Çeçenistan Respublikasının başçısı Ramzan Kadırov müsəlman ölkələrinin liderlərini Qərb ölkələri və ABŞ-ın xarici siyasəti səbəbindən öz ölkələrini tərk etmək məcburiyyətində qalan miqrantların problemlərinə qarşı birləşməyə çağırıb.

"Dalğa TV" RİA "Novosti"yə istinadən xəbər verir ki, bu barədə o, şəxsi bloqunda yazıb.

"Biz zəiflərə, məzlumlara və həyatları təhlükədə olan insanlara qayğı göstərməliyik. Ona görə Türkiyə, Səudiyyə Ərəbistanı, BƏƏ, Qətər, Oman, Bəhreyn, Küveyt, İordaniya, İndoneziya, Malaziya, Qazaxıstan, Türkmənistan, Özbəkistan, Azərbaycan, Tacikistan və digər müsəlman ölkələrinin liderlərini din qardaşlarımızın müdafiəsinə qalxmağa çağırıram", — deyə Çeçenistan lideri yazıb.

II İliya Azərbaycan hakimiyyətinə müraciət etdi

“İnternetdə bu yaxınlarda klip yayılıb”.

Gürcüstan Patriarxlığı Azərbaycan ərazisində yerləşən Müqəddəs Georgi kilsəsində çəkilən və internetdə yayılan videokadrlar ilə əlaqədar bəyanat yayıb.

"Dalğa TV"  “Gürcüstan-onlayn”a istinadən xəbər verir ki, Patriarxlıq bu kadrlarda əks olunan səhnələrə qəzəblənərək, Gürcüstan və Azərbaycan hakimiyyətini bu faktı araşdırmağa çağırıb.

“İnternetdə bu yaxınlarda klip və ya bədii filmin bir hissəsi yayılıb. Çəkiliş bu gün Azərbaycan tərkibinə daxil olan, tarixi Ereti ərazisində yerləşən, mühüm mənəvi gürcü ocağında aparılıb.

Ssenari təxminən belədir: naməlum kişi və qadın xəzinəni ələ keçirmək üçün məbədə gəlirlər və iki katolik-rahibin başından dəyənəklə vuraraq onları zərərsizləşdirirlər, sonra isə onların paltarını geyinərək məbədə daxil olurlar. Onlar xəzinəni tapırlar. Qadın xəzinəni götürərək qaçır, kişi isə orda qalaraq digər ruhanilər (katolik rahib geyimində) ilə şərq döyüş üslubundan istifadə edərək mübarizə aparır.

Bütün bunlar kilsədə və onun mərkəzi hissəsində baş verir, bu isə minlərlə və hətta on minlərlə insanın dini hisslərinə qarşı saymamazlıqdır.

Bu kadrları çəkənlər həm pravoslavlar, həm də müsəlmanlar üçün ibadət yeri olan məkanı oyun meydanına çeviriblər. Bura əsrlər boyu insanlar ayaqyalın gəlir və müqəddəs Georgidən yardım diləyirlər.

Gürcüstan Patriarxlığı Gürcüstan və Azərbaycan hakimiyyətinə müraciət edərək bu faktı tez bir zamanda araşdırmağa və baş verənlərə görə müvafiq tədbirlərin tətbiq edilməsinə çağırır”, - bəyanatda deyilir.

O qeyd edir ki, ilk baxışdan filmdə yolverilməz heç nə yoxdur, amma kadrlarda aktyorların tarixi abidələrə yalnız pis münasibət bəsləmələri deyil, hətta xristianların dini hisslərini təhqir etmələri də görünür, onlar altarda və məbədin divarlarında tullanır, dama qalxırlar və s.

“Düşmən öz uğursuzluqlarını “kompensasiya” etməyə cəhd göstərir”.

Azərbaycan Respublikasının Hollandiya, Belçika və Qatardakı səfirliklərinin internet ünvanları 5 sentyabr 2015-ci il tarixində özünü “Artsax kiber ordusu” adlandıran qrup tərəfindən kiber terror hücumlarına məruz qalıb.

"Dalğa TV" xəbər verir ki, bu barədə XİN-nin Mətbuat xidmətinin rəhbəri Hikmət Hacıyev bildirib.

