Gürcüstanda azərbaycanlıların yığcam yaşadıqları Kvemo Kartli-Borçalı bölgəsinin Marneuli şəhərində Xocalı soyqırımının ildönümü ilə əlaqədar keçiriləcək tədbirlərə start verilmişdir.
Gürcüstan Azərbaycanlıları Mədəniyyət Mərkəzinin rəhbəri Fazil Həsənov tədbir iştirakçılarına ötən əsrin sonlarında xain düşmənlərin fitnəsi ilə törədilmiş ən dəhşətli faciə barədə ətraflı məlumat vermişdir. Bildirilmişdir ki, hər il olduğu kimi, bu il də soyqırımının ildönümünə həsr olunmuş müxtəlif tədbirlər planlaşdırıldığını vurğulamışdır.
Azərbaycan-Gürcüstan parlamentlərarası dostluq qrupunun rəhbəri Qənirə Paşayeva bir gecədə Azərbaycanın qədim və əzəli şəhəri Xocalının xain düşmənlər tərəfində yer üzündən silinməsinin, onun dinc sakinlərinə amansız divan tutulmasının və yüzlərlə günahsız insanın vəhşicəsinə qətlə yetirilməsinin soyqırımından başqa adı olmadığını demişdir. O, Azərbaycan dövlətinin beynəlxalq aləmdə nüfuzunun artması, ölkəmizin diplomatik uğurları sayəsində artıq çoxlarının bunu etiraf etmək məcburiyyətində qaldıqlarını vurğulamış, bu dəhşətli faciənin təbliğində müasir gəncliyin üzərinə mühüm vəzifələr düşdüyünü qeyd etmişdir.
Gürcüstan parlamentinin deputatları Mahir Dərziyev, Azər Süleymanov, Azərbaycan İşgüzar Qadınlar Cəmiyyətinin sədri Sürəyya İsmayılova və başqaları ölkəmizin haqq işinin mütləq qalib gələcəyinə əmin olduqlarını bildirmişlər. Natiqlər qan yaddaşımız - 20 Yanvar, Xocalı soyqırımı və başqa faciələr, onların səbəbkarları barədə gənclərin ətraflı məlumatlandırılmasının vacibliyini qeyd etmişlər.
Sonra Xocalı soyqırımına həsr olunmuş film nümayiş etdirilmişdir.

Dənizkənarı Milli Parkda "Məhəbbət ağacı" layihəsinin təqdimatı olub.

Mərasimdə Heydər Əliyev Fondunun vitse-prezidenti, IDEA Beynəlxalq Təşkilatının təsisçisi, "Baku" jurnalının baş redaktoru Leyla Əliyeva və Arzu Əliyeva iştirak ediblər . AzərTAc xəbər verir ki, "Məhəbbət ağacı" layihəsi IDEA, "YARAT" Müasir İncəsənət Məkanı və "Baku" jurnalının birgə layihəsidir. Müasir İncəsənət Muzeyinin icraçı direktoru Xəyyam Abdinov iştirakçıları salamlamış və layihə haqqında məlumat verib. Belə bir inanc vardır ki, üzərində sevgililərin adlarının baş hərfi yazılmış qıfılı körpünün sürahilərinə bağladıqda uğur gətirərək səadət vəd edir. Ənənəyə uyğun olaraq, dünyanın əksər ölkələrində gənclər park və bağlarda ağacların budaqlarına lent bağlayır, üzərində təsirli sözlər yazılmış suvenirlər asırlar. Bakının Milli Parkındakı metal konstruksiyalı "Məhəbbət ağacı" onun budaqlarında öz duyğularının möhkəmliyinin sübutunu qoyub getmək istəyən sevən cütlüklərin və sevgililərin daha çox üz tutduqları məkanın - Dənizkənarı Bulvarın daimi bəzəyi olacaqdır. Mərasimdə incəsənət ustaları konsert proqramı ilə çıxış ediblər 

