Bakı hökumətinin başçısı: “Avropa Oyunlarına yüksək səviyyədə hazırlıq var”

Hazırda Bakıda bir neçə istiqamətdə iş gedir. Bir tərəfdən yanan binalar təmir olunur, sakinlərə kompensasiya verilməsi məsələsi hələ də gündəmdədir. Digər tərəfdən binalardan yanğına həssas üzlüklərin sökülməsi prosesi davam edir. Bu binaların hansı materialla üzlənəcəyi maraqla gözlənilir.

Bundan əlavə, Bakının mərkəzində “Sovetski”, “Beşmərtəbə” adlanan ərazilərin sökülməsi gözlənilir. Bütün bunların fonunda Bakı I Avropa Oyunlarını qarşılamağa hazırlaşır. Belə bir vəziyyətdə proseslərin nə yerdə olması və aparılan işlərlə bağlı yaranan suallara aydınlıq gətirmək üçün “Yeni Müsavat” Bakı Şəhər İcra Hakimiyyətinin başçısı Hacıbala Abutalıbovla müsahibəni təqdim edir.

- Hacıbala müəllim, Binəqədi rayonunda yanan binada təmir işləri ilə bağlı vəziyyət nə yerdədir?

- Binada yüksək səviyyədə işlər gedir. 4 aya o mənzillər sahiblərinə təhvil veriləcək.

- Xətai rayonunda yanan binanın sakinləri təmir işlərinin keyfiyyətsiz aparılmasından narazıdırlar, siz nəzarət edirsizmi?

- Bütün bu deyilənlər yalandır. Orada belə hal yoxdur. Xətai rayonunda yanan binada zərər dəyən mənzillərin sahiblərinə hər birinə 15 min manat kompensasiya verilib, təmir də yüksək səviyyədə aparılır. Gələn ayın sonuna kimi mənzillər sakinlərə təhvil veriləcək.

- Hacıbala müəllim, yanan binanın sakinlərinə sağlamlığa dəyən ziyana görə kompensasiya nə zaman ödəniləcək?

- Nazirlər Kabinetinin bu haqda qərarı var və bütün işlər ona uyğun aparılır. Qərarda belədir ki, zərərçəkmişlərə 20 min manat ödənilsin. Binada 56 mənzil var idi, lakin iki mənzil əlavə olaraq ayrı-ayrı bölündüyü üçün 58 mənzil hesablandı. Bu mənzillərin sahiblərinin hər birinə 20 min manat ödənildi. Xəsarət alanlara, yəni yanğın zamanı xəsarət alması ilə bağlı xəstəxanadan, Səhiyyə Nazirliyindən arayış gətirənlərə 5 min manat, vəfat edənlərin hər birinə görə, ailələrinə 15 min manat ödənilib. Mənzil sahiblərindən 52 nəfəri kompensasiya ilə təmin olunub. 6 mənzil sahibinə kompensasiya ödənilməsi qalıb. Bunlardan birinə səbəb mənzil sahibi olan qaynana ilə evində qalan oğul və gəlin arasındakı mübahisədir. Onu birinci gün həll etməyi planlaşdırırıq. Qalan 5 nəfərin işi isə vərəsəlik hüququnun bərpası ilə bağlıdır. Vərəsəlik hüququnun bərpası prosesi 6 ay çəkir. 6 ay ərzində kim məhkəmə yolu ilə həmin mənzillərin vərəsəlik hüququnu alacaqsa, bu barədə məhkəmənin verdiyi arayışı aparıb banka verməklə pulunu verə biləcəklər.

- Hacıbala müəllim, Binaların üzlüklərinin sökülməsi nə zaman yekunlaşacaq və hansı materialla üzlənməsi nəzərdə tutulur?

- Bakı şəhərində olan binaların hamısından üzlüklər tamamilə sökülüb. İndi Mətbuat prospekti və Ziya Bünyadov prospektində binaların üzlükləri keramika-qranitlə üzlənir, Mətbuat prospektində ağ daşla üzlənən, yalnız eyvanları yanğına səbəb ola biləcək materialdan olan 6 binanın eyvanı betonla üzlənəcək. Nobel prospektində bütün binalar təmizlənib, onların hamısı və digər binalar Almaniyadan, Finlandiyadan və Amerikadan gətirilmiş və xüsusi instruksiya ilə nəzərdə tutulmuş rənglərlə boyadılacaq. İyun ayının 10-a qədər bu işlər yekunlaşmalıdır. Bütün işlər ayın 10-da qurtaracaq.

- Bakıda hansı ərazilərin sökülməsi nəzərdə tutulur və nə zaman başlanacaq?

