Daxili işlər naziri, general-polkovnik Ramil Usubov Türkiyə Jandarm Qüvvələrinin Baş Komandanı, ordu generalı Yaşar Gülerin başçılıq etdiyi nümayəndə heyətini qəbul edib.

Dalga tv-nin Oxu.Az-a istinadən  məlumatına görə, R. Usubov 1997-ci il oktyabrın 31-də hökumətlərarası “Azərbaycan Respublikası Daxili İşlər Nazirliyi Daxili Qoşunlar Baş İdarəsinin şəxsi heyətinə Türkiyə Jandarm İdarəsi tərəfindən ediləcək təlim-təhsil və təchizat yardımına aid Protokol”un imzalandığını, bununla da Daxili Qoşunlarla Jandarm Qüvvələri arasında hərbi əməkdaşlıq münasibətlərinin hüquqi əsasının qoyulduğunu diqqətə çatdırıb. Qeyd olunub ki, dost və qardaş dövlətin müvafiq qurumları ilə  əlaqələr ilk növbədə qarşılıqlı hüquqi yardım göstərilməsi haqqında, təcrübə mübadiləsi, dostluq və hərtərəfli əməkdaşlığın inkişafı barədə dövlətlərarası müqavilələr əsasında qurulub.

Nazir rəhbərlik etdiyi qurumun Türkiyə Daxili İşlər Nazirliyi, o cümlədən Jandarm Komandanlığı ilə münasibətlərin daha da inkişaf etdirməsinə böyük önəm verildiyini, ordu quruculuğunda, o cümlədən Daxili Qoşunların formalaşmasında, ən müasir tələblərə cavab verən quruma çevrilməsində, şəxsi heyətin peşəkarlığının daha da yüksəldilməsində Türkiyə Silahlı Qüvvələrinin, həmçinin Jandarm Komandanlığının böyük zəhməti olduğunu xüsusi vurğulayaraq buna görə təşəkkürünü bildirib. O, Türkiyə Jandarm Qüvvələri Baş Komandanının ölkəmizə səfərinin əlaqələrimizin inkişafına və daha da dərinləşməsinə müsbət təsir göstərəcəyinə əminliyini ifadə edib.

Y. Güler isə Azərbaycana səfərindən, Bakının ən gözəl paytaxt şəhərlərindən biri olmasından, ölkəmizin dinamik inkişafından, eyni zamanda, Daxili Qoşunların yüksək peşəkarlığa və döyüş qabiliyyətinə malik mobil bir quruma çevrilməsindən məmnun olduğunu bildirib. O, iki ölkənin müvafiq orqanları arasındakı faydalı işbirliyini yüksək qiymətləndirib, “bir millət, iki dövlət” olaraq Türkiyənin hər zaman Azərbaycanın yanında yer aldığını, ordusunun, Daxili Qoşunlarının inkişafı üçün bundan sonra da səylərini əsirgəməyəcəklərini, belə əməkdaşlığın, təcrübə mübadiləsinin qardaş xalqlarımızın  və ölkələrimizin mənafelərinə xidmət etdiyini vurğulayıb.

Görüşdə tərəfləri maraqlandıran bir sıra digər məsələlər də müzakirə edilib. Qəbulda Türkiyənin ölkəmizdəki səfiri Erkan Özoral iştirak edib.

Bakıda “Qədim mətnlər və klassik mənbələr erməni saxtakarlıqlarını və uydurmalarını ifşa edir” mövzusunda konfrans keçirilib.

APA-nın məlumatına görə, tədbirdə çıxış edən agentliyin sədri Kamran İmanov bildirib ki, bu, UNESCO-nun elan etdiyi 23 aprel - Ümumdünya Kitab və Müəlliflik Hüququ günü və 26 aprel – Beynəlxalq Əqli Mülkiyyət Gününə həsr olunmuş silsilə tədbirlərdən biridir.

O qeyd edib ki, məqsəd hay-erməni saxtakarlıqlarını və uydurmalarını qədim mətnlərə və klassik mənbələrə söykənərək ifşa etməkdir: "Bu konfrans erməni mifomaniyasını tarixi sübutlarla, elmi dəlillərlə və danılmaz faktlarla ifşa etmək missiyasını davam etdirən yığıncağa çevriləcək. Çünki erməniçilik “Azərbaycan mədəni ənənələrinin mənimsənilməsi erməni ənənəsi” ilə yanaşı, folklor yaradıcılığının bir növünə - mif yaradıcılığına çox meyllidir. Bu mifologiyanın məqsədi “böyük torpaqlar” stereotipini və qonşulara qarşı ərazi iddialarını bir-birinə bağlamaq, qonşuların mədəni irsinin mənimsənilməsinə “təbiilik” gətirmək, haqq qazanmaq üçün “sübutlar”, hətta “legitimlik” əldə etməkdir. Nəhayət, məhz bu mifologiya, erməni xadimlərinin – istər siyasətçi, istər alim, istərsə də kütlə olsun, dünya görüşünü müəyyənləşdirir. Ermənilərin “müstəsnalığı” haqqında yaradılmış mif və xarici aləmə qarşı “əzabkeşlik” tezisindən irəli gələn ambisiya və iddialar erməni düşüncəsində təbii olan adilik rolunu hər cür aradan götürməyə çalışır, ermənilərin “xüsusi missiya”sının irəli sürülən stereotipi isə beynəlxalq hüququn müasir sülh quruculuğunun təməl daşı kimi tanınmasına mane olur".