Azərbaycanın “İrəli” və “Qan Donorları Assosiasiyası” ictimai birliklərinin təşkilatçılığı ilə Gürcüstanın Bakuriani şəhərində “Alfa ekstrim Bakuriani” proqramı çərçivəsində idmansevər gənclər üçün qış xizəkçiliyi üzrə təlim keçirilmişdir.
Düşərgə müddətində iştirakçılara “Qan donorçuluğu”, “Sağlam həyat tərzi”, “Ekstremal şəraitdə yaşama üsulları” və s. mövzularda təlimlər keçirilmişdir.
Layihədə 30-dək azərbaycanlı gənc iştirak etmişdir.
Səfərə Gürcüstan azərbaycanlılarının yığcam yaşadıqları Kvemo Kartli-Borçali bölgəsinin Marneuli şəhərindəki “Çay evi”ndə yekun vurulmuşdur.
Qonaqlar burada fəaliyyət göstərən 10-dək dərnəyin işi ilə tanış olmuşlar.
“İrəli” İctimai Birliyinin korporativ əlaqələr üzrə katibi Niyaz Əliyev Bakurianidə ilk dəfə olduğunu və düşərgə iştirakçılarının bu səfərdən razı qaldıqlarını demişdir. O, belə görüşlərin strateji tərəfdaşlar olan ölkələrimizin gəncləri arasında dostluq əlaqələrinin daha da dərinləşməsinə xidmət edəcəyinə əmin olduğunu vurğulamışdır.
Gürcüstan Baş nazirinin milli məsələlər üzrə köməkçisi Savalan Mirzəyev Gürcüstan hökumətinin iki ölkə gənclərinin dostluq əlaqələrinə şərait yaradacaq bütün layihələri dəstəkləməyə daim hazır olduğunu bildirmişdir.
Gürcüstan Baş nazirinin milli məsələlər üzrə köməkçisi Savalan Mirzəyev və “Çay evi”nin meneceri Emin Əhmədov “Gənclərin dostu” mükafatına layiq görülmüşlər.
Mükafatı “İrəli” İctimai Birliyinin korporativ əlaqələr üzrə katibi Niyaz Əliyev təqdim etmişdir.

Gürcüstan azərbaycanlılarının yığcam yaşadıqları Kvemo Kartli-Borçalı bölgəsinin Marneuli şəhərində yaşayan azərbaycanlı gənclər üçün “Ailə Məcəlləsi və məhkəməyə müraciət” mövzusunda seminar-treninq keçirilmişdir.
Marneuli Gənclər Mərkəzinin təşəbbüsü ilə baş tutmuş tədbirdə onun üzvləri ilə yanaşı, Gürcüstanın ali məktəblərində təhsil alan azərbaycanlı tələbələr də iştirak etmişlər.
Hüquqşünaslardan Tsismari Andriaşvili və Muradxan Hüseynov seminar-treninq iştirakçılarına erkən evlilik, boşanma ilə əlaqədar məhkəmələrə müraciət və digər məsələlər barədə məlumat vermiş, onların suallarını cavablandırmışlar.
Sonra “Gənc liderlərin Forumu: Gürcüstan-Azərbaycan-2013” layihəsinə həsr olunmuş 25 dəqiqəlik videomaterial nümayiş etdirilmişdir. Azərbaycan “Qan Donorları Assosiasiyası” İctimai Birliyinin rəhbəri Fuad Əsgərov videoçarx barədə gənclərə ətraflı məlumat vermişdir.

Gürcüstan azərbycanlılarının yığcam yaşadıqları Kvemo Kartli-Borçalı bölgəsinin Dmanisi rayon mərkəzindəki Heydər Əliyev Fondunun kompyuter təhsil mərkəzi Fond rəhbərliyinin təşəbbüsü ilə 6 il bundan əvvəl təşkil olunub. Burada uşaqlar gürcü və ingilis dillərini öyrənir, həmçinin kompyuter kursları keçirlər.