Qısa müddət ərzində səfirliklərin internet saytlarının fəaliyyəti bərpa edilib.

Ermənistan tərəfindən Azərbaycan Respublikasının internet resurslarına, o cümlədən ölkəmizin xaricdəki diplomatik nümayəndəliklərinin internet saytlarına kiber terror hücumları davamlı əsasda həyata keçirilir.

Qəsddən vəziyyəti gərginləşdirmək üçün atəşkəs rejimini kobud şəkildə pozan, cəbhə zonasında təxribat-diversiya əməliyyatları törədərək məğlubiyyət və insan itkisi ilə üzləşən və diplomatik müstəvidə tamamilə təcrid olunmuş vəziyyətə düşən Ermənistan kiber terrorizm əməllərinə əl atmaqla, öz uğursuzluqlarını “kompensasiya” etməyə cəhd göstərir.

Ermənistan tərəfindən səfirliklərimizin internet saytlarına qarşı olan hücumlar müvafiq olaraq, bu ünvanları “host” edən serverlərə və serverlərin yerləşdiyi ölkələrin internet resurslarına və məkanına qarşı da kiber terrorizm əməlləridir.

 Gürcüstan və Argentina arasındakı viza haqqında saziş qüvvəyə minir

"Dalğa TV" xəbər verir ki, Gürcüstan və Argentina arasında vizasız gediş-gəlişi haqqında saziş bu gün qüvvəyə minmişdir.

Xarici İşlər Nazirliyinin məlumatına görə, adi pasportlara malik vətəndaşlar hər iki ölkəyə 90 gün viza olmadan səyahət edə və qala biləcəklər.

Saziş 2015-ci ilin iyun ayında imzalanıb.

Tiflis yaxınlığında yerləşən və azərbaycanlıların kompakt yaşadığı Poniçala (Soğanlıq) kəndində 17 yaşlı azərbaycanlı qətlə yetirilib.

APA-nın Gürcüstan bürosunun məlumatına görə, hadisə sentyabrın 2-də gecə saatlarında baş verib. Bacısı oğlunun kiçik toyunda iştirak edən Poniçala (Soğanlıq) kənd sakini, kənd orta məktəbin 11-ci sinif şagirdi Vüsal Emzar oğlu Hüseynov güllə ilə vurularaq öldürülüb.
Vüsal Hüseynovun əmisi Zaminkar Hüseynov APA-ya açıqlamasında hadisənin təfərrüatları barədə danışarkən bunları deyib: "Qardaşım oğlunu güllə ilə vurub öldürən təxminən 22 yaşlı Aqil Əli oğlu Kərimov atası və 4-5 nəfər birgə toya gəlib Vüsalın atası Emzarı məclisdən çağırıb, söhbət ediblər. Onların arasında mübahisə yaranıb. Mübahisə zamanı bir il bundan əvvəl Vüsalın qardaşı ilə Aqil arasında olan keçmiş mübahisə yenidən xatırlanıb. Atasının mübahisə etdiyini bilən Vüsal onun yanına gəlib. Aqil tapançanı çıxarıb bir güllə havaya, birini isə Vüsala atıb. Vüsal hadisə yerində keçinib. Hadisəni törədənlər aradan çıxıblar".
Zaminkar Hüseynov cinayət törədən Aqil Əli oğlu Kərimovun saxlanıldığını və hadisə ilə bağlı polis tərəfindən cinayət işi qaldırıldığını bildirib.
Z. Hüseynov hadisəni törədən şəxsin vəhhabi olduğunu da deyib. Onun sözlərinə görə, həmin şəxslər hazırda mərhum Vüsal Hüseynovun böyük qardaşı Bəhram Hüseynova da hədə-qorxu gəlirlər.
V. Hüseynov sabah Poniçalada (Soğanlıqda) torpağa tapşırılacaq.

Bakı metrosun intihar hadisəsi baş verib. 

"DalğaTV"  xəbər verir ki, bir qədər öncə “28 May” stansiyasında 18-20 yaşında bir oğlan özünü qatar reyslərinin üstünə atıb. Onun öldüyü bildirilir. "Bakı Metropolitieni"nin mətbuat katibi  Nəsimi Paşayevi faktı təsdiqləyib. Hadisənin səbəbi araşdırılır.