Daxili İşlər Nazirliyi iki bacının itkin düşməsi ilə bağlı məlumat yayıb.

ANS PRESS-in məlumatına görə, 2000-ci ildə Gəncə şəhərində anadan olmuş iki bacı-Məryəm və Səkinə Abdurəhmanova bu il aprelin 29-da gecə saat 01.00 radələrində yaşadıqları evdən gediblər və bir daha geri qayıtmayıblar. Qızların atasının adı Sabirdir.

İtkin düşmüş bacıların xarakterik əlamətləri aşağıdakılardır: Səkinə Abdurəhmanovanın boyu 1 metr 60 santimetr, orta köklükdə, gözləri və saçları qara rəngdədir. Evdən gedərkən əynində ağ-qara rəngli şalvar, qara kofta, ayağında ağ rəngli idman ayaqqabısı olub.

Məryəm Abdurəhmanovanın boyu isə 1 metr 55 santimetrdir, o da orta köklükdə, gözləri və saçları qara rəngdədir. Evdən çıxarkən əynində göy rəngli cins şalvar, ağ kofta, ayağında ağ rəngli idman ayaqqabısı olub.

Səkinə və Məryəm Abdurəhmanovaları görənlərdən və ya itkin düşmüş iki bacı barəsində hər hansı məlumatı olanlardan DİN-in "102" Xidmətinə, həmçinin (022) 256-52-19, (022) 256-07-73 nömrəli şəhər, eyni zamanda, (050) 315-44-05, (050) 322-18-32 və (050) 327-58-50 nömrəli mobil telefonlara zəng edərək bu haqda Gəncənin Kəpəz Rayon Polis İdarəsinə məlumat vermələri xahiş olunur.

Binəqədi rayonunda baş verən yanğın hadisəsindən sonra paytaxtın bir çox nöqtələrində fasadların sökülməsi işlərinə başlanılıb. Baxmayaraq ki, həmin binaların əksəriyyəti şəhərin mərkəzi hissəsində idi və şəhərin qonaq qarşıladığı bir vaxtda gözəlliyi üçün xüsusi önəm kəsb edirdi. Amma dövlət başçısının tapşırığından da aydın göründü ki, insanların təhlükəsizliyi hər şeydən önəmlidir. Bəs, yeni üzlüklər əvvəlkindən nə ilə fərqlənəcək?

ANS TV-nin məlumatına görə, poliuretan üzlüklü binaların fasadlarında aparılan söküntü işləri yekunlaşmaq üzrədir. Binaların xarici görünüşünü maksimum qısa vaxta qaydaya salmaq üçün söküntü ilə yanaşı yeni üzləmə işlərinə start verilib.

Səbael rayonunda fasadında poliuretan üzlükdən istifadə olunmuş 6 bina var. Onların hər birində söküntü işləri yekunlaşıb. Yeni üzləmə işləri isə ətraf infrastruktura uyğun olaraq hər binada fərqli şəkildə həyata keçiriləcək. Məsələn, bayraq meydanı yaxınlığında jurnalistlər üçün tikilən binada yeni fasad əvvəlkindən tam fərqlənəcək.

“Binanın fasadının artıq "aqlay"la üzlənilməsinə başlanılıb. Yaxın vaxtlarda binanın bəzi hissələrinə də boyanın vurulması işlərinə start veriləcək. Binan görüntüsü əvvəlkindən də yaxşı olacaq”, – deyə Səbael rayonu icra hakimiyyətinin nümayəndəsi Qurban İsmayılov bildirib.

Xətai rayonunda da poliuretan üzlüklərin sökülməsi başa çatıb. 5 və 9 mərtəbədən ibarət binalarda fasadın səliqəli alınması üçün təmir işləri aparılır. Kərpic daşlardan eyvanlar tikilir və pəncərələr dəyişdirilir.

Aprelin 10-da yanan 9 mərtəbəli binada da təmir işləri davam edir. Burda fasadla yanaşı mənzillərdə də bərpa işi aparılır. İş icraçılarından aldığımız məlumata görə 10 gün ərzində bina sakinlərə təhvil veriləcək.

Binəqədi rayonunda isə söküntü işləri hələ ki yekunlaşmayıb. Mayın 19-da yanğın hadisəsinin baş verdiyi 16 mərtəbəli bina təmir üçün əhatələnib.

Sözügedən ərazi icra hakimiyyətinin birbaşa nəzarətindədir. Tikinti-təmir işlərinin aparılması üçün artıq tenderin qalibi olmuş şirkətlə müqavilə bağlanıb.