Mərkəzin direktoru Diana Qaralova  jurnalistlərə müsahibəsində qeyd edib ki, Ulu Öndərin ideyalarının, arzu və istəklərinin ardıcıl və məqsədyönlü şəkildə reallaşdırılması istiqamətində çox böyük layihələr həyata keçirən Heydər Əliyev Fondu xaricdə yaşayan soydaşlarımızın durumunun yaxşılaşdırılması, təhsilin inkişafı və digər sahələrdə önəmli işlər görür.

O, Gürcüstan azərbaycanlılarına göstərilən diqqət və qayğıya görə Azərbaycan dövlətinin başçısı İlham Əliyevə və Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevaya dərin minnətdarlığını bildirib.

Elə həmin gün 30 nəfər azərbaycanlı şagirdlərə gürcü dilini öyrənməsi haqqında sertifikat verilib. Təhsil nazirinin müavini Tamar Tetradze bizimlə müsahibəsində bildirib ki, Heydər Əliyev Fondunun təsis olunmasından keçən müddətdə həyata keçirdiyi xeyirxahlıq işlərini saymaqla qurtarmaq olmaz. Bizim mərkəz məhz həmin nümunələrdən biridir. Burada təşkil olunan məşğələlərə Dmanisi şəhərindən və rayonun ayrı-ayrı kəndlərindən 120 nəfərdən çox uşaq cəlb olunub. Gürcü dilini öyrənən qrupda əsasən azərbaycanlı, ingilis dili qrupunda isə kompyuter kursunda olduğu kimi, həm azərbaycanlı, həm də gürcü uşaqlarına məşğələlər keçilir. Uşaqlara “SOCAR Corcia petroleum” şirkətinin hədiyyə etdiyi avtobus xidmət göstərir.

Diana Qaralova diqqətə çatdırıb ki, mərkəzimizin fəaliyyət göstərdiyi müddətdə 300 nəfərədək dinləyici sertifikat alıb. Sertifikat almış azərbaycanlılardan təxminən 10 nəfəri Gürcüstanın ali məktəblərinə qəbul olunub. O, kursların birillik olduğunu bildirib.

Dinləyicilərdən Roman Mahmudov, Məryəm Aslanişvili və başqaları xeyirxahlığa və belə bir şəraitin yaradılmasına görə Heydər Əliyev Fondunun prezidenti Mehriban xanım Əliyevaya dərin minnətdarlıqlarını bildiriblər.

Bu gün Azərbaycanın xarici işlər naziri Elmar Məmmədyarovun başçılıq etdiyi nümayəndə heyəti İraqda rəsmi səfərdə olub.

Azərbaycan Xarici İşlər Nazirliyinin mətbuat xidmətindən AzNews.az - a verilən məlumata görə, səfər zamanı E.Məmmədyarov İraqın Baş naziri Nuri əl-Maliki və xarici işlər naziri Xoşyar Zebayri ilə görüşlər keçirib.
İraqın Baş naziri ilə görüş zamanı ikitərəfli münasibətlərin inkişafı, müxtəlif sahələrdə, o cümlədən iqtisadi-ticarət, enerji, təhsil sahələrində əməkdaşlıq perspektivləri, eləcə də iki ölkə arasında hökumətlərarası müştərək komissiyanın fəaliyyəti müzakirə edilib.
Terrorizmin beynəlxalq ictimaiyyət, o cümlədən ölkələrimiz üçün böyük təhlükə olduğu qeyd olunaraq, bu sahədə əməkdaşlığın xüsusi əhəmiyyət kəsb etdiyi və beynəlxalq birliyin səylərinin səfərbər edilməsinin vacibliyi vurğulanıb.

E.Məmmədyarov İraqın Baş nazirinə Ermənistan-Azərbaycan münaqişəsi ilə bağlı məlumat verərək, BMT Təhlükəsizlik Şurasının Ermənistan silahlı qüvvələrinin Azərbaycanın işğal olunmuş ərazilərindən dərhal, qeyd-şərtsiz və tam çıxarılmasını tələb edən 4 qətnamə qəbul etdiyini və bu qətnamələrin hələ də Ermənistan tərəfindən yerinə yetirilmədiyini və Azərbaycan torpaqlarının Ermənistan tərəfindən işğalının davam etdiyini diqqətə çatdırıb.

