimi fəaliyyət göstərib. O, paralel olaraq 2007-2010 illərdə Marneuli Gənclər Mərkəzində bir sıra layihələrin rəhbəri olub. 2010-2012 illərdə Amerika Birləşmiş Ştatlarının Regional İnkişaf Agentliyinin Kvemo-Kartli bölgəsindəki ofisinin rəhbəri vəzifəsində çalışıb. Ailəlidir, bir qızı var.

Zaur Darğallı APA-ya açıqlamasında Kvemo-Kartli bölgəsində yaşayan millətindən asılı olmayaraq hər bir vətəndaşın problemlərini həll olunmasına çalışacağını bildirib: “Ən başlıca istəyim isə azərbaycanlı gənclərin Gürcüstanın ali məktəblərində təhsil alması və dövlət strukturlarında çalışmasıdır. Mən həmişə çıxışlarımda onların ali məktəblərə qəbul olunmasını arzulamışam. Onların Gürcüstanın ali təhsil ocaqlarında oxuması üçün dövlət müxtəlif proqramlar həyata keçirir. Düşünürəm ki, ali təhsilli azərbaycanlı gənclər dövlət dilini öyrənəndən sonra Gürcüstan cəmiyyətinə daha tez inteqrasiya olacaqlar. Bu isə onların ölkənin tamhüquqlu vətəndaşı olması deməkdir”, -  Z. Darğallı bildirib.

"Azərbaycan, Türkiyə və Gürcüstan arasında inkişaf edən hərbi əməkdaşlıq mühüm əhəmiyyət kəsb edir. Bizim birgə əməkdaşlığımız gürcü, Azərbaycan və türk xalqlarının təhlükəsiz yaşaması və ölkələrimizin iqtisadi inkişafı baxımından önəmlidir”.

APA-nın Gürcüstan bürosunun məlumatına görə, bunu Gürcüstanın müdafiə naziri Levan İzoria Batumidə azərbaycanlı və türkiyəli həmkarları ilə üçtərəfli görüşdən sonra keçirilən mətbuat konfransında deyib.

L. İzoria Gürcüstan və Türkiyənin müdafiə sahəsində birgə fəaliyyətini yüksək qiymətləndirib: “Bu il biz 5 dəfə görüşmüşük. Budəfəki görüşümüzdə də biz ən vacib məsələləri müzakirə etdik. Düşünürəm ki, ölkələrimiz arasında getdikcə inkişaf edən əməkdaşlıq formatı daha da genişlənəcək”.
 

Nazir üç ölkənin birgə təlimlərdə iştirakına da toxunub: “Yaxın günlərdə bizim xüsusi təyinatlılarımızın birgə təlimləri baş tutacaq. Bu ilin sentyabr ayında informasiya texnologiyaları üzrə təlimlərimiz də keçiriləcək. Gələcəkdə bu cür təlimlərin sayını artırmaq və üç ölkə arasında hərbi əməkdaşlığı daha da genişləndirmək niyyətindəyik”.