Mətbuat prospektində isə binalar daha keyfiyyətli üzlüklə üzlənəcək. Buradakı binaların fasadı "aqlay" daşlardan istifadə edilməklə və yanmağa davamlı üzlüklərlə yenilənəcək.

Artıq karkasların qurulması və pəncərələrin dəyişdirilməsi işləri yekunlaşmaq üzrədir. Binalarda aparılan təmirin bir neçə ay ərzində yekunlaşması nəzərdə tutulur.

Bakıda yaşayış binasında baş vermiş yanğınla bağlı daha bir nəfər həbs olunub. Bu, 2012-2013-cü illərdə Binəqədi rayon İcra Hakimiyyəti başçısının birinci müavini işləmiş Qəzənfər Novruzovdur.

 Mayın 19-da Binəqədi rayonunda yaşayış binasında baş vermiş yanğınla əlaqədar binanın “poliuretan” materialla üzlənməsi işlərinə nəzarət funksiyalarını həyata keçirməli olan 2012-2013-cü illərdə Binəqədi rayon İcra Hakimiyyəti başçısının birinci müavini işləmiş Qəzənfər Novruzov Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə təqsirləndirilən şəxs qismində cəlb edilərək, barəsində məhkəmənin qərarı ilə 4 ay müddətinə həbs qətimkan tədbiri seçilib.

Hazırda hadisənin baş verməsində təqsiri olan şəxslərin tam dairəsinin müəyyənləşdirilməklə onların cinayət məsuliyyətinə cəlb edilmələri istiqamətində zəruri istintaq-əməliyyat tədbirləri davam etdirilir.

Qeyd edək ki, bundan əvvəl qulluq mənafeləri tələb etdiyi halda səlahiyyətlərindən istifadə etməmələri nəticəsində vətəndaşların və dövlətin hüquqlarına və qanunla qorunan mənafelərinə mühüm zərər vurmalarında kifayət qədər əsaslar olduğundan binaların üzlənməsində istifadə olunan “poliuretan” məmulatını istehsal edən “Qlobal Stone” MMC-nin baş direktoru Uğur Bəşirov, “Global Construction” MMC-nin sədr müavini Ələkbər Əsgərov, 2012-2013-cü illərdə Binəqədi rayon mənzil-kommunal təsərrüfat birliyinin rəisi işləmiş rayon İcra Hakimiyyətinin təsərrüfat şöbəsinin müdiri Ədalət Rəcəbov və Binəqədi rayonu, 72 saylı mənzil-kommunal istismar sahəsinin rəisi Nizami Orucov Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə təqsirləndirilən şəxs qismində cəlb edilərək barələrində məhkəmənin qərarları ilə 4 ay müddətinə həbs qətimkan tədbiri seçilib.

Həmçinin, qulluq mənafeyi tələb etdiyi halda səlahiyyətlərindən istifadə etməyən və istehsal etdiyi keyfiyyətsiz üzlüklərlə həmin binada fasadlama işləri aparmış “Global Construction” şirkətinin rəhbəri Miryusif Mahmudov barəsində də bu maddələr üzrə 4 ay müddətinə həbs qətimkan tədbiri seçilib.

Bakının Sabunçu rayonu Kürdəxanı qəsəbəsindəki 113 saylı orta məktəbdə son bir neçə ayda 3 şagirdin cəsədi asılmış vəziyyətdə tapılıb.

“Qafqazinfo” xəbər verir ki, bu haqda AzadlıqRadiosuna qəsəbə sakinləri məlumat veriblər. Onların sözlərinə görə, oğlan uşağı olan həmin şagirdlər məktəbdən kənarda, müxtəlif vaxtlarda olsa da məhz şənbə günləri asılıblar. 11-ci sinif şagirdi Ceyhun Əliyev ötən il dekabrın əvvəlində, 10-cu sinif şagirdi Əli Məmmədov fevralda, 6-cı sinif şagirdi Ruslan Fətəliyev isə bu ilin aprel ayınında asılmış vəziyyətdə tapılıblar.

Ölən şagirdlərin valdeynləri mətbuata açıqlama vermək istəməsələr də qəsəbə sakinləri baş verənləri müxtəlif səbəblərlə izah edirlər. Onlar ölmüş şagirdlərdən birinin radikal dini cərəyana meylli olduğunu bildirirlər.

Bəzi sakinlər isə hər 3 hadisəni yeniyetmə yaş dövrü ilə əlaqələndirirlər. Ama müxtəlif vaxtlarda baş vermiş hadisələrin eyni səbələrdən baş verdiyini ehtimal edən sakinlər də az deyil. Şagirdlərin hər üçünün şənbə günü ölməsinə mistik don geyindirənlər də var.