- Söküntü işləri artıq başlayıb. Hazırda “Sovetski” adlanan ərazi sökülür. Orada 4 mərhələli sökülmə gedəcək. Birinci, artıq “Sovetski”də söküntü işləri son mərhələyə gəlib çatıb. İkinci, “Nizami” metrostansiyasından İstiqlaliyyət küçəsinə qədər olan ərazi, “Təzəpir” məscidinin ərtafındakı evlərin sökülməsi nəzərdə tutulur. Üçüncü, “Beşmərtəbə”nin yanından Şəmsi Bədəlbəyli küçəsinə paralel olan küçələrdə, Dilarə Əliyeva, Vidadi küçələrinin sökülməsi nəzərdə tutulur. Sökülən ərazilər yalnız və yalnız yüksək səviyyəli yaşıllaşdırma və istirahət zolaqlarına çevriləcək.

- Hacıbala müəllim, son olaraq, Bakı Avropa Oyunlarına hazırdırmı?

- Avropa Oyunlarına yüksək səviyyədə hazırlıq var. Bütün idman zalları və stadionlar, su idman stadionları hamısı Avropa Oyunlarına tam hazırdır. Mən əminəm ki, biz yüksək səviyyədə bu Avropa Oyunlarını başa vura biləcəyik.

Bakıda iki övladını qətlə yetirən qadının əri saxlanılıb.

AzNews.az APA-ya istinadən xəbər verir ki, iki övladını boğaraq öldürən N. Quliyevanın əri Asif Məlikzadə faktla əlaqədar Sabunçu Rayon Prokurorluğuna dəvət edilib. Hazırda A. Məlikzadənin ifadəsi alınır.

N. Quliyeva hadisəni törətməzdən əvvəl məktub yazıb. Məktubda deyilir: “Mən həyatdan bezmişəm. Belə yaşamaq istəmirəm. Mən şeytanın yolu ilə gedirəm. Uşaqları da özümdən sonra heç kimə əmanət etmirəm”.

Qeyd edək ki, məlum hadisə ötən gün Sabunçu rayonu Albalılıq yaşayış massivində qeydə alınıb.

Bakı şəhər sakini, 1988-ci il təvəllüdlü Nəsibə Nəsib qızı Quliyeva övladları 2012-ci il təvəllüdlü Aydan Asif qızı Məlikzadə və 10 aylıq Ayşənin boğazını kəsərək öldürüb.

Hadisədən sonra N. Qurbanova intihar məqsədi ilə özünü bıçaqlayıb. Ağır bədən xəsarəti alan N. Qurbanova 3 saylı Şəhər Klinik xəstəxanasına yerləşdirilib.

Faktla bağlı araşdırma aparılır.

Prezident İlham Əliyev “Azərbaycan Respublikasının Cinayət Məcəlləsində dəyişikliklər edilməsi haqqında” Azərbaycan Respublikasının 2015-ci il 28 aprel tarixli 1266-IVQD nömrəli Qanununun tətbiqi barədə sərəncam imzalayıb.

ANS PRESS-in məlumatına görə, dəyişikliklərə əsasən, aşağıdakı məzmunda 200-2-ci maddə əlavə edilir:

“Maddə 200-2. Genetik modifikasiya olunmuş bitkilərin, yaxud müasir biotexnoloji və gen mühəndisliyi metodları ilə yaradılmış kənd təsərrüfatı bitki materiallarının və ya genetik modifikasiya olunmuş bitkilərin genetik materiallarından istifadə edilərək istehsal olunan yeyinti məhsullarının qanunsuz dövriyyəsi

200-2.1. Elmi tədqiqat, sınaq və sərgilərdə nümayiş məqsədləri üçün nəzərdə tutulmayan genetik modifikasiya olunmuş bitkiləri, yaxud müasir biotexnoloji və gen mühəndisliyi metodları ilə yaradılmış kənd təsərrüfatı bitki materiallarını və ya genetik modifikasiya olunmuş bitkilərin genetik materiallarından istifadə edilərək istehsal olunan yeyinti məhsullarını bilə-bilə idxal etmə və ya satma, bu əməllər xeyli miqdarda törədildikdə -
üç min manatdan beş min manatadək miqdarda cərimə və ya iki ilədək müddətə azadlıqdan məhrumetmə ilə cəzalandırılır.

200-2.2. Elmi tədqiqat, sınaq və sərgilərdə nümayiş məqsədləri üçün nəzərdə tutulmayan genetik modifikasiya olunmuş bitkiləri, yaxud müasir biotexnoloji və gen mühəndisliyi metodları ilə yaradılmış kənd təsərrüfatı bitki materiallarını və ya genetik modifikasiya olunmuş bitkilərin genetik materiallarından istifadə edərək yeyinti məhsullarını istehsal etmə -
dörd min manatdan altı min manatadək miqdarda cərimə və ya üç ilədək müddətə azadlıqdan məhrumetmə ilə cəzalandırılır.