Konfransda çıxış edən millət vəkili, Azərbaycan Ağsaqqallar Şurasının sədri Fəttah Heydərov isə Azərbaycan-Ermənistan, Dağlıq Qarabağ münaqişəsi sülh yolu ilə həlli məsələsinə diqqət çəkib. Onun sözlərinə görə, erməni yalanları və uydurmaları bu günün, dünənin faktı deyil: "Beynəlxalq aləmdə erməni yalanlarına uyan və onların mənafeyini müdafiə edən qüvvələrin təsiri altında Azərbaycan-Ermənistan, Dağlıq Qarabağ münaqişəsi sülh yolu ilə həllini tapmır. Böyük cəsarətlə demək olar ki, ermənilərin məqsədi yeni dünya müharibəsi yaratmaqdır. Qarabağ heç vaxt ermənilərin olmayıb. Ermənilər həmişə o torpaqlarda baş verən münaqişə və müharibələrin əsas səbəbkarı olublar. Gənc nəsil bilməlidir ki, erməni təbliğatı tarixən də, bu gün də nə qədər anti-bəşəri, anti-sülh, anti-tərəqqi olub".

Türk Mədəniyyəti və İrsi Fondunun prezidenti Günay Əfəndiyeva, millət vəkili Hikmət Babaoğlu və başqaları tədbirin əhəmiyyətindən, ermənilərin tarixən Azərbaycanın maddi-mədəniyyət abidələrinə qarşı həyata keçirdiyi özününküləşdirmə siyasətindən danışıblar.

Tədbir məruzələrlə davam edib.

Azərbaycan, Rusiya və Ermənistan xarici işlər nazirləri Elmar Məmmədyarov, Sergey Lavrov və Edvard Nalbandyanın görüşünün tarixi məlum olub.

Dalga tv "Report"-a istinadən xəbər verir ki, XİN başçıları aprelin 28-də Moskvada görüşəcəklər.

Görüşdə Dağlıq Qarabağ münaqişəsinin həlli məsələsi müzakirə olunacaq.

Azərbaycan prezidenti İlham Əliyev Səudiyyə Ərəbistanı Krallığının energetika, sənaye və təbii sərvətlər naziri Xalid Əbdüləziz D.Əlfalihin başçılıq etdiyi nümayəndə heyətini qəbul edib.

APA-nın xəbərinə görə, bu barədə Azərbaycan prezidentinin mətbuat xidmətinin yaydığı məlumatda deyilir. 

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Azərbaycan-Gürcüstan dostluğu günləri” adlı yeni layihənin icrasına start verilib.

“Türk Dünyası İnfo” İctimai Birliyindən AZƏRTAC-a bildiriblər ki, layihə 4 ay müddətinə həyata keçiriləcək. Layihə Azərbaycanın milli maraqlarının müdafiəsi istiqamətində təbliğat işlərinin aparılması, yeni nəslə vətənpərvərlik hisslərinin aşılanması məqsədi daşıyır. Azərbaycan-Gürcüstan dostluğu timsalında və qonşu ölkədə soydaşlarımızın kompakt yaşaması əsas götürülərək, regionda milli maraqlarımızın, ana dilimizin, tarixi-mədəni dəyərlərimizin qorunması kontekstində Gürcüstanda uyğun profilli tədbirlərin – Azərbaycan-Gürcüstan dostluğu günlərinin keçirilməsi nəzərdə tutulub.

Birliyin sədri Dəyanət Osmanlı bildirib ki, bu ölkədə soydaşlarımızın gənc intellektual hissəsi, eləcə də ölkəmizə dost münasibətində olan müasir gürcü yazarları, elm adamları arasında Azərbaycan həqiqətləri, hər iki ölkə üçün ermənilərin siyasətinin acı nəticələri barədə məlumatlar yaymaq, habelə tarixi, ədəbi-mədəni nümunələrimizin təbliğinə böyük ehtiyac duyulur. Qeyd etmək yerinə düşər ki, Azərbaycan Prezidenti İlham Əliyevin 2015-ci ilin noyabrında Gürcüstana səfəri zaman müxtəlif dairələrdə, o cümlədən soydaşlarımızla keçirdiyi görüşlər insanlarımızın perspektiv milli inkişafa hesablanmış inteqrasiya təşəbbüslərdə böyük bir stimuldur. Eyni zamanda, səfəri ölkələrimizin müştərək maraqları baxımından yeni nəsil insanlarımızın dost ölkənin ictimai platformasında real imkanlar qazanmaları üçün ciddi dəstək hesab edirik. Bu mənada Prezident İlham Əliyevin Marneuli şəhərində soydaşlarımızla görüşdəki çıxışındakı tezislər milli maraqlarımızın, dəyərlərimizin qorunması istiqamətində layihənin icrasında xüsusilə konseptual əhəmiyyətə malikdir.

Bu kontekstdən çıxış edərək bir toplu nəşr olunacaq. Kitabda ölkələrimiz və xalqlarımız arasındakı dostluq münasibətlərini əks etdirən seçmə materiallar yer alacaq və nəşr Gürcüstanda ictimaiyyətin diqqətinə təqdim olunacaq.