Sakinlər onu da bildirdi ki, hər üç şagird fiziki baxımdan cüssəli olmaları ilə yaşıdlarından fərqlənirmiş. Şagirdlərdən biri qonşunun, digərləri isə öz həyətlərində asılmış vəziyyətdə tapılıblar. Hər 3 ölüm hadisəsindəki oxşarlıqlar (eyni məktəbdə oxuyan hər 3 şagirdin 15-16 yaşlarında və cüssəli olması, həftənin eyni günündə, eyni vəziyyətdə ölmələri ) qəsəbə sakinləri arasında bəzi müəmmalar da yaradır.

Davamı olmasın deyə...

AzadlıqRadiosu qəsəbə sakinlərindən alınan məlumatları dəqiqləşdirmək üçün 113 saylı məktəbin direktoru Şirin Abbasova ilə əlaqə saxlayıb. Direktor hər 3 şagirdinin öldüyünü təsdiqlədi. Lakin o, hər 3 hadisənin məktəbdən kənarda baş verdiyindən səbəblər haqda məlumatsız olduğunu bildirdi: “Məktəbdə oldu, ya məktəbdən kənar, baş verənlər bizim üçün də çox ağırdır. Onlar gələcəyin əsgərləri idi. Belə olmamalı idi. Nə üçün olub, aidiyyatı orqanlar araşdırıb tapılmalıdır.

Bəlkə ailədə nə isə problemləri olub. Amma məktəbdə onlar problemsiz uşaq olublar. Müəllimlərlə heç bir problemləri olmayıb. Onlar bütün müəllimlərlə gözəl münasibət saxlayıblar. Hamımıza maraqlıdır ki, bu nəyə görə olub. Davamı olmasın deyə, bu hadisələrin əsası tapılmalıdır. Hadisələr baş verən kimi dərhal ora getmişəm, valideynlərlə görüşüb söhbət etmişəm. İş orasındadır ki, valideynlər də səbəbini bilmir”.

Hər 3 ölüm hadisəsi axşam saatlarında baş verib

Məktəb direktorunun sözlərinə görə, hər 3 hadisə gecə vaxtlarında olub: “Hadisələrdən biri dərsdən sonra baş verib. 11-ci sinif uşaqların ən mehriban vaxtıdır. Deyiblər, gülüblər sonra ayrılıblar. Ekspertizanın rəyi göstərir ki, hər 3 hadisə axşam saatlarında baş verib. Birinci hadisədə lap şoka düşmüşdük. Həmin şagirddən gözləmirdik.

Bu məsələnin əsası tapılmalıdır. Biz də bilmək istəyirik ki, uşaqların başına gələn nədir. Sonuncu ölən şagirdin sənədində doğum tarixi 2003-ci il göstərildiyindən 6-cı sinifdə oxuyurdu. Ancaq, anası deyirdi ki, əslində o 1999-cu ildə doğulub”.

4-cü oxşar hadisə?

AzadlıqRadiosu Sabunçu rayon Prokurorluğu ilə də əlaqə saxlayıb. Şagirdlərdən Ruslan Fətəliyevin ölüm işini araşdıran müstəntiq Günay Məmmədova hadisə ilə bağlı istintaqın davam etdiyini, hələlik nəticənin olmadığını bildirdi.

O, digər iki ölüm hadisəsi ilə bağlı cinayət işindən xəbərsiz olduğunu bildirdi. Bundan öncə Sabunçu rayon Prokurorluğundan “Amerikanın Səsi”nə bildiriblər ki, hər üç şagirdin ölümü ilə bağlı Cinayət Məcəlləsinin 125-ci maddəsi ilə (Özünü öldürmə həddinə çatdırma) cinayət işi açılıb və istintaq davam edir.

Sakinlər onu da bildirdilər ki, həmin ərəfədə qəsəbədə yaşayan 15 yaşındakı bir qız da eyni vəziyyətdə, qonşu Məhəmmədi qəsəbəsində ölmüş tapılıb. Onların sözlərinə görə, həmin qız əvvəl 113 saylı məktəbdə oxuyub və bir müddət öncə başqa məktəbə keçib. Lakin, deyilən qızın ölməsi hələlik rəsmi təsdiqini tapmayıb.

Hər bir insan əhvalının xoş olmasını arzulayır və bunun üçün müxtəlif vasitələr axtarır. Təbii ki, insanın əhvalının necə olması onun həyat tərzindən birbaşa asılıdır. Məsələn, sevdiyin işlə məşğul olmaq, xoş musiqiyə qulaq asmaq, təmiz havada gəzinti, normal yuxu rejimi, yaxın dostlarla bir arada olmaq və s. insanın əhvalına müsbət təsir göstərir. Ancaq bunlarla yanaşı onu da nəzərə almaq lazımdır ki, gündəlik qida rasionuna daxil edilən ərzaq məhsullarının da insan əhvalına təsiri əsas faktorlardan biridir.

Modern.az saytı sağlamlıqla bağlı növbəti yazıda insanın əhvalını yaxşılaşdıran qida məhsulları haqqında bilgiləri təqdim edir.

1. İnsanın əhvalına müsbət təsir göstərən ərzaq məhsullarından biri yoqurtdur. Bir şərtlə ki, bu qida məhsulunu alarkən onun təbii olmasına güvənəsiniz. Xüsusilə yay fəslində əhvalınızı yaxşılaşdırmaq istəyirsinizsə yoqurtdan istifadə edin. Daha yaxşı olar ki, evdə hazırlanmış yoqurtdan bəhrələnəsiniz.

2. Rəngləri ilə göz oxşayan meyvə və tərəvəzlər, xüsusilə kök, qırmızı şirin bibər, badımcan, çuğundur, xurma, portağal keyfinizi yaxşılaşdıracaq. Müvsümə uyğun olaraq meyvə və tərəvəzlərdən istifadə etsəniz əhvalınız yüksək səviyyədə olacaq.

3. Balıq məhsullarının orqanizm üçün saysız-hesabsız faydaları sırasında əhvala müsbət təsiri də hələ qədim zamanlardan məlumdur. Həftədə iki gün balıq və balıq məhsullarından istifadə etməklə əhvalınızı 7 gün arzuladığınız səviyyədə saxlaya bilərsiniz.

4. Gündəlik qida rasionuna kiçik bir miqdarda pendir əlavə etsəniz əhvalınızdan razı qalacasınız. Nahaqdan deməyiblər ki, fransız xalqı keyf eyləyir. Çünki dünyada ən çox pendirdən istifadə edənlər fransızlardır.

5. Müntəzəm olaraq qozdan istifadə etməklə siz nəinki əhvalınızı yaxşılaşdıracaqsınız, həm də özünüzü stressdən, gərginlikdən qorumuş olacaqsınız. Buna görə də səhərlər evdən çıxanda cibinizə bir ovuc qoz tökməyi unutmayın.

6. Əhvalınızın səhər tezdən yaxşı olmasını istəyirsinizsə səhər yeməyində bir ədəd yumurta istəyinizi peallaşdıracaq. Ancaq orqanizminizin bu qida məhsuluna uyğunluğunu nəzərə alaraq qədərində istifadə etməyiniz məsləhət görülür. Həftə ərzində hər dəfə 1 ədəd olmaqla 4 gün yumurtadan istifadə etmək tövsiyə olunur.

7. Çay min bir dərdin dərmanı olmaqla yanaşı əhvalı da yaxşılaşdırır. Xüsusilə də bitki çayları. Gün ərzində bir-iki fincan nanə çayı içsəniz özünüz şahidi olacaqsınız ki, əsəbləriniz nə qədər sakit, əhvalınız isə nə qədər yüksəkdir.

Keyfinizin yaxşı olmasına diqqət yetirin ki, sağlamlığınız da yerində olsun. Hər birinizə xoş əhval arzulayırıq.

Xalq şairi Zəlimxan Yaqubun yeni kitabı işıq üzü görüb.

 “Dünya çiçək, insan oğlu arıdı” adlanan bu kitabda şairin son iki ildə yazdığı və indiyədək çap olunmumış şeirləri ilə yanaşı “Dahiləri belə gördüm”, “Daş və tarix”, “Aşıq Veysəl dünyası”, “Turan sevgisi”, “Şuşa şikəstəsi” və “Ün” poemaları yer alıb.

“Şərq-qərb” nəşriyyatında nəfis tərtibatla çap olunmuş kitabın redaktoru Musa Nəbioğludur.

Xatırladaq ki, bu, Z. Yaqubun 2015-ci ildə nəşr olunmuş üçüncü şeirlər kitabıdır. Bundan əvvəl şairin “Qürbət düşüncələri” və “Mənə ümid kimi bax” kitabları, eyni zamanda M. Nəbioğlunun Z. Yaqub yaradıcılığına həsr etdiyi “Sözün Zəlimxan zirvəsi” adlı kitabı oxucuların ixtiyarına verilib.