200-2.3. Bu Məcəllənin 200-2.1-ci və 200-2.2-ci maddələrində göstərilən əməllər külli miqdarda törədildikdə -
yeddi min manatdan doqquz min manatadək miqdarda cərimə və ya iki ildən beş ilədək müddətə azadlıqdan məhrumetmə ilə cəzalandırılır.”

Azərbaycan Respublikasının Gürcüstandakı səfirliyi 28 May-Respublika Günü münasibətilə Tbilisinin mərkəzində, ulu öndər Heydər Əliyevin adını daşıyan parkda tədbir keçirib.

Səfir Azər Hüseyn, səfirliyin əməkdaşları, M.F.Axudnzadə adına Azərbaycan Mədəniyyəti Muzeyinin kollektivi, Gürcüstanda fəaliyyət göstərən Azərbaycan şirkətlərinin və şəhər ictimaiyyətinin, eləcə də kütləvi informasiya vasitələrinin nümayəndələri müasir və müstəqil Azərbaycan dövlətinin qurucusu və banisi, ümummilli lider Heydər Əliyevin abidəsi önünə əklil qoyub, gül dəstələri düzüblər.

Sonra parkda bayram gəzintisi olub, şəhər ictimaiyyətinin nümayəndələrinə Azərbaycan Xalq Cümhuriyyətinin yaranma tarixi, fəaliyyəti, süqutunun səbəbləri barədə məlumat verilib.

Mayın 28-də, Respublika Günündə I Avropa Oyunları ilə əlaqədar təlim və sınaq tədbirlərinin keçirilməsi ilə bağlı Bakıda bir sıra yollar üzrə nəqliyyatın hərəkət istiqaməti dəyişdiriləcək. Əhalinin rahat və fasiləsiz hərəkətini təmin etmək məqsədilə Bakı şəhər Dövlət Yol Polisi İdarəsi sürücülərə alternativ yollar təklif edir.

Bunu Trend-ə Daxili İşlər Nazirliyi (DİN) Bakı şəhər Baş Polis İdarəsinin Dövlət Yol Polisi İdarəsinin (BŞDYPİ) İctimai qurumlarla əlaqə bölməsinin rəisi, polis polkovniki Vaqif Əsədov deyib.

Onun sözlərinə görə, mayın 28-də Bakıda I Avropa Oyunları ilə əlaqədar növbəti təlim və sınaq tədbirlərinin keçirilməsi nəzərdə tutulub. Bu isə yollarda müəyyən təhlükəsizlik tədbirlərinin gücləndirilməsi zərurətini yaradır: “Bununla əlaqədar mayın 28-də saat 10:30-dan etibarən məşqlər tam başa çatanadək paytaxtın Neftçilər prospekti boyu hotellərdəki qonaqların Heydər Əliyev Mərkəzinə doğru hərəkətinin müşayiəti və görülən təhlükəsizlik tədbirləri ilə əlaqədar “Azneft” dairəsi, Neftçilər prospekti, “Azadlıq” meydanı, Yusif Səfərov küçəsi, “10-cu zavod” dairəsi, Heydər Əliyev prospekti, Heydər Əliyev Mərkəzi, metronun “Koroğlu” stansiyası, Milli Olimpiya Stadionuna doğru nəqliyyat vasitələrinin hərəkəti üçün alternativ yollar təklif edilir. Belə ki, “Azneft” dairəsindən Niyazi küçəsi, İstiqlaliyyət, Lermontov, Mehdi Hüseyn küçələri və Parlament prospektinə, eləcə də “Cavanşir” körpüsündən Üzeyir Hacıbəyov küçəsi ilə “Azadlıq” meydanı, Zərifə Əliyeva və Rəsul Rza küçələrinə doğru nəqliyyatın hərəkət istiqaməti dəyişdiriləcək”.

V.Əsədov qeyd edib ki, yol polisi əhaliyə, paytaxtın mərkəzinə doğru və əks istiqamətdə hərəkət etmək istəyən sürücülərə alternativ yollar təklif edir: “Onlara paytaxtın cənub girişindən Bakı-Salyan yolunun 14-cü km-dən 3-cü kənar dairəvi yolla Badamdar qəsəbəsi və “20 Yanvar” dairəsi istiqamətində hərəkət etmələri, eləcə də “20-ci sahə” dairəsindən və Bayıl qəsəbəsindən isə Neftçilər prospekti istiqamətinə deyil, dağüstü yolla Badamdar qəsəbəsi və Mətbuat prospekti istiqamətinə hərəkət etmələri tövsiyə olunur. Heydər Əliyev Beynəlxalq Hava Limanından şəhərə doğru gələnlərin hərəkəti Aeroport yolundakı körpünün üzərindən Bakı-Hövsan beton yolu ilə planlaşdırılır. Bakının bu istiqamətdəki qəsəbələrindən isə metronun “Koroğlu” stansiyasına doğru şəhər şosesi ilə körpünün üzərindən Elşən Mehdiyev küçəsindən keçməklə Bakıxanov qəsəbədaxili yollarla və yaxud 8-ci km qəsəbəsi, Qara Qarayev prospekti ilə körpünün üzərindən keçməklə Ziya Bünyadov prospektinə doğru rahat hərəkət etməklə mümkün olacaq. Eyni zamanda, göstərilən ərazilər üzrə əks istiqamətdə hərəkət edənlərə də sadalanan yollardan istifadə etmələri tövsiyə olunur”.

