İranın sənaye, mədənlər və ticarət nazirinin parlament məsələləri üzrə müavini Səfdər Rəhmətabadini qətlə yetirən şəxs bu gün həbs edilib.

Qatil öz əməlini etiraf edib və qətli şəxsi zəmində törətdiyini bildirib. Ancaq həmin şəxsin adı açıqlanmayıb.

Qeyd edək ki, S. Rəhmətabadi noyabrın 10-da Tehranda öz avtomobilində güllələnib.

Onun baş və sinəsinə atəş açılıb.

ABŞ prezidenti Barak Obama 1979-cu ildən İrana qarşı tətbiq olunmuş sanksiyaların müddətini daha bir il uzadıb.

B. Obamanın qərarı texniki xarakter daşıyır. ABŞ prezidenti hər il bu sənədin müddətini uzadır.

Qeyd edək ki, ABŞ İrana qarşı 1979-cu il noyabrın 14-dən bəri sanksiyalar tətbiq edir. ABŞ prezidenti Cimmi Karter tərəfindən tətbiq olunmuş sanksiyalara və diplomatik münasibətlərin pozulmasına səbəb ABŞ-ın İrandakı səfirliyinin tutulması və diplomatik korpusun əməkdaşlarının 444 gün girov saxlanılması olub.

Bu sanksiyalar ABŞ-dan İrana qida və dərman preparatları daxil olmaqla bir necə malların ixracını, eləcə də İrandan ABŞ-a hər hansı malların idxalını qadağan edir. 1981-ci il yanvarın 19-da Əlcəzair hökumətinin vasitəçiliyi ilə ABŞ-la İran arasında “Əlcəzair sazişi” adlanan sənəd də imzalanıb. Saziş İranın girov saxladığı amerikalılarla bağlı böhranın aradan qaldırılmasını, həmçinin ABŞ və İranın münasibətlərinin nizama salınması üçün bəzi əsas prinsipləri nəzərdə tuturdu. Eləcə də ABŞ İranın daxili işlərinə müdaxilə etməyəcəyini, dondurulmuş bank hesablarını açacağını, İran isə ABŞ-a xarici borclarını ödəyəcəyini vəd etmişdi. ABŞ hesab edir ki, İran bu sazişə əməl etmir, habelə dünyanı təhlükə qarşısında qoyan nüvə silahı istehsal edir. ABŞ-ın sanksiyaları ilə yanaşı, İrana münasibətdə beynəlxalq sanksiyalar da qüvvədədir.

Moskvada adam oğurluğunda şübhəli bilinən 26 yaşlı azərbaycanlı Razim Əhmədov saxlanılıb.


Polis onu Moskvadakı evində həbs edib.

Adam oğuruğu ilə məşğul olan qruplaşmanın lideri hesab olunan R.Əhmədovun gənc yaşda belə bir qruplaşmaya rəhbərlik etməsini onun “qanuni oğru” Nadir Səlifovla yaxınlığının rol oynadığı vurğulanır.

Məlumatlara görə, o, Lotu Quli ləqəbli Nadir Səlifovun adından etnik mütəşəkkil cinayətkar qrupların liderlərinə tapşırıqlar verib.

Fransanın erməni əsilli məşhur müğənnisi Şarl Aznavur Fransada vergilərdən yayınmaq üçün bir çox siyasətçilərə rüşvət verdiyini deyib.

APA-nın Avropa bürosunun xəbərinə görə, Fransanın “France info” radiosuna müsahibəsində Ş. Aznavur müğənni kimi fəaliyyəti dövründə sağ, sol və mərkəzçi partiyaların bir çox üzvlərinə nəğd pul verməklə onların seçki kampaniyalarını maliyyələşdirdiyini söyləyib. Bunun müqabilində o, sonradan həmin siyasətçilərin yardımı ilə vergilərdən yayınırmış: “Vəkil xərcləri çox baha başa gəlirdi, amma bundan da betər hallar olub. Bəzi siyasət adamları var idi ki, mənim problemlərimi həll etməyə qadir idilər. Mən onların seçki kampaniyaları üçün pul köçürürdüm, xüsusən də afişaların hazırlanması üçün. Bir çox siyasətçilərlə iş görmüşəm. Bu, mənə çox baha başa gəlib. Bütün siyasi düşərgələrdən olanlar var idi: sağ, sol və hətta mərkəzçi partiyalardan”.

Bir neçə ildir ki, İsveçrədə yaşayan 89 yaşlı Şarl Aznavur bildirib ki, onu Fransanı tərk etməyə məcbur ediblər.

Hazırda Fransa mətbuatı bu olayı araşdırır və Aznavurdan pul alan siyasətçilərin kim olduğu istiqamətində araşdırma aparır.