Bu işğal nəticəsində bir milyona yaxın insanın qanlı etnik təmizləməyə məruz qalaraq, tarixi torpaqlarından qovulduğunu və qaçqın və məcburi köçkün vəziyyətinə düşdüyünü deyən nazir Ermənistanın beynəlxalq hüquqa davamlı surətdə hörmətsizlik nümayiş etdirdiyini qeyd edərək, bu ölkənin beynəlxalq təşkilatların qəbul etdiyi qətnamələrə riayət etməli olduğunu vurğulayıb. E.Məmmədyarov münaqişə ilə əlaqədar Azərbaycanın haqlı mövqeyini və beynəlxalq təşkilatlar çərçivəsində dəstəklədiyinə görə İraqa öz təşəkkürünü ifadə edib.

Nuri Əl-Maliki İraqın Azərbaycan ilə müxtəlif sahələrdə əməkdaşlığa hazır olduğunu bildirib. Baş nazir İraqın Azərbaycanın ərazi bütövlüyünü və suverenliyini dəstəklədiyini qeyd edərək, beynəlxalq birlik tərəfindən qəbul edilmiş və tanınmış Azərbaycanın ərazi bütövlüyünün pozulmasını təcavüz kimi qiymətləndirib və beynəlxalq təşkilatların qəbul etdiyi qərar və qətnamələrin yerinə yetirilməli olduğunu vurğulayıb.
Səfər çərçivəsində E.Məmmədyarov İraqın xarici işlər naziri X.Zebayri ilə də görüşüb.

X.Zebayri ilə görüşdə ölkələrimiz arasında siyasi əlaqələrin inkişaf səviyyəsinin məmnunluq doğurduğu qeyd olunaraq, iqtisadiyyat, enerji, nəqliyyat və təhsil sahələrində əməkdaşlığın genişləndirilməsi məqsədilə birgə səylərin artırılmasının vacibliyi vurğulanıb.
Bu xüsusda, xarici işlər nazirləri iki ölkə arasında fəaliyyət göstərən hökumətlərarası komissiyanın fəaliyyətini müzakirə ediblər. Görüşdə müştərək komissiyanın İraq tərəfindən həmsədri rabitə və əyalətlər naziri əvəzi Turhan əl-Mufti də iştirak edib.

Nazir E.Məmmədyarov Ermənistanın Azərbaycana qarşı təcavüzü və münaqişənin həlli üzrə danışıqlar prosesi haqqında məlumat verərək, bu münaqişədə Azərbaycanın haqlı mövqeyini dəstəklədiyinə görə İraq tərəfinə öz təşəkkürünü ifadə edib.

X.Zebayri İraqın Azərbaycanın ərazi bütövlüyü, suverenliyi və sərhədlərinin toxunulmazlığını dəstəklədiyini diqqətə çatdıraraq, ölkəsinin Ermənistan-Azərbaycan münaqişəsinin beynəlxalq hüququn norma və prinsipləri, eyni zamanda, beynəlxalq təşkilatların qərar və qətnamələri əsasında həllinin tərəfdarı olduğunu bildirib.

E.Məmmədyarov həmkarına Azərbaycanın iştirakı ilə regionda həyata keçirilən strateji enerji və nəqliyyat layihələri barəsində məlumat verib.

İraqlı tələbələrin Azərbaycanda təhsil aldığını qeyd edən nazir gələcəkdə bu imkanların daha da artırıla biləcəyini qeyd edib.

Görüşdə Azərbaycan və İraq xarici işlər nazirləri tərəfindən "Azərbaycan Respublikası Hökuməti və İraq Respublikası Hökuməti arasında diplomatik, xüsusi və xidməti pasportlara malik şəxslərin vizasız gediş-gəlişi haqqında saziş" imzalanıb. Bu sazişin iki ölkə arasında təmasların artmasına xidmət edəcəyi vurğulanıb.
Görüşdən sonra E.Məmmədyarov və X.Zəbayri kütləvi informasiya vasitələrinin nümayəndələri üçün mətbuat konfransı keçiriblər.