Bölmə rəisi əlavə edib ki, ümumiyyətlə, Ziya Bünyadov prospekti və ona kəsişən bütün yollarda hərəkətin rahat və fasiləsizliyi tam təmin ediləcək.

Gürcüstanın Batumi şəhərində  "EUROWOMAN-2015"  adlı üçüncü beynəlxalq qadın biznes forumu keçirilib. Tədbirdə qlobal inkişaf və qadın iş cari məsələləri - beynəlxalq görüşlər, ayrı-ayrı mövzular müzakirə olunub. Bu məqsədlə, Batumidə iki gün dünyanın müxtəlif ölkələrindən olan qadın liderlər, tanınmış ictimai-siyasi xanımlar, diplomatlar, siyasətçilər, alimlər, hökumət rəsmiləri, ictimai xadimlər və başqa rəsmi şəxslər  iştirak ediblər.

Tədbiri Gürcüstan Beynəlxalq Qadınlar Təşkilatının sədri Nino Kviria açaraq, tədbirin əhəmiyyətindən danışıb. O qeyd edib ki, tədbirin məqsədi biznesin inkişafı sahəsində əməkdaşlığın vahid mexanizmlərini yaratmaq üçün müxtəlif ölkələrin , o cümlədən, Azərbaycanın, Ukraynanın, Ruminiyanın, Polşanın və digər bölgələrdən qadın biznes elitasının nümayəndələri iştirak edirlər. Tədbir Gürcüstan Hökuməti və Acarıstan Muxtar Respublikasının himayəsi, eləcə də Ukrayna səfirliyinin təşəbbüsü ilə keçirilib. Biznes forum Biznesin İnkişafı və Avropa Birliyi, Ticarət,  Qadınların Beynəlxalq Palatası, və digər  aparıcı beynəlxalq təşkilatlar tərəfindən dəstəklənib.

Gürcüstan prezidenti  ilə  bağlı qapılar arxasında keçirilən görüşdən sonra ölkə başçısının qadınların hüquqlarının müdafiəsi ilə bağlı olacaq bütün təşəbbüsləri dəstəklədiyi, ictimai-siyasi həyatda onların rolunu artırmaq üçün daim hazır olduğu bildirilib. Dövlət başçısının  öz iqamətgahında Beynəlxalq Qadınlar biznes forumu “EUROWOMAN-2015” iştirakçılarının şərəfinə ziyafət təşkil etdiyi açıqlanıb. Prezident qadın siyasətçiləri, alimlər və dövlət qulluqçularını salamlayaraq onlara  müraciət edib. O, Prezident administrasiyasının qadın hüquqlarının qorunması istiqamətində olunacaq bütün təşəbbüsləri dəstəkləməyə hazır olduğunu bildirib.

Azərbaycan nümayəndə heyətinin rəhbəri Fatimə Hüseynova dünyada qadın hüquqlarının qorunması, gender bərabərliyinin təmin olunması sahəsində ciddi tədbirlərin həyata keçirilməsinin zəruriliyini diqqət çəkib. O qeyd edib ki, bu cür ciddi problemlərin aradan qaldırılmasında müxtəlif ölkələrin birinci xanımlarının üzərinə böyük vəzifələr düşür. Ölkəmizin birinci xanımı Mehriban xanım Əliyeva  cəmiyyətin müxtəlif sahələrində qadınların rolunun gücləndirilməsini, onların öz fəaliyyətləri ilə bu prosesdə iştirakının təmin olunmasını indi qarşıda duran ən vacib məsələ hesab edir.

Gürcüstan,Azərbaycan və Ukrayna  nümayəndə heyətinin rəhbərləri Nino Kviria , Fatimə Hüseynova və Olqa Azarova öz çıxışlarında hər üç ölkənin ərazisinin işğal olunduğunu, qaçqınların, xüsusilə də , qadınların bu işğaldan əziyyət çəkdiklərini vurğulayıblar. Onlar əminliklə bildiriblər ki, yaxın gələcəkdə hər üç ölkənin ərazi bütövlüyü təmin olunacaq, qaçqınlar öz yurd-yuvalarına dönəcəklər.