Azərbaycan prezidenti İlham Əliyev Niderland Hökumətinin Xəzər regionu, Türkiyə və Rusiya üzrə enerji məsələlərinə dair xüsusi elçisi, senator Rene van der Lindenin “Dostluq” ordeni ilə təltif edilməsi haqqında sərəncam imzalayıb.

Rene van der Linden Azərbaycanla Niderland arasında dostluq və əməkdaşlıq əlaqələrinin inkişafındakı xüsusi xidmətlərinə görə təltif edilib.

İranın Azərbaycan vilayətlərində 1945-ci il dekabrın 12-də Seyid Cəfər Pişəvəri və onun yaxın silahdaşlarının qurduğu Milli Hökumətin yaranmasının 68-ci ildönümü qeyd olunub.

APA-nın “Savalanport”a xəbər saytına istinadən verdiyi məlumata görə, bununla bağlı bu gün yerli vaxtla 14:00-16:00 arasında Qoşaçay (Miyandab) şəhərinin Qıcılı kəndində 21 Azər Hərəkatının şəhidlərindən biri olan Xanəli Motiinin məzarı başında anma mərasimi keçirilib. Ancaq İran İnformasiya, Təhlükəsizlik və Kəşfiyyat Nazirliyinin (ETTELAAT) əməkdaşları tədbirə basqın edib və mərasim iştirakçılarına qarşı güc tətbiq edib.

Həbsə alınanların əksəriyyəti Qoşaçay, Marağa və Məlikkəndi (Məlikan) şəhərlərinin sakinləridir. Onlardan 5 nəfərinin ad və soyadları müəyyənləşib. Bunlar Daryuş Əndəlibian, Yusif Muxtari, Cavad Sudbər, Həbib Mənafiazər (hamısı Qoşaçay) və Muxtar (Artan) İbrahimidir (Məlikkəndi). Hazırda həbsə alınan azərbaycanlı fəalların harada saxlanıldığı barədə heç bir məlumat yoxdur.

Cənubi Afrika Respublikasının ilk qara prezidenti, aparteidə qarşı mübarizənin lideri Nelson Mandelanın ilk evliliyindən olan qızı Makazive və ikinci evliliyindən olan qızı Zenani miras üçün bir-birinə qarşılıqlı iddialar açıblar.

Maliyyə münaqişəsinin əsas predmeti Nelson Mandelanın müxtəlif fondlara bağışladığı sayı-hesabı bilinməyən pullardan kənar şəxsi hesablarında olan 110 milyon dollardır. 
Xüsusilə aclıq və yoxsulluq üzündən cinayətkarlıq səviyyəsinin çox yüksək olduğu ölkədə bu var-dövlət bir anda insanlarda çaşqınlıq yaradıb. Bir çox media qurumları həyatının təxminən 27 ilini həbsdə keçirən liderin bu pulu nə vaxt qazanması barədə ictimai müzakirələr açıblar.

Amma bu müzakirələr Makazive və Zenaninin heç vecinə də deyil. Onlar müzakirələrdən sonra ortaya əlavə16 milyon dollar üçün də məhkəməyə üz tutublar.

Norveçli dustaqlar İsveç həbsxanalarılnda cəza çəkə bilərlər. Norveçin ədliyyə naziri Anders Anundsen isveçli həmkarı Beatrise Aska müraciət edərək müvəqqəti olaraq İsveç həbsxanalarından istifadə etmələrinə icazə verməyi xahiş edib:

“Mən bilirəm ki, İsveç həbsxanalarında boş yerlər çoxdur və bu ölkədə islah-əmək müəssisələrinin bəziləri bağlanır. Bununla bağlı bəzi yerləri icarəyə verməyin mümkünlüyünü öyrənmək istəyirdim”.
Hazırda Norveçdə 1200-dən artıq ittiham olunan şəxs var ki, onlar həbsxanalarda yer çatışmazlığına görə cəzalarını çəkəməyə başlamayıblar. Hazırda İsveç ərazisində 82 islah-əmək müəssisəsi var. Onlardan 4-ü bu yaxınlarda ölkədə dustaqların sayının az olması səbəbindən ixtisara